МАН ирэх долоо хоногт УЗ, Бага хурлаа хуралдуулж, их хурлаа зарлана

        МАН-ын Ерөнхий нарийн бичгийн дарга Я.Содбаатар өнгөрсөн сарын сүүлчээр “Намын их хурал 2025 оны есдүгээр сард хуралдана” гэж сэтгүүлчдэд мэдээлсэн. Энэ удаагийн их хурлаар Ерөнхий сайд асан Л.Оюун-Эрдэнэ намын даргын албаа өгөх юм. Харин түүний оронд хэн МАН-ын дарга болж, 2028 оны сонгуульд удирдаж орох нь анхаарал татаж байгаа юм. Хэдийгээр “Ерөнхий сайд Г.Занданшатар эрх баригч хүчний тэргүүн болох учиртай” гэж байгаа ч Л.Оюун-Эрдэнийн зүгээс хувь улстөрчийн нүүдлээ хэдийнэ хийж эхэлсэн. МАН-ынхны ярьж буйгаар, тэрбээр намын генсект Д.Сумъяабазарыг зүтгүүлж, Удирдах зөвлөлд фракциасаа түлхүү оруулах хувилбар дээр нам доторхи фракциудтай тохиролцох гэсэн ч бүтээгүй сураг дуулдана. Улс төрийн намын тухай хуулиар намууд энэ оны арванхоёрдугаар сарын 31-нээс өмнө их хурлаа хуралдуулж, дүрмээ шинэчлэх ёстой. МАН ирэх долоо хоногт Удирдах зөвлөл, Бага хурлаа хуралдуулж, намын их хурлаа товлох бололтой. Зарим эх сурвалж ”Бага хурал хуралдсанаас хойш 45 хоногийн дараа МАН-ын их хурал хуралдах ёстой” гэж байгаа ч улс төрийн нөхцөл байдал, цаг үеийн шахалтаар эрх баригч хүчнийхэн их хурлаа заавал энэ хугацаанд баригдалгүйгээр зарлаж магадгүй юм.

Д.Од