“Админерал” ХХК-ийн гүйцэтгэх захирал агсан Н.Хасбатар зүрхний архаг ишимит өвчнөөр нас барсныг ЦЕГ-аас байгуулсан ажлын хэсгийн дүгнэлтэд дурджээ

      УИХ-ын гишүүн Б.Энхбаяр “100 тэрбум төгрөгийн авлигын цорын ганц гэрч бол “Админерал” ХХК-ийн гүйцэтгэх захирал агсан Н.Хасбатар. Түүний цогцсыг юу юугүй чандарлачихсан байсан” гэх ноцтой мэдээллийг өгсөн. МАН-ын даргын марафонтой зэрэгцэж түүний сошиалд шидсэн энэ мэдээлэл УИХ-ын дарга Д.Амарбаясгалан руу чиглэсэн нь хэнд ч ойлгомжтой байв. Б.Энхбаяр телевизийн ярилцлагад орж УИХ-ын дарга Д.Амарбаясгалан болон “Админерал” ХХК-тай холбоотой “аймшгийн үлгэр”-ийг оройжин ярьж үзэгчдийг хиртхийлгэсэн. Харин УИХ-ын дарга Д.Амарбаясгалан энэ талаар “Хүний ой санаанд багтамгүй худал гүтгэлэг” гэж няцаасан. “Админерал” ХХК-ийн гүйцэтгэх захирал агсан Н.Хасбатарын эхнэр, өдгөө Германд амьдарч буй Бай Лонгян (Bai Longyan)-тай “Өнөөдөр” сонины сэтгүүлч цахимаар холбогдож, ярилцлага авснаа өнгөрсөн долоо хоногт нийтэлжээ. Тэрхүү ярилцлагад “Миний нөхөр Н.Хасбатарын талаар буруу ташаа мэдээлэл олон нийтэд тараагдаж байгаад харамсаж байна. Хууль зүй, дотоод хэргийн сайд асан Б.Энхбаяр “Лхагвын тойм” гэх нэвтрүүлгээр ярихдаа миний хань, талийгаач Н.Хасбатарын амь нас нь хорлогдсон мэтээр ор үндэслэлгүй худал мэдээлэл хийжээ. Хасбатар нь 2025 оны хоёрдугаар сард Монгол Улсад ажиллаж байхдаа өвчний улмаас нас барж, манай гэр бүлд нөхөж баршгүй гарз тохиолдсон. Миний хань Н.Хасбатар нь Монгол Улсад нүүрс баяжуулах шинэ технологийн үйлдвэр барихад хөрөнгө оруулан ажиллаж байсан юм. Гэтэл энэхүү баригдаж дууссан үйлдвэрийн хөрөнгө оруулалтын тооцоо нийлсэн компанийн дотоод баримтыг Монголын хууль хяналтын байгууллагууд хураан авч, авлига, хээл хахуулийн мөнгө мэтээр олон нийтэд цацаж байгаа нь дэндүү увайгүй, ёс зүйгүй, харамсмаар үйлдэл юм. Талийгаачийг нас барах үед манай гэр бүл Монголд байсан. Өмнөговь аймгийн цагдаагаас талийгаачийнхаа шарилыг охид бид хоёр өөрсдөө хүлээн авч, Улаанбаатар хотод оршуулах зан үйлийг Монгол зан заншлаараа зохион байгуулсан. Оршуулах зан үйлд талийгаач нөхрийн маань төрсөн ах дүү болох 10 гаруй хүн Өвөрмонголоос ирж оролцсон. Бид өөрсдийн хүслээр, цагдаагийн зөвшөөрлөөр талийгаачийн шарилыг чандарласан байтал Б.Энхбаяр гэгч этгээд нөхрийг маань бурхан болсон хойно ч нэр төрд нь халдаж, бусдад хорлогдсон мэтээр, бие цогцсыг нь зүгээр л шатаачихсан мэтээр ярьж, улс төрийн зорилгоор ашиглаж байгаад гэр бүл нь болох бид жигшин зэвүүцэж байна. Бурхан болсон хүний ясыг өндөлзүүлдэггүй эртний Монгол зан заншил танай монголчуудад балран алга болсон юм уу. Н.Хасбатарын гэр бүл болох охин бид хоёрын зүгээс Монгол Улсын хууль хяналтын ямар ч байгууллагад гомдол гаргаагүй болохыг албан ёсоор мэдэгдэж байна. Улс төрийн бохир зорилгодоо миний нөхрийн нэрийг цаашид ашиглахгүй байхыг УИХ-ын гишүүн Б.Энхбаяраас шаардаж байна. Энэ мэт үйлдэл дахин гаргавал олон улсын хүний эрхийн байгууллагад хандана” гэжээ. УИХ-ын гишүүн Б.Энхбаярын мэдээллийг талийгаач Н.Хасбатарын эхнэр ийнхүү няцаалаа. Өмнөговь аймгийн Цагдаагийн газрын Цогтцэций сумын сум дундын Цагдаагийн хэлтсээс Эрүүгийн цагдаагийн хэлтсийн дарга, дэд хурандаа Б.Диваажигмэд 2025 оны хоёрдугаар сарын 14-нд “Улаанбаатар буян” ХХК-д “Тус цагдаагийн хэлтэст 2025 оны хоёрдугаар сарын 12-ны өдөр 08 цаг 24 минутад тус сумын Цагаан-Овоо гуравдугаар багийн нутаг дэвсгэрт байрлах “Админерал” ХХК-ийн кэмп дээр БНХАУ-ын иргэн Насан-Уртын Хасбатар ил харагдах гэмтэл шархгүй нас барсан байна. Насан-Уртын Хасбатарын биед задлан шинжилгээ хийсэн байх тул чандарлахад татгалзах зүйлгүй болно” гэж албан тоот илгээж байсан юм байна. Н.Хасбатар нас барсан тухай эмнэлгийн гэрчилгээн дээр “Нас барсан шалтгаан зүрхний ишимит” гэж бичжээ. Үүнээс гадна “Админерал” ХХК-ийн гүйцэтгэх захирал агсан Н.Хасбатар нас барсан гэх мэдээллийн мөрөөр ЦЕГ-ын Тэргүүн дэд даргын 2025 оны хоёрдугаар сарын 20-ны өдрийн А/07 дугаартай ажлын хэсэг байгуулах тухай тушаалаар Эрүүгийн цагдаагийн албанаас гурав, Мөрдөн байцаах албанаас гурав, Өмнөговь аймгийн Цагдаагийн газраас гурав, нийт есөн алба хаагчийн бүрэлдэхүүнтэй ажлын хэсэг байгуулж мөрдөн шалгах ажиллагаа явуулжээ. Энэхүү ажиллагааны үеэр талийгаач Н.Хасбатарын биед гэмтэл тогтоогдоогүй, биеэс химийн болон биологийн хорт бодис, архи, согтууруулах ундааны зүйл илрээгүй. Зүрхний архаг ишимит өвчин, судас хатуурах, архаг панкреатит өвчтэй, эдгээр өвчний улмаас зүрх зогсож нас барах нь дүгнэлтээр тогтоогдсон учраас Эрүүгийн хэрэг хянан шийдвэрлэх тухай хуулийн 30.8 дугаар зүйлийн нэг дэх хэсгийн 1.2 дахь заалтад зааснаар 2025 оны гуравдугаар сарын 02-нд хэрэг нээхээс татгалзах саналыг Өмнөговь аймгийн Ханбогд сум дахь сум дундын Прокурорын газарт хүргүүлсэн аж. Өөрөөр хэлбэл, УИХ-ын гишүүн Б.Энхбаярын мэдээллийг талийгаач Н.Хасбатарын эхнэрийн ярилцлага, Цогтцэций сумын сум дундын Цагдаагийн хэлтсээс “Улаанбаатар буян” ХХК-д илгээсэн албан тоот, ЦЕГ-ын Тэргүүн дэд даргын тушаалаар байгуулсан есөн хүнтэй ажлын хэсгийнхны мөрдөн шалгах ажиллагааны санал, дүгнэлт ийнхүү няцааж байна. Б.Энхбаяр “Баримт өөрөө ярьдаг” гэж сэтгүүлчдэд хэлсэн. Гэвч дээрх баримтууд түүний мэдээллийг “Худлаа” гэж “ярьж” байна.

Г.Анар