Олсны үзүүрт Д.Амарбаясгалан байсангүй...

     АТГ-ынхны “Амарбаясгалан” ажиллагаа бүтэлгүйтэв. УИХ-ын дарга Д.Амарбаясгаланг “Админерал” ХХК-аар гүйцэж түрүүлэх гэсэн гүйцэтгэх ажиллагаа нь мухардалд оров. Тэд даалгавраа биелүүлж чадсангүй. МАН-ын даргын марафонтой зэрэгцэн тэд “ан”-д гарцгаасан уу, тийм. Харин үр дүн? УИХ-ын дарга Д.Амарбаясгаланг нүүрсний хулгайч гэдгийг нотлох баримт олж чадсан уу, NO! Олсны үзүүрт Д.Амарбаясгалан байсангүй. АТГ-ынхан Тусгаар тогтнолын ордны өрөөнүүдийг шөнөжин нэгжсэний эцэст яаж хоосон буцах вэ, МАН-ын нарийн бичгийн дарга Ц.Чулуунзагд гэдэг “жараахай”-тай буцжээ. Улс төрийн халуун үйл явдалтай зэрэгцэн АТГ-чид “ан”-д гарцгаадаг. “Хүн нь байвал хэрэг нь олдоно” гэдэг Сталиний хэлсэн үгээр замнаж, эрх мэдэлтнүүдийн өрсөлдөгчдийг намнах ажиллагааг гүйцэтгэдэг. Гол бай нь баригдахгүй бол гэр бүл, үр хүүхдүүд, ойр тойрныхныг нь гавладаг. Энэ бол АТГ технологи… Тэднийг гүтгэсэн хэрэг огт биш шүү. Худлаа гэвэл улстөрчдийн нэр холбогдсон хэргүүд дээр тэд яаж ажилладгийг өнгөрсөн үйл явдлуудаас хөвөрдөөд харчихаарай. МАН-ын даргад өрсөлдөхөө мэдэгдсэн УИХ-ын дарга Д.Амарбаясгалан дээр ч АТГ хар технологио давтлаа.

АТГ улстөрчдийн эсрэг ПР хийдэг болоод удаж байгаа. Оймсдоно, орон гэрт нь нэгжлэг хийж боодол, боодол мөнгө олж илрүүлснээ гэрэл зургаар харуулна, Т.Бадамжунай мэтийн улсын тэргүүний авлигачийг Монголд гавлаж авчирснаа АТГ-ын дарга нар телевизийн камерийн өмнө ёслол төгөлдөр харуулж ярилцлага өгцгөөнө, улс төрийн хүрээнийхэнтэй холбоотой баривчилгааны дараа эгнэж сууж байгаад хэвлэлийн бага хурал хийнэ… Сая бас л тэглээ. Хашир сэтгүүлчдийн зүгээс сошиалд шоглож буйчлан хэд хоногийн өмнө тэд VIP хэвлэлийн бага хурал сэм зарласан юм уу даа. Таньдаг хэдхэн сэтгүүлчээ дуудаж байгаад МАН-ын нарийн бичгийн дарга Ц.Чулуунзагдыг ямар үндэслэлээр саатуулснаа шивнэх гэсэн бололтой. “Хана хүртэл чихтэй” гэдэгчлэн АТГ-аас урилга аваагүй сэтгүүлчид үүнийг нь сонсчихож! Тиймээс АТГ-ынхан комиссараараа мэдээлэл өгүүлжээ. АТГ-ын Хэвлэл мэдээлэл, олон нийттэй харилцах ажилтан, комиссар Б.Билэгт сэтгүүлчдэд “АТГ-аас Эрүүгийн хуулийн 22.1.2, 22.4 дэх хэсэгт заасан үндэслэлээр Орчны бохирдлыг бууруулах үндэсний хороо, “Тавантолгой түлш” ХХК-ийн албан тушаалтнуудад холбогдох хэрэг бүртгэлтийн хэргийг 2023 оны нэгдүгээр сард нээж шалгасан. Энэ хэргийн хүрээнд эрх мэдэл, албан тушаалын байдлаа урвуулан ашиглаж, арилжааны гэрээг хууль бусаар байгуулсан болон хахууль авсан гэх хэрэгт Ч нарын нэр бүхий албан тушаалтнуудыг холбогдуулан мөрдөн шалгах ажиллагааг явуулж байна” гэжээ. АТГ-ын комиссарын мэдээлэл арай логикгүй юу! Ц.Чулуунзагд бол МАН-ын нарийн бичгийн дарга. Гэтэл яахаараа Орчны бохирдлыг бууруулах үндэсний хороо, “Тавантолгой түлш” ХХК-тай холбогддог билээ. Орчны бохирдлыг бууруулах үндэсний хороо гэж хаана харьяалагддаг, ямар чиг үүрэгтэй газар вэ. “Тавантолгой түлш” ХХК бас! Эрүүгийн хуулийн 22.1.2, 22.4 бол нийтийн албан тушаалтан эрх мэдэл, албан тушаалын байдлаа урвуулан ашиглах, хахууль авсан нь тогтоогдвол ямар хариуцлага хүлээлгэх тухай заалтууд юм. Ц.Чулуунзагдын хувьд, төрийн албан хаагч биш, МАН-ын нарийн бичгийн дарга шүү дээ. АТГ-ынханд ямар фантастик бодол төрөхөөрөө Ц.Чулуунзагдыг хаа байсан Орчны бохирдлыг бууруулах үндэсний хороо, “Тавантолгой түлш” ХХК-ийн албан тушаалтнуудтай хам хэрэгтэн болгочихов оо... Филиппинээс Т.Бадамжунайг гавлаж авчирсан манай яруу алдарт АТГ-чид Ц.Чулуунзагдад заавал нэг “юм” олж наах даалгавраа биелүүлсэн нь энэ үү. Комиссар залуу өөр нэгэн ноцтой мэдээлэл өгчээ.

“Нэгжлэгийн явцад “Админерал” ХХК-ийн гүйцэтгэх захирлаар ажиллаж байгаад 2025 оны гуравдугаар сард нас барсан БНХАУ-ын иргэн Х-ийн гарын үсэгтэй дардас олдсон. Уг гарын үсгийн дардсыг нас барснаас нь хойш хууль бусаар ашиглаж байж болзошгүй гэх үндэслэлээр мөрдөн шалгах ажиллагаа цааш үргэлжилнэ”... АТГ-ын Хэвлэл мэдээлэл, олон нийттэй харилцах ажилтан, комиссар Б.Билэгт ингэж мэдээлжээ. Маш ноцтой! Сонссон хүмүүст ч жихүүдэс төрмөөр мэдээлэл байгаа биз. “Өнөө муу Ц.Чулуунзагд чинь Монголын хамгийн том нүүрсний хулгайчаас гадна хүн амины хэрэгт холбогдчихов уу яав. “Админерал” ХХК-ийн гүйцэтгэх захирлаар ажиллаж байсан талийгаачийн гарын үсэгтэй дардас олдож гэнэ. АТГ-ынхан ч эвгүй момент дээр нь барьж дээ. Д.Амарбаясгалан одоо өнгөрчээ...” гээд Төрийн ордны тамхины цэг, сошиалынхны хов жив явж өгнө биз. “Өст хүн өлийн даваан дээр” гэдэгчлэн УИХ-ын гишүүн Б.Энхбаяр АТГ-ынхны мэдээлэл дээр “давс” нэмэв. Нүүрсний сонсголыг даргалж, УИХ-ын дарга Д.Амарбаясгаланг хорхойтой араандаа зуучихаад байгаа тэрбээр “100 тэрбумын авлигын хэргийн гол гэрч болох “Админерал” ХХК-ийн хятад захирал гэнэт нас барсан. Юу юугүй чандарлачихсан байсан асуудлыг ч шалгах ёстой” гэж АТГ-чдад шургав. Б.Энхбаярыг улс төрийн хүрээнийхэн “Эвгүй хүн” гэдэг л дээ. Гэхдээ энэ удаагийн мэдээлэл нь бүр эвгүй байлаа. Талийгаач хятад биш, өвөрмонгол хүн байсан гэдэг. Үүнийг сэтгүүлчид ч мэднэ. Харин талийгаачийн цогцсыг юу юугүй чандарлачихсан байсан гэдгийг УИХ-ын гишүүн Б.Энхбаяр сайн мэдэж байгаа бололтой. Тэгэхээр АТГ-ынхан энэ урт хошуутай нөхрийг гэрчээр дуудаж шалгах ёстой болох нь. Ямартай ч УИХ-ын дарга Д.Амарбаясгаланг яг МАН-ын даргын марафонд нэр дэвшсэн байгаа дээр нь нүүрсний хамгийн том хулгайчаар тодруулах АТГ ажиллагаа бүтэлгүйтлээ. Олсны үзүүрт Д.Амарбаясгалан гэдэг аймаар тарган үхэр хэвтэж байх юм төсөөлөөд МАН-ын байранд нэгжлэг хийсэн чинь юу ч олдоогүй бололтой. Ажлаа хийгээд сууж байсан Ц.Чулуунзагдыг бэлнээр нь бариад явчихаж. З.Дашдаваа одоо яана аа. “Хэнтийн бүлэглэл”-ийнхний нэг, У.Хүрэлсүхийг Ерөнхий сайд байхад АТГ-ын дарга болсон энэ цагдааг Л.Оюун-Эрдэнэ өнгөрсөн хавар улираан томилуулсан. “Транпэрэнси интернэшнл Монгол” ТББ-аас 2025 оны хоёрдугаар сард “Монгол Улсын авлигын индекс дэлхийн 180 орноос 114 дүгээр орж ухарсан” гэж мэдээлсэн атал З.Дашдавааг АТГ-ын даргаар улираан томилсон. Монгол л юм даа. “АТГ муу ажиллаж байна” гэж иргэд шүүмжилж, “Транспэрэнси интернэшнл Монгол” ТББ-ынхан авлигын индэксээр хэрхэн ухарсныг мэдээлсээр атал Л.Оюун-Эрдэнэ З.Дашдавааг улираан томилохыг санал болгоод УИХ олонхиороо кнопдчихсон хэрэг. Гэтэл одоо З.Дашдаваа даргатай АТГ-ынхан УИХ-ын дарга Д.Амарбаясгалан руу ноцож байна шүү дээ. “Нотолж чадахгүй бол цагаатга”... УИХ-ын гишүүн Б.Энхбаяр чуулган, байнгын хороон дээр үе үе энэ үгийг эш татдаг. Нүүрсний сонсгол хийгээд Д.Амарбаясгаланг нүүрсний хулгайч гэдгийг нотолж чадсангүй. Түүнийг “Админерал” ХХК, Бортээгийн уурхайтай ямар ч холбоогүй гэдгийг “Эрдэнэс Тавантолгой” ХХК-ийн гүйцэтгэх захирлын үүрэг гүйцэтгэгч Х.Мөнхжаргал УИХ-ын чуулган дээр хэлж байсан. УИХ-аас томилогдсон ажлын хэсгийн ахлагч С.Ганбаатар бас ийн мэдэгдэж байв. Б.Энхбаярын даргалж явуулсан нүүрсний сонсгол дээр МАН-ын нарийн бичгийн дарга Ц.Чулуунзагд “Би намын ажилтан. “Админерал” ХХК-ийн үйл ажиллагаанд оролцдоггүй, мэдэхгүй” гэж хариулж байлаа. АТГ-ынхан “Амарбаясгалан” ажиллагаа явуулаад УИХ-ын дарга Д.Амарбаясгаланд наах “скоч” ч олж чадсангүй. Спикер өчигдөр (2025.09.17) УИХ-ын чуулган дээр “Хууль, шүүхийнхэн хэн нэгний дохиур болж ажиллаж болохгүй” гээд хэлчихлээ. Тэгэхээр одоо яах ёстой билээ. Б.Энхбаярын эш татдагчлан нотолж чадахгүй бол цагаатга! “Д.Амарбаясгаланг нүүрсний хулгайч гэдгийг найзуудыг нь барьж саатуулаад ч нотолж чадсангүй ээ” гэдэг хэвлэлийн бага хурлаа Төрийн ордонд нөгөө гоё индэр дээр Б.Энхбаяраар хийлгэчих, АТГ-ын дарга З.Дашдаваа. Цаадахь чинь сошиалд гоё зурагтай постер хийлгээд өөрөө постолчихно. Аль талд кока авахаа сайн мэднэ.  

С.Тулга