У.Хүрэлсүх М.Энхболд, Сү.Батболд нарыг Бээжинд урьж, Л.Оюун-Эрдэнэ МАН-ын их хурлыг товлоогүй байна

           Өнөөдөр дэлхийн II дайн дууссаны 80 жилийн ой тохиож байна. Ерөнхийлөгч У.Хүрэлсүх Тяньжинд ШХАБ-ын дээд түвшний уулзалтад оролцож, яг одоо Бээжинд цэргийн парад үзэж буй. Түүний айлчлалын бүрэлдэхүүнд МАН-ын дарга асан Сү.Батболд, М.Энхболд нар багтаж, Жанчхүүгийн даваан дээр Монгол цэргүүдийн дурсгалыг хүндэтгэн Гадаад харилцааны сайд Б.Батцэцэгтэй хамт улаан сарнай барин зогсож буй гэрэл зураг анхаарал татна. МАН-ын их хурлыг 2025 оны есдүгээр сард хуралдуулахаар албан бусаар товлосон. Ерөнхий сайдын албан тушаалаас огцорсон Л.Оюун-Эрдэнэ энэ их хурлын үеэр намын даргын суудлаа тавьж өгөх ёстой. Огцорсноосоо хойш хилийн чинадад нэг хэсэг нам гүм амьдарч байгаад ирсэн тэрбээр төд удалгүй Монголд ирж, МАН, АН-ынхантай нууц уулзалт хийж байгаа. Архангай, Өвөрхангай, Говьсүмбэрт МАН, АН-ынхантай “болзсон” тэрбээр саяхан Их тэнгэрт болсон МАН-ын дэргэдэх СДМЗХ-ны үе үеийн удирдлагуудын уулзалтад оролцоогүй. Эрх баригч хүчний их хурлыг Л.Оюун-Эрдэнэ намын даргын хувьд товлох ёстой ч одоо болтол таг чиг байна. Харин Ерөнхийлөгч У.Хүрэлсүх Х.Баттулга болон Л.Оюун-Эрдэнэ нарын эсрэг блокоо улам өргөжүүлж байна. Экс хүргэн Б.Пүрэвдагва нь Ерөнхий сайд Г.Занданшатарыг залуустай хийх уулзалтын анхны зочноор урьж “Рио парк”-т нэг үдшийг хамт өнгөрүүлсэн бол У.Хүрэлсүх М.Энхболд, Сү.Батболд нарыг Бээжинд урилаа. Эл дүр зургаас харвал, Ерөнхийлөгч У.Хүрэлсүх МАН дахь 90-ээд оныхноос гадна 60-аад оныхны хүчийг нэгтгэж, эрх баригч хүчний их хурлын өмнөх бэлтгэлээ базааж байна. М.Энхболдын хувьд, 2017 оны Ерөнхийлөгчийн сонгуульд Х.Баттулгатай өрсөлдөж, Л.Оюун-Эрдэнэ тэргүүтэй “Шударга 5”-ын “МАНАН дэглэмийн эсрэг Монгол түмний нэгдэл” эсэргүүцлийн акцийн үеэр УИХ-ын даргаас огцорч байсан. Сү.Батболдын тухайд ч мөн адил Х.Баттулгын мөнхийн дайснуудын нэг. МАН-ын дарга Л.Оюун-Эрдэнэ түүнийг УИХ-ын 2024 оны сонгуульд нэр дэвшүүлээгүй юм. Ямартай ч У.Хүрэлсүх Х.Баттулга, Л.Оюун-Эрдэнэ нарын эсрэг блокоо улам тэлж, Б.Пүрэвдагва тэргүүтэй 90-ээд оныхныг 80-аад оныхны өөдөөс гаргаж ирлээ. Улс төрд У.Хүрэлсүх ийнхүү ээлжит нүүдлээ хийж буй үед Л.Оюун-Эрдэнэ МАН-ын их хурлаа товлон хуралдуулахгүйгээр цаг хожих болов уу, яах бол... Ерөнхийлөгч У.Хүрэлсүх өнгөрсөн гуравдугаар сард Чех улсад айлчлах үеэр МАН-ын генсек Я.Содбаатар, АН-ын тэргүүн дэд дарга С.Баярцогт нар айлчлалын бүрэлдэхүүнд багтаж байсан. Түүнээс хойш хоёрхон сарын дараа Л.Оюун-Эрдэнийг огцруулах улс төр эрчээ авч албан тушаалаас нь огцруулсан.  

С.Тулга