Л.Оюун-Эрдэнэ МАН-ын генсект Д.Сумъяабазарыг зүтгүүлж, УЗ-д хүмүүсээ оруулах болзол тавьж байна

             Л.Оюун-Эрдэнэ МАН-ын даргын хувьд намын их хурлынхаа товыг зарлах учиртай. Гэвч тэрбээр өнөөдрийг хүртэл Бага хурал болон их хурлаа товлоогүй байна. Тиймээс эрх баригч хүчин дэх эсрэг фракциуд нь намын их хурлаа нэн даруй зарлан хуралдуулахыг шаардаж эхэлжээ. Харин Л.Оюун-Эрдэнэ МАН-ын даргын суудлаа зүгээр ч нэг тавьж өгөхгүй бололтой. Тэрбээр “Д.Сумъяабазарыг намын Ерөнхий нарийн бичгийн дарга болговол би ажлаа өгье” гэдэг болзол тавьж байгаа аж. Түүнээс гадна “Удирдах зөвлөлд манай хүмүүсээс оруул” хэмээн тулгаж байгаа талаар эрх баригч хүчнийхэн ярьж байна. Өөрөөр хэлбэл, Л.Оюун-Эрдэнэ Ерөнхий сайдаас огцорсон ч МАН-ын дарга хэвээр байгаа. Харин одоо МАН-ын даргынхаа тамгыг Г.Занданшатарт гардуулбал УИХ-ын гишүүн гэсэн “Дан дээл”-тэй үлдэнэ. “Дан дээл”-тэй даарч хоцрохгүйн тулд тэрбээр МАН-ын Ерөнхий нарийн бичгийн дарга, Удирдах зөвлөлийн гишүүдийн томилгоон дээр “ах нар”-тайгаа наймаалцах оролдлого хийж байгаа ч амжилт олоогүй аж. Улс төрийн наймаа хийх гэсэн нь ийнхүү бүтэлгүйтэж байгаа тул Л.Оюун-Эрдэнэ намын их хурлаа зарлахгүй байгаа юм байна. Гэвч МАН УИХ-ын 2024 оны сонгуулиар парламентад олонхи болсон. Л.Оюун-Эрдэнэ жагсаалт болон тойргуудад кнопчидоо багтааж, УИХ-д “Гучийн бүлэг”-тэй болсон. Ч.Номин, Э.Болормаа, О.Батнайрамдал тэргүүтэй “Гучийн бүлэг”-ийнхэн нь Г.Занданшатарыг Ерөнхий сайд болсны дараахан “Нас, хүйс харгалзахгүйгээр мэргэжлийн хүмүүсийг сайдаар томил” хэмээн шаардлага хүргүүлж байсан. Л.Оюун-Эрдэнийн зүгээс МАН-ын Удирдах зөвлөлд “Гучийн бүлэг”-ээсээ түлхүү оруулахыг санал болгож буй нь тодорхой. Тэрбээр Д.Сумъяабазарыг хотын мэр байхад нь ашиг сонирхол нэгтэй байсныг улс төрийн хүрээнийхэн мэднэ. Нэг ёсондоо, нийслэл хот Л.Оюун-Эрдэнийн эрх мэдлийн гол тулах цэг төдийгүй эдийн засгийн хувьд ч ашиг сонирхлынх нь нэг хэсэг гэгддэг байв. Арга ч үгүй юм. Д.Сумъяабазар хотын мэр төдийгүй нийслэлийн МАН-ын дарга байсан. Нийслэлийн МАН гэдэг эрх баригч хүчний 50 хувь гэдгийг тус намынхан хүлээн зөвшөөрдөг. “Ногоон автобусны хэрэг” өндрийг авч, Д.Сумъяабазарын суудал дэнжигнэж эхлэхэд Л.Оюун-Эрдэнэ түүнтэй Төрийн ордонд хоёулхнаа уулзаж, төд удалгүй Х.Нямбаатарыг оронд нь томилсон. НИТХ-аар ч хэлэлцүүлэлгүй Л.Оюун-Эрдэнэ шууд томилсон... Харин одоо Х.Нямбаатар хотын мэр бөгөөд нийслэлийн МАН-ын дарга. Өөрөөр хэлбэл, Л.Оюун-Эрдэнэ, Х.Нямбаатар нарын мэдэлд нийслэлийн МАН буюу эрх баригч хүчний 50 хувь бий. Гэлээ гээд Д.Сумъяабазарыг МАН-ын генсек болгох тухай Л.Оюун-Эрдэнийн болзлыг “ах нар” нь хүлээж авахгүй. Хамгийн муу хотын мэр байсан, “Ногоон автобусны хэрэг”, хувь эзэмшдэг ҮХОБ-даа “Эрдэнэт үйлдвэр”, “Эрдэнэс Тавантолгой” зэрэг төрийн өмчит компаниудын хэдэн тэрбум төгрөгийг байршуулчихаад гаргаж өгөхгүй байсан гэх мэт хар факт Д.Сумъяабазарынх. Тиймээс МАН-ынхан Д.Сумъяабазарыг Ерөнхий нарийн бичгийн даргаар сонгохыг дэмжихгүй. Ерөнхий сайд асан Л.Оюун-Эрдэнэ ийнхүү МАН дахь эрх мэдлээ алдахгүйн тулд албан тушаалын наймаа хийхээр оролдож, өөртөө өндөр хамгаалалт босгох гэж үзэж байна. Гэвч юу л бол...

С.Тулга