Монголын идлэг шонхор дэлхийн хамгийн үнэтэй шувуу болов

     Саудын Арабын Олон Улсын Шонхор ба Ан агнуурын үзэсгэлэнд Монголын хоёр шонхор нийт 900,000 саудын риал (ойролцоогоор 173,276 ам.доллар)-оор зарагдсан тухай Саудын хэвлэл мэдээллийн агентлаг (SPA) мэдээллээ.

Дуудлага худалдаанд оролцогчдын дунд ширүүн өрсөлдөөн өрнөж, Риядын хойд хэсэгт орших Malham дахь Үзэсгэлэн, Конвеншн төвд цугласан зочид идэвхтэй оролцов. Дуудлага худалдаагаар эхлээд насанд хүрсэн шонхрыг 200,000 риалаас дуудаж, 450,000 риалд хүрсэн байна. Дараа нь залуу шонхрыг танилцуулж, 100,000 риалаас эхэлсэн үнэ 450,000 риалд хүрчээ.

Энэ удаагийн үзэсгэлэнгийн үеэр анх удаа Монголын шонхорт зориулан тусгай павильон байгуулсан нь онцлог байлаа. Саудын Араб болон бүс нутгийн шонхор сонирхогчдын дунд Монголын шонхор нь өндөр чанар, тансаг үнэ цэнээрээ нэр хүндтэйд тооцогддог. Тусгай павильонд Монгол болон Зүүн Азийн шонхор шувуудыг танилцуулсан байна.

Монголын шонхор нь том биетэй, өргөн далавчтай, тэсвэр хатуужилтай гэдгээрээ онцлог бөгөөд өнгөний хувьд цайвар цагаанаас хар хүрэн гээд олон янзын хувилбартай байдгаараа үнэд хүрдэг байна. Энэ шинж чанарууд нь шонхрын спортод онцгой давуу тал олгодог бөгөөд хатуу ширүүн нөхцөлийг даах чадвар, сургалтад хурдан дасдаг чанараараа сонирхогч болон мэргэжлийн анчдын сонирхлын дунд эрэлт өндөр байдаг байна.