Д.Амарбаясгалан: Гүтгэлгийн хамгийн том хохирогч нь миний бие. Нэг хүрз нүүрс олборлоогүй байхад нүүрсний хулгай хийсэн мэтээр олон нийтэд ойлгуулсан

       Засгийн газрыг огцруулах асуудлыг УИХ-ын Төрийн байгуулалтын байнгын хорооны хуралдаанаар ид хэлэлцэж байна.

 УИХ-ын гишүүдийн зүгээс Ерөнхий сайд Г.Занданшатарыг намын даргын өрсөлдөөнд бус эдийн засагтаа анхаарсан бол огцруулах хэмжээнд хүрэхгүй байсан хэмээн шүүмжилж байгаа юм. Харин Ерөнхий сайд “эдийн засгийн бүх асуудал нүүрстэй холбогддог” гэж тайлбарлаж байна.

Хуралдааны үеэр нүүрсний гэх асуудалд УИХ-ын дарга Д.Амарбаясгалан хамааралгүй болохоо баримттайгаар тайлбарласан юм.

Тэрбээр “ҮАБЗ-ийн зөвлөмжөөр гэрээ хийх эрхийг нь олгосон олон их наяд төгрөгийн нүүрсний гэрээтэй холбоотой асуудлууд яригдаж байгаад талархаж байна. 2022 оны нүүрсний сонсгол яг ингэж эхэлж байсан. Харамсалтай нь оффтейк гэрээнүүдийг бүгдийг нь нуугаад өнгөн дээр нь өөр хүмүүсийг нүүрсний хулгайч гэж зарлаж нийгэмд гүжирдэж гүтгэсэн. Тэрний хамгийн том хохирогч нь миний бие. Нэг хүрз нүүрс олборлоогүй байхад нүүрсний хулгай хийсэн мэтээр олон нийтэд ойлгуулсан. Өнөөдөр харин оффтейк гэрээнүүд яаж хийгдэж, хэн хариуцаж байсан бэ гэдэг нь цаг хугацаатайгаа гарч ирж байгаад баяртай байна. Оффтейк гэрээнүүд бүгд 2021.06.23-ны өдрөөс өмнө хийгдсэн. Би ЗГХЭГ-ын даргаар 2022 оны есдүгээр сараас эхэлж ажилласан. Тэр үеэс эмх замбараагүй байсан гэрээнүүдийг цэгцлэх, Биржийн тухай хуулийг хэрэгжүүлэх чиглэлээр Ч.Хүрэлбаатар сайд, Ж.Ганбаатар сайд нарын хамтаар ажиллаж байсан. Олон хүний эрх ашиг хөндөгдсөний улмаас өөрийг маань нүүрсчин болгож зарлах ажил хийгдсэн гэдгийг хариуцлагатайгаар хэлье” гэсэн юм.

УИХ-ын дарга үргэлжлүүлэн “Нүүрстэй холбоотой асуудлыг маш тодорхой болгох ёстой. Сэжүүрүүдийг уг эзэн дээр нь очих хүртэл нь УИХ сонсгол зохион байгуулах ёстой. Сүүлдээ хэвлэлээр нүүрсний хулгайд холбогдсон мэтээр гүтгэж байгаад огцруулах асуудлыг хүртэл тавьдаг болсон. Монгол Улсын Үндсэн хуулиар олгогдсон эрхээ эдлэх боломжоор хязгаарлах алхмыг хүртэл хийж байна. Энэ бол улстөрийн дарамт. Маш олон гишүүдийг ингэж дарамталж байна” хэмээн байр сууриа илэрхийллээ.