Хятадуудаас цүнхтэй мөнгө авсан УИХ-ын гишүүд хэн бэ, Д.Энхтүвшин гишүүн ээ

         УИХ-ын гишүүн Д.Энхтүвшин уржигдар (2025.09.29) сэтгүүлчид ярилцлага өгөхдөө “Хятадын нүүрсний компанийнхантай уулзахад “УИХ-ын тэр, тэр гишүүдэд цүнхтэй мөнгө аваачиж өгсөн” гэж ярьсан. Баримттай гэх юм уу. Хэн хэн яаж хулгай хийж байгаа тухай мэдээлэл Хятадын талд бэлэн байж байна. Тэр хүмүүс нэг хэсэгтээ мөнгөтэй болж болно. Улсаа бодмоор юм. Гэхдээ өөрсдөө хавханд орж байгаа шүү дээ. Нүүрсний худалдааны компанийн менежер охинтой уулзахад Төрийн ордонд сууж байгаа зарим хүний нэрийг хэлээд “Би тэр хүнд цүнхтэй мөнгө аваачиж өгдөг байсан” гэж байна. Улсаа барьцаанд тавьж, улс орныхоо аюулгүй байдалд хор хохирол учруулахуйц үйлдэл. Хэн хэнд ямар хэмжээний авлига өгснөө хэлээд байна шүү дээ, тэд” гэж дурдлаа. Д.Энхтүвшин бизнесийн салбараас улс төрд хөл тавьсан хүний хувьд худлаа ярих учиргүй. УИХ-ын гишүүд төр, түмний төлөө зүтгэх тангарагтай хүмүүс. Харин тэдний хэн нь хятадуудаас цүнхтэй мөнгө авч, Хятадын талд барьцаалагдаж эх орноо худалдсан бэ гэдгийг илчлэх хэрэгтэй бус уу, эрхэм гишүүн ээ. Ерөнхий сайд Г.Занданшатар нүүрсний хулгайтай дайн зарласан энэ үед Д.Энхтүвшин гишүүн Хятадын талд худалдагдаж, авлига авсан УИХ-ын гишүүдийг нэрлэх нь шударга ёсонд нийцнэ.

Ж.Болд