“Б.Батцэцэгийн эсрэг тролл бүлэглэлийнхэн” гэгддэг Х.Булгантуяа, Ч.Номин нар party-дав

            Л.Оюун-Эрдэнийг Ерөнхий сайдаас огцруулсны дараа Гадаад харилцааны сайд Б.Батцэцэгийн эсрэг медиа ажиллагаа ширүүссэн. “Урвагч муужгай”, “Тендер түүгч” гэсэн гол мессэж бүхий эл улс төр МАН-ын их хурлын өмнөх энэ өдрүүдэд ч идэвхжсэн хэвээр байна. Б.Батцэцэг сайдын зүгээс ч сошиал баг ажиллуулж, өөрийгөө магтаж, өмөөрүүлсэн постуудыг бичүүлж эхэлсэн бололтой. УИХ Л.Оюун-Эрдэнийг олонхийн саналаар огцруулсны дараа Их Британийн “The Times” сонинд “Ерөнхий сайд Л.Оюун-Эрдэнэ огцорсон нь Ерөнхийлөгч У.Хүрэлсүхийн зүгээс явуулсан кампанит ажлын үр дүн” гэх утга бүхий нийтлэл хэвлэгдсэн. Энэхүү нийтлэл барууны хэвлэлд гарсны дараа Гадаад харилцааны сайд Б.Батцэцэг “Өөрсдийн эрх ашгийг хамгаалах өчүүхэн сонирхлын дор улс орны нэр хүндийг унагаж буй нь эх орноосоо урвасан үйлдэл” гэж мэдэгдсэн. Тэрбээр ингэж мэдэгдсэнээрээ Л.Оюун-Эрдэнийн талынхны зэвүүцлийг төрүүлсэн ч байх. Тиймээс сайд Б.Батцэцэгийг “У.Хүрэлсүхэд хов зөөж, Л.Оюун-Эрдэнийг унагасан урвагч муужгай” хэмээх болсон. “Дарин дээр давс” гэгчээр МАН-ын эмэгтэйчүүдийн тийрэлцээн ч түүний эсрэг медиа ажиллагаанд хүч нэмж байж мэднэ. Учир нь “Б.Батцэцэг сайдыг гүтгэж харлуулах ажлыг УИХ-ын дэд дарга Х.Булгантуяа, ССАЖ-ын сайд асан Ч.Номин, УИХ-ын гишүүн А.Ариунзаяа нар зохион байгуулж байна” гэсэн мэдээлэл сошиалд хөвөрч байна. Харин ССАЖ-ын сайд асан Ч.Номин УИХ-ын дэд дарга Х.Булгантуяа, “МАК”-ийн Н.Цэлмүүн, түүний нөхөр, Ерөнхий сайд асан Сү.Батболдын хүү Б.Баттүшиг, “Ард санхүүгийн нэгдэл”-ийн ТУЗ-ийн дарга Ч.Ганхуяг нартай party-даж буй гэрэл зургаа өчигдөр (2025.09.04) инстаграмд байршуулжээ. “Б.Батцэцэг сайдын эсрэг тролл бүлэглэлийн толгойлогчид” гэгдэж буй Х.Булгантуяа, Ч.Номин нар хамтдаа party-даж буй нь олны хардлагыг улам лавшруулсан байж магадгүй л юм. Ч.Номингийн хувьд, Л.Оюун-Эрдэнийн фракцийнх. Найзыг нь Ерөнхий сайдаас огцруулж, өөрийг нь ССАЖ-ийн сайдаас буулгасанд Ч.Номин болон түүний нөхөр өдгөө ч уурлаж явдаг бололтой. Г.Занданшатарыг болон энэ Засгийн газрыг сошиалд үе үе шоглодог. УИХ-ын гишүүн Х.Баасанжаргал, М.Нарантуяа-Нара нар “Засгийн газар тойрог бүрт таван тэрбум төсөвлөж, УИХ-ын гишүүдийг хахуульдах гэж байна” гэж өнгөрсөн зун сошиалд дуулиан дэгдээхэд Ч.Номин тэднийг дэмжиж байр сууриа илэрхийлж байсан юм. Харин УИХ-ын дэд дарга Х.Булгантуяагийн найз, төдийгөөс өдий хүртэл МАН-ын дарга нарын өрөөгөөр хөтөлж гүйсний эцэст УИХ-ын гишүүн болгосон О.Номинчимэг Л.Оюун-Эрдэнийн фракцийнхан буюу “УИХ дахь 30-ийн бүлэг”-ийнхний нэг болж Ерөнхий сайд Г.Занданшатарт шаардлага хүргүүлж байв. “О.Номинчимэг Х.Булгантуяагаас гадна “Ард санхүүгийн нэгдэл”-ийн ТУЗ-ийн дарга Ч.Ганхуягтай гэр бүлийн найзууд” гэх яриа улс төрийн хүрээнд бий. Х.Булгантуяа, Ч.Номин нартай хамт party-дсан “МАК”-ийн Н.Цэлмүүний ах УИХ-ын гишүүн Н.Номтойбаяр. Тэрбээр “Г.Занданшатар, С.Амарсайхан нар надад Шадар сайдаар ажиллах санал тавьсан ч би татгалзаж байна” гэж байсан юм.

Л.Од