Б.Оюунбилэг: Ц.Чулуунзагдын гэр, ажлын байрнаас хэн нэгний гарын үсгийн дардас олдоогүй

      МАН-ын нарийн бичгийн дарга Ц.Чулуунзагдыг АТГ-ынхан өнгөрсөн сард саатуулсан. Түүнийг хорих хугацааг дахин 30 хоногоор сунгасан юм. УИХ-ын гишүүн Б.Энхбаяр “Админерал” ХХК-тай холбоотой ноцтой мэдээллийг өгсөн нь олон нийтийн анхаарлыг ихээхэн татсан. Харин Ц:Чулуунзагдын өмгөөлөгч Б.Оюунбилэг өчигдөр (2025.10.15) Б.Энхбаяр гишүүнд мэдэгдэл, хүсэлт илгээжээ. Тэрбээр “АТГ мэргэжлийн хараат бус үйл ажиллагаа явуулдаг. Мөрдөн шалгах ажиллагаа, түүнд хамаарах нууцад төрийн өндөр албан тушаалтан хэн ч бай хөндлөнгөөс нөлөөлөх, оролцохыг хатуу хориглосон хуулийн заалт бий. УИХ-ын гишүүн Б.Энхбаяр хэргийн материалтай танилцсан талаарх мэдээлэл одоогоор байхгүй болно. Б.Энхбаяр хэргийн оролцогч биш. АТГ-аас Ц.Чулуунзагдын гэр, ажлын байранд нэгжлэг хийх үеэр хурааж авсан эд зүйлд нотлох баримтын үзлэг хийхэд өмгөөлөгч Ж.Эрхэмбаатар байлцсаны хувьд Ц.Чулуунзагдын гэр, ажлын байрнаас ямар нэгэн гарын үсгийн дардас олдоогүйг урьд мэдэгдэлд дурдсан болно. Аливаа банк, санхүүгийн байгууллага нь иргэний харьяалал үл хамааран хувь хүний гарын үсгийн дардсаар гүйлгээ хийдэггүй. Нас барсан хүний гарын үсгийн дардсыг ашиглаж, аливаа нэгэн гүйлгээ хийх боломжгүй. Дардас нь ямар нэгэн хууль зүйн үр дагавар үүсгэдэггүй болохыг Б.Энхбаяр гишүүн та мэдвэл зохилтой. Иймд үйлчлүүлэгчийнхээ эрхийг хамгаалах хуулиар хүлээсэн үүргийн дагуу Б.Энхбаяр танд худал хуурмаг үйл ажиллагаагаа нэн даруй зогсоохыг хүсэж, миний үйлчлүүлэгч Ц.Чулуунзагдаас хэвлэл мэдээллийн хэрэгслээр дамжуулан уучлалт гуйна гэдэгт итгэж байна” гэжээ.

Д.Од