“Гэрэгэ тауэр”-ийн эзэн Н.Цэрэнбатын үед “Эрдэнэс Оюутолгой” ХХК-аас Atticus Partners Ltd руу 1.9 сая ам.доллар шилжүүлсэн нь ашиг сонирхлын зөрчил биш үү

       УИХ-ын гишүүн Б.Энхбаяр, ССАЖЗ-ын сайд асан Ч.Номин, “Хэро энтертайнмент”-ийн Б.Баатар нар баримт, мэдэгдэл, няцаалтаар сошиалд дайтаж байх зуур “Эрдэнэс Оюутолгой” ХХК-ийн гүйцэтгэх захирал асан Н.Цэрэнбат Төрийн ордонд сэтгүүлчдэд баригдав. Л.Оюун-Эрдэнийн Засгийн газар 2021 оны арваннэгдүгээр сарын 10-нд “Рио Тинто” компаниас орж ирэх 20 сая ам.долларыг юунд зарцуулах тухай шийдвэр гаргасан. Харин маргааш нь “Оюутолгой” компанийн ТУЗ гүний уурхайн бүтээн байгуулалтын төслийн хяналтыг сайжруулах тухай тогтоол баталсан. Энэ тогтоолоор тус компаниас “Эрдэнэс Оюутолгой” компанид 20 сая ам.доллар олгосугай” гэсэн шийдвэр гаргасан тухай Б.Энхбаяр гишүүн өчигдөр (2025.10.15) сэтгүүлчдэд мэдээллээ. Тэр ч атугай “Энэ бол төрийн нууц биш, албаны нууц. “Эрдэнэс Оюутолгой” ХХК тагнуулын байгууллагын саналыг авалгүйгээр албаны нууцад авч хууль зөрчсөн. “Рио Тинто”-оос авсан 20 сая ам.доллараас 18 сая ам.долларыг нь зарцуулсан байна. Энэхүү 18 сая ам.доллараас 1.9 сая ам.долларын тухайд, Их Британид бүртгэлтэй, дөнгөж байгуулагдсан, хоёр гишүүнтэй, “Эрдэнэс Оюутолгой”-н гэрээнээс өөр ажил гүйцэтгээгүй, Л.Оюун-Эрдэнэ, Ч.Номингийн гадаад айлчлал, тэдний Wikipedia-г янзалж өгсөн, “Монгол хаан” жүжгийн гадаад сурталчилгааг хийсэн гэсэн тайлан ирүүлсэн. Гэрээ байгуулсан компаниас ирүүлсэн тайланд дурдсан мэдээллийг би ил болгосон. Үүнтэй холбоотой маш олон асуудал шалгагдана” гээд тухайн үеийн Засгийн газрын хуралдааны тэмдэглэл, “Оюутолгой”-н ТУЗ-ийн тогтоолыг хэвлэлийнхэнд харуулав. Харин “Эрдэнэс Оюутолгой” ХХК-ийн гүйцэтгэх захирал асан Н.Цэрэнбат өчигдөр сэтгүүлчдэд “Баримтууд нь нууцын зэрэглэлээс гараагүй учраас дэлгэрэнгүй ярьж болохгүй. Өнөөдрийнхөөр биш, тухайн цаг үеийнхээр дүгнэж Засгийн газрын тэмдэглэл нууцаас гарсан” гэх ойлгомжгүй тайлбар өглөө. Түүний ярианаас анхаарал татсан нь “Компани дур мэдэж нууцад авсан юм байхгүй. “Оюутолгой”-н ТУЗ-ийн 174 дүгээр тогтоолоор “Эрдэнэс Оюутолгой” ХХК-ийг чадавхижуулах, төслийн үйл ажиллагаанд хяналт тавих тогтоол гарч, гэрээний дагуу ажил гүйцэтгэн 18 сая ам.долларын төлбөрийг авсан. Энэ мөнгийг “Эрдэнэс Оюутолгой”-н үндсэн үйл ажиллагаанд зарцуулсан. Зөвхөн нэг жүжгийг санхүүжүүлээгүй. Оюутолгойн өрийг тэглэхтэй холбоотойгоор гадаад, дотоодын зөвлөх үйлчилгээний компаниудтай гэрээ хийсэн. Б.Энхбаярын ярьсан асуудлыг тус компанийн одоогийн удирдлагуудаас тодруулсан. Нууцаас гаргасан тухай бичиг албан ёсоор ирээгүй юм билээ” гэх хариулт. Н.Цэрэнбат “Эрдэнэс Оюутолгой” ХХК-ийн гүйцэтгэх захирал байхдаа өдгөө дуулианы сэдэв болоод буй асуудлыг албаны нууцын зэрэглэлд дур мэдэн оруулаагүй юм бол түүнд хэн чиглэл өгсөн байж таарах вэ. Ерөнхий сайд асан Л.Оюун-Эрдэнэ үү, “Оюутолгой” компанийн ТУЗ уу гэдэг асуулт гарч ирж байна. Н.Цэрэнбат 2021 оны аравдугаар сард “Эрдэнэс Оюутолгой” ХХК-ийн гүйцэтгэх захирлаар томилогдсон бол 2022 оны арваннэгдүгээр сард “Оюутолгой” ХХК-ийн ТУЗ-ийн гишүүн болсон. Цаг хугацааны хувьд, “Рио Тинто”-оос 20 сая ам.доллар Монголд орж ирэхээс нэг сарын өмнө “Эрдэнэс Оюутолгой”-н гүйцэтгэх захирал болсон гэсэн үг. Тэрбээр өчигдөр Төрийн ордонд сэтгүүлчдийн асуултнаас “Мэдэхгүй, нууцаас гараагүй учраас ярьж болохгүй, тэр чинь шал өөр юм” гэж аргацаасаар бултлаа.

“Эрдэнэс Оюутолгой” ХХК-ийн гүйцэтгэх захирал асан Н.Цэрэнбат “Хэро энтертайнмент”-ийнхан оффисолдог “Гэрэгэ тауэр”-ийн жинхэнэ эзэн. Х.Баттулгын “Баянгол” зочид буудлын урдхан талд оршдог энэхүү барилгыг Н.Цэрэнбат, МҮХАҮТ-ын ерөнхийлөгч асан О.Амартүвшин нарын хувь эзэмшдэг “Герман стандарт” компани барьжээ. УИХ-ын гишүүн Б.Энхбаяр телевизэд өгсөн ярилцлагадаа “Ерөнхий сайд асан Л.Оюун-Эрдэнэ 50 хувийг нь эзэмшдэг “Хэро энтертайнмент”-ийн оффис болох 15 давхрыг дээрэмдэж авсан” гэх ноцтой мэдээллийг дурдсан. Энэхүү ярилцлагын дараа О.Амартүвшин “Бид ярьж хөөрөөд л худалдсан. Тухайн үед ам.долларын ханш 1200 төгрөг байсан гэхээр хэн хэндээ боломжийн хэлцэл байсан. Дараа нь дахиад нэг давхрыг нэмж авахаар болоход мөн л тохироод авч өгөлцсөн. Ямар нэгэн дарамт шахалт огт байхгүй” гэсэн бол МҮХАҮТ-ийн Ерөнхийлөгчид нэр дэвших үеэрээ хуулийнханд саатуулагдаж байсан Т.Дүүрэн “14 давхрыг нь Н.Цэрэнбат, О.Амартүвшин нар хууль бусаар өгч авалцаж, үүнийгээ надаар хөөцөлдүүлээд үр дүнд нь барьж хорьсон. “Үүнийг ил гаргахгүй” гэдэг тохироогоор, найз нараас өгсөн чиглэлийнх нь дагуу өөр хэрэг хүлээж суллагдсан. Найз нөхөд минь дээгүүрээ тохироо хийн намайг дахин золигт гаргаж байгаа аж” хэмээн маш далд утга бүхий мэдээллийг постолсон юм. Т.Дүүрэнгийн сошиал хуудаснаа бичсэнчлэн түүнд чиглэл өгч, өөр хэрэг хүлээлгэн сулласан хүмүүс хэн байв, дээгүүрээ тохироо хийсэн гэдэг нь бас ямар хүмүүс вэ гэдэг олон асуулт гарч ирсэн ч тэрбээр энэ тухай дахин бичээгүй. Н.Цэрэнбат МАН-ын гишүүн, Л.Оюун-Эрдэнийн Засгийн газрын үед “Эрдэнэс Оюутолгой” ХХК-ийн гүйцэтгэх захирлаар томилогдсон, “Гэрэгэ тауэр”-ийг барьсан компанийн хувь эзэмшигчийн хувьд Л.Оюун-Эрдэнэ, Б.Баатар нартай ашиг сонирхлын ямар холбоотой вэ гэдэг нь сонирхол татна. Ерөнхий сайд Г.Занданшатар өчигдөр (2025.10.15) “Зориулалтын бусаар мөнгө зарцуулсан” гэх “Эрдэнэс Оюутолгой” ХХК-д санхүүгийн тусгай аудит оруулах үүргийг Эдийн засаг, хөгжлийн сайд Н.Учралд өгчээ. Н.Учрал сайдын медиа багаас сошиалд түгээсэн постод “Зориулалтын бусаар мөнгө зарцуулсан” гэж онцолсноос харахад “Эрдэнэс Оюутолгой” ХХК-аас “Монгол хаан” жүжгийн гадаад сурталчилгаанд зориулж, Atticus Partners Ltd руу 1.9 сая ам.доллар шилжүүлснийг хэлэв үү гэхээр байна. Б.Энхбаярын мэдээлж байгаагаар, Н.Цэрэнбатын үед “Эрдэнэс Оюутолгой” ХХК Б.Баатарын найруулсан “Монгол хаан” жүжгийн гадаад сурталчилгаанд дээрх мөнгийг зарцуулсан бол энэ нь ашиг сонирхлын зөрчил биш үү. Н.Цэрэнбат “Гэрэгэ тауэр”-ийн эзэн, Б.Баатарын “Хэро энтертайнмент” энэ барилгын 14, 15 давхарт байрладгийг хүмүүс мэддэг болсон.   

С.Тулга