У.Хүрэлсүх Я.Содбаатарыг заамдаж, А.Үйлстөгөлдөр Д.Амарбаясгалангийн талд үйлчилсэн гэв үү

   МАН-ын Бага хурал өнгөрсөн сарын 27-нд хуралдаж, УИХ-ын дарга Д.Амарбаясгалан хоёр ч удаагийн санал хураалтаар ялж намын дарга болсон. Энэ бол Д.Амарбаясгалан, Л.Оюун-Эрдэнэ тэргүүтэй наяад оныхны ялалт байлаа. МАН-ын даргаар сонгогдсон Д.Амарбаясгаланг Улсын Дээд шүүх 60 хоногийн дотор бүртгэх хуультай. Эрх баригч хүчин дэх наяад оныхон ялалтаа тэмдэглэж, Тусгаар тогтнолын ордноор нэг алга ташилт нижигнүүлсэн ч энэ нь улс төр дэх тулааны дөнгөж эхний раунд л байв. Тэднийг өөрсдийнх нь хэлдэгчлэн “Ах нар” нь Төрийн ордонд ринг засчихсан хүлээж байсан юм. Нийслэл, дүүргүүд, орон нутгийн МАН-ынхан төдийгүй АН-аас бусад намын дарга нар Д.Амарбаясгаланд цахим ертөнцөөр нэг баяр хүргэж байх агшинд Их тэнгэрт юу болов...

Эрт урьдын цагт У.Хүрэлсүх, Д.Амарбаясгалан, Л.Оюун-Эрдэнэ гурав Их тэнгэрт ах дүүсийн ёсоор амар сайхан аж төрдөг байв. М.Энхболдын властийг түлхэн унагасан цагаас тэдний ноёрхол Монголын улс төрд тогтсон. У.Хүрэлсүх Ерөнхий сайдаас огцрох мэдэгдлээ хийж, Л.Оюун-Эрдэнэд тамгаа гардуулсан. Л.Оюун-Эрдэнэ 2004 оноос хойшхи Ерөнхий сайд нарын дунд хамгийн олон жил буюу таван жил Засгийн газрыг тэргүүлсэн. Энэ бол У.Хүрэлсүх, Х.Баттулга нарын хамтын хүч, оролцоо, нөлөө. Харин У.Хүрэлсүх, Х.Баттулга гэсэн блок задрахын цагт Л.Оюун-Эрдэнэ Х.Баттулга тэргүүтэй “15 давхар”-ын талд гарсан нь Их тэнгэрээс хөөгдөх нэг шалтгаан болсон юм. УИХ-ын дарга Д.Амарбаясгалан ч түүний араас нүүх цаг болжээ. Тиймээс тэд МАН дахь наяад оныхныг “Ах нар”-ынхаа эсрэг хөдөлгөв. МАН-ын Бага хурал дээр наяад оныхон нэгдмэл байж, Тусгаар тогтнолын ордны дотор, гадна идэвхтэй ажилласаар Д.Амарбаясгаланг намын даргаар сонгосон. Г.Занданшатарын Засгийн газрын сайд нараас хоёр талд ажиллаж, хонжоо хайсан хүмүүсийн нэг нь Эрчим хүчний сайд Б.Чойжилсүрэн. Тэрбээр эхний санал хураалтад Г.Занданшатарт саналаа өгсөн бол хоёр дахь санал хураалтын үеэр Увсынхнаа багцалж Д.Амарбаясгаланд санал өгүүлжээ. Наяад оныхон энэ мэтээр адтай ажиллаж байхад У.Хүрэлсүхийн найдвар болсон генсек Я.Содбаатар өнгөн дээрээ идэвхгүй төлөвтэй мэт байсан ч “хөшиг”-ний ард Х.Баттулгад үйлчилсэн тухай яриа улс төрийн хүрээнд бий. “Ах Я.Сод-Эрдэнэ нь Хөгжлийн банкны хэргээс мултарч, “Эрдэнэт үйлдвэр” хавиар ашиг сонирхлоо эргэлдүүлж байгаа” гэгддэг Я.Содбаатар Х.Баттулгад яагаад үйлчлэх болов! УИХ-ын гишүүн З.Мэндсайхантай хамт Арцатын аманд орон сууцны хотхон барьж байгаа гэх Я.Содбаатар улс төрд төдийгөөс өдий хүртэл нөхөрлөж, албан тушаал дэвших замыг нь зассан У.Хүрэлсүхийнхээ итгэлийг ийнхүү алдсан бололтой. Тиймээс МАН-ын Бага хурлын шийдвэрийг сонсож, наяад оныхон Д.Амарбаясгалангийн зүг алга ташихыг харсан Ерөнхийлөгч У.Хүрэлсүх Я.Содбаатарыг хүмүүсийн дэргэд заамдаж авсан тухай мэдээлэл дуулдана. У.Хүрэлсүхийн дургүйг хүргэсэн өөр нэгэн хүн бол Ерөнхийлөгчийн Тамгын газрын дарга А.Үйлстөгөлдөр. “Мөнхийн рэп” хамтлагийн Үйлсээ, FM хөтлөгч Үйлсээ хэмээн үеийнхээ залууст танил болсон тэрбээр нэг хэсэг Д.Амарбаясгалангийн цай, кофе зөөгч байсан. Удалгүй У.Хүрэлсүхийн ивээлд багтаж Я.Содбаатараас Ерөнхийлөгчийн Тамгын газрын даргын албан тушаалыг хүлээж авсан. МАН-ынхны үе хоорондын тулаан төр орших уу, эс орших уу дээр тулаад буй энэ эгзэгтэй үед тэрбээр “Элэг нь хаа юм бэ” гэсэн үү Д.Амарбаясгаланг дэмжиж гүйж байгаад “Ах нар”-таа баригдсан сурагтай. Өөр “юм” ч дуулдаж байна. Г.Занданшатар, Д.Амарбаясгалан нар МАН-ын даргын суудлын төлөөх тулаанаа УИХ-ын дарга огцрох уу, Ерөнхий сайдыг унагах уу болгосон энэ үед Ерөнхийлөгчийн институци хавиар цагийн байдал ийм байгаа аж.

С.Тулга