Б.Энхбаяр ирэх баасан гарагт ХЗДХ-ийн сайдын ажилдаа орно

     Ерөнхий сайд Г.Занданшатар “Би бүрэн эрхийнхээ хүрээнд Б.Энхбаярыг Хууль зүй, дотоод хэргийн сайдаар томилж байна” гэж мэдэгдсэн. Тэрбээр сайд томилох асуудлаа 2025 оны аравдугаар сарын 02-нд танилцуулах хүсэлтээ УИХ-д хүргүүлсэн ч Үндсэн хуулийн 39.4 дэх хэсэгт заасан бүрэн эрхээ хэрэгжүүлэх нөхцөлийг нь бүрдүүлээгүй. Харин ирэх баасан гарагт буюу аравдугаар сарын 17-нд чуулганы нэгдсэн хуралдаанаар хэлэлцэх асуудлын дараалалд багтаажээ. Өөрөөр хэлбэл, Ерөнхий сайд Г.Занданшатар Б.Энхбаярыг Хууль зүй, дотоод хэргийн сайдаар томилох тухайгаа танилцуулж, Б.Энхбаяр тангаргаа өргөснөөр сайдын ажилдаа орно.

УИХ-ын гишүүн Б.Энхбаяр “Сайдын ажлаа авмагц улс төрийн мэдэгдэл хийнэ” гэж хоёр удаа мэдэгдсэн. Тэрбээр телевизэд ярилцлага өгөхдөө УИХ-ын дарга Д.Амарбаясгалан болон “Админерал” ХХК-тай холбоотой ноцтой зүйлсийг ярьж, Ерөнхий сайд асан Л.Оюун-Эрдэнэ 50 хувийг нь эзэмшдэг “Хэро энтертайнмент”-ийн оффис буюу “15 давхар”-ыг дээрэмдэж авсан тухай ярьсан юм. Үүнийхээ дараа “АТГ-т гэрчийн мэдүүлэг өглөө” гэж байв. Б.Энхбаяр өнгөрсөн бямба гарагт (2025.10.11) “Улс төрийн мэдэгдэлдээ хөндөхөөр бэлтгэж байсан зарим асуудлыг нотлох баримттайгаар дэлгэж байна. Монголын ард түмний өмч болсон төрийн өмчийн компаниас НУУЦ гэрээ хийгдэж, энэ бүх ПР, сурталчилгааг хийдэг байсан нь дараахь баримтаар нотлогдоно. “Эрдэнэс Оюутолгой” компани Л.Оюун-Эрдэнийн Засгийн газрын шийдвэрийн дагуу гэдэг нэрийдлээр гадаадын Atticus partners Ltd болон Atticus communications Ltd компанитай дөрвөн удаагийн үйлдлээр нийт 1.9 сая ам.доллараар гэрээ хийж, “Дэлхийд Монголыг сурталчлах” гэсэн халхавчаар Л.Оюун-Эрдэнийн 50 хувь эзэмшдэг “Хэро энтертайнмент”-ийн бүтээл “Монгол хаан” жүжгийн гадаад сурталчилгааг хийсэн нь баримтаар тогтоогдов” гэж цахим хуудсаараа мэдээлсэн юм.

Г.Анар