Б.Энхбаяр: Л.Оюун-Эрдэнийн Засгийн газрын шийдвэрээр “Эрдэнэс Оюутолгой” ХХК гадаадын компанитай 1.9 сая ам.доллараар гэрээ хийж, “Монгол хаан” жүжгийн гадаад сурталчилгааг хийсэн нь баримтаар тогтоогдсон

  УИХ-ын гишүүн Б.Энхбаярыг Ерөнхий сайд Г.Занданшатар Хууль зүй, дотоод хэргийн сайдаар томилохоо мэдэгдсэн ч энэ асуудал парламент дээр гацаанд орсон. Б.Энхбаярын зүгээс “Хууль зүй, дотоод хэргийн сайдаар томилогдсоныхоо дараа улс төрийн мэдэгдэл хийнэ” гэж хоёр ч удаа мэдэгдсэн. Г.Занданшатар Б.Энхбаярыг сайдаар томилох болсноо танилцуулах хүсэлтээ УИХ-д илгээсэн ч П.Сайнзориг, Ц.Сандаг-Очир тэргүүтэй гишүүд Ерөнхий сайдаас огцруулах санал гаргаж, өчигдөр (2025.10.01) Төрийн байгуулалтын байнгын хороо хэлэлцэж эхэлсэн ч ирэх даваа гараг хүртэл завсарласан. Тэгвэл УИХ-ын гишүүн Б.Энхбаярын өнөөдөр Ерөнхий сайд асан Л.Оюун-Эрдэнэ, ССАЖЗ-ын сайд асан Ч.Номин, “Хэро энтертайнмент”-ийн Б.Баатарын найруулж, өдгөө Японд тоглож буй “Монгол хаан” жүжгийн санхүүжилттэй холбоотой баримтуудыг олон нийтийн сүлжээнд дэлгэлээ. Тэрбээр “Баримт ялна. Би “Ажлаа авсныхаа дараа улс төрийн мэдэгдэл хийнэ” гэдгээ өмнө нь хэлсэн. Улс төрийн нөхцөл байдал “халж” үнэн, худал нь мэдэгдэхгүй олон асуудал, мэдээлэл ойрын өдрүүдэд хөвөрсөн тул мэдэгдэлдээ хөндөхөөр бэлтгэж байсан зарим асуудлыг нотлох баримттайгаар дэлгэж байна. Д.Амарбаясгалантай холбоотой гэх “Админерал” компанитай холбоотой мэдээлэл гадаадын нэр бүхий сайтад 2023 оны есдүгээр сард(Нүүрсний сонсгол болохоос гурван сарын өмнө) нийтлэгдсэн байдаг. Монгол Улсын дотоод улс төрийн мэдээллүүд сүүлийн 2-3 жилд гадаадын хэвлэл мэдээллийн байгууллагуудад их гардаг, гадаад сурталчилгааны давтамж өндөр болсныг та бүхэн мэднэ. Үүний зардал мөнгө харин хаанаас санхүүждэг байсныг хэн ч мэддэггүй. Тэгвэл Монголын ард түмний өмч болсон төрийн өмчийн компанаас НУУЦ гэрээ хийгдэж энэ бүх ПР, сурталчилгаа хийгддэг байсан нь дараахь баримтаар нотлогдоно.

Нэг. “Эрдэнэс-Оюутолгой” компани нь Л.Оюун-Эрдэнийн Засгийн газрын “шийдвэр”-ийн дагуу гэдэг нэрийдлээр гадаад улсын Atticus Partners Ltd болон Atticus communications Ltd компанитай 4 удаагийн үйлдлээр нийт 1.9 сая ам доллараар (7 орчим тэрбум төгрөг) гэрээ хийж “Дэлхийд Монголыг сурталчлах” гэсэн халхавчаар Монгол Улсын Ерөнхий сайд асан Л.Оюун-Эрдэнийн 50 хувь эзэмшдэг “Херо энтертайнмент” компанийн бүтээл “Монгол хаан” жүжгийн гадаад сурталчилгааг хийсэн нь баримтаар тогтоогдов.

Хоёр. Г.Занданшатарын тэргүүлсэн Засгийн газрын 2025 оны есдүгээр сарын 24-ний өдрийн хуралдаанаас дээрх гэрээ, тайлангуудыг нууцаас гаргах чиглэлийг “Эрдэнэс Оюутолгой” ХХК-ийн удирдлагад өгсөн бөгөөд Тагнуулын ерөнхий газраас хууль зөрчиж, нууцад авсан байна гэсэн дүгнэлт гарсан.

Жич: Доорх НУУЦ-ын тамгатай баримтууд нь Засгийн газрын шийдвэрээр нууцаас гарсан тул Төрийн болон албаны нууцын тухай хуулийн зөрчил одоо байхгүй болно” гэлээ.

Г.Анар