Ц.Нямдорж “Админерал”-тай холбоотой хэргийн мөрдөн байцаалтын нууц задруулсан уу

         МАН-ын даргын марафонтой зэрэгцэн Төрийн ордонд гарч ирсэн хүн бол Хууль зүй, дотоод хэргийн сайд асан Ц.Нямдорж. Тэрбээр МАН-ын Бага хурлын ээлжит хуралдаан өнгөрсөн бямба (2025.09.27) гарагт болоход Л.Оюун-Эрдэнэ, Д.Амарбаясгалан нарын ард бат зогсож, Бага хурлын гишүүдэд “Админерал” ХХК-тай холбоотой хэргийн мөрдөн байцаалтын нууцыг задруулсан талаар УИХ-ын гишүүн Б.Баярбаатар сэтгүүлчдэд ярилцлага өгөхдөө илчлэв. Ц.Нямдорж МАН дахь наяад оныхныг талдаа татаж, тархи угаалт хийгээд зогсохгүй “Б.Энхбаярыг намаас хөөхгүй юугаа хийцгээгээд байгаа юм бэ” гэж уурласан тухай Б.Баярбаатар гишүүн ярилаа. Ц.Нямдорж, Б.Энхбаяр хоёр ХЗДХЯ-ыг удирдаж байх үедээ л түнжин муутай байсан. “Твиттерт янз бүрийн юм жиргээд байна” гэх үндэслэлээр Б.Энхбаярыг дэд сайдаас чөлөөлсөн хүн нь Ц.Нямдорж. Тэгэхээр “Б.Энхбаярыг намаас хөө” гэх нь тодорхой. Харин Ц.Нямдорж “Админерал” ХХК-тай холбоотой хэргийн мөрдөн байцаалтын нууцыг яаж задруулсан тухайд Б.Баярбаатар “Б.Энхбаяр “УИХ-ын дарга Д.Амарбаясгалан хүн амины хэрэгтэй холбоотой байж магадгүй” гээд жигтэйхэн чухал царай гаргаад ярьсан биз дээ. Тэгсэн чинь Ц.Нямдорж гуай Бага хурал дээр хэргийн талаар дэлгэрэнгүй мэдээлэл өгсөн. “Ямар ч холбоогүй юм байна” гээд Бага хурлын 400 гаруй гишүүн суусан танхимд мэдээлсэн. Ц.Нямдорж гуай аливаад ултай суурьтай ханддаг. Маш ууртай байна лээ” гэж ам алдлаа. Үүний хариуд УИХ-ын гишүүн Б.Энхбаяр “Ц.Нямдорж мөрдөн байцаалтын нууц задруулсан гэмт хэрэг үйлдсэнээ нотолж байгаа юм уу. Ц.Нямдорж гэмт хэргийн хавтаст хэрэгтэй танилцдаг этгээд мөн үү. Хэрэв танилцсан бөгөөд нотолж байгаа бол энэ нь таван жилийн хорих ялтай гэмт хэрэг” гэлээ. Б.Баярбаатар гишүүний хэлснээс харвал, Ц.Нямдорж мөрдөн байцаалтын нууц задруулсан хэргээр буруутаж магадгүй болжээ. Тэрбээр Хууль зүй, дотоод хэргийн сайд байхдаа “Цензургүй яриа” нэвтрүүлэгт оролцох үеэрээ гүйцэтгэх ажилтны нэрийг хэлж “Нууц задруулсан” гэгдэж байв. Гэвч ямар ч хариуцлага хүлээгээгүй.

Г.Анар