Л.Оюун-Эрдэнэ: Atticus Partners-тай холбоотой мэдээлэл ор тас худлаа. Б.Энхбаярыг шүүхэд өгнө

    УИХ-ын гишүүн Б.Энхбаяр “Эрдэнэс Оюутолгой” ХХК-аас Л.Оюун-Эрдэнийн 50 хувь эзэмшдэг “Хэро энтертайнмент”-ийн бүтээл “Монгол хаан” жүжгийн гадаад сурталчилгаанд зориулж Их Британийн Atticus Partners Ltd руу 1.9 сая ам.доллар шилжүүлсэн. Тагнуулын байгууллагад мэдэгдэлгүйгээр албаны нууцад авч, хууль зөрчсөн” хэмээн Л.Оюун-Эрдэнийн Засгийн газрын үеийн 2021 оны арваннэгдүгээр сарын 10-ны хуралдааны тэмдэглэл, түүний маргааш “Оюутолгой” ХХК-ийн ТУЗ-ийн баталсан тогтоол гэж сэтгүүлчдэд харуулсан. Харин өнөөдөр (2025.10.17) Ерөнхий сайд асан Л.Оюун-Эрдэнэ хэвлэлийнхэнд “Atticus Partners Ltd-тэй холбоотой мэдээлэл ор тас худлаа. Б.Энхбаярыг шүүхэд өгч байгаа. Оюутолгойн 2.3 тэрбум ам.долларын өрийг бид тэглүүлсэн. Түүнтэй холбоотойгоор зөвлөх хэд хэдэн үйлчилгээ авсан. “Оюутолгой” ХХК-ийнхан үүнийг өөрсдөө шийдсэн. Зарим нь нууц, зарим нь ил гэрээ байгаа. “Монгол хаан” жүжигт төрөөс нэг ч төгрөг аваагүй нь ойлгомжтой. Atticus Partners Ltd-ийн тайланг авч үзсэн. “Монгол хаан” жүжиг гоё боллоо” гэж манайхан шуурдаг шүү дээ. Тийм постерийг нь аваад хэвлэчихсэн юм билээ. Хэд хэдэн байгууллага шүүхэд өгч байгаа юм билээ. Намайг засаглаж байх хугацаанд Монгол Улсын дотоодын нийт бүтээгдэхүүн жилд мянга, мянган ам.доллараар нэмэгдсэн. Гашуунсухайт-Ганцмод чиглэлийн төмөр зам, “Орано”-ийн гэрээ, Эрдэнэбүрэнгийн усан цахилгаан станц зэрэг гацсан байсан бүх төсөл явсан. Эдгээр төслөө үргэлжлүүлэн явуулаасай. Хөрөнгө оруулагчид үл итгэх зүйл битгий болоосой. Д.Амарбаясгалангийн талаар би худал гүтгэлэг нийтлүүлнэ гэж юу байх вэ дээ. Хүнийг хүн амины хэрэгт хүртэл хамаагүй гүтгэдэг болсон байна. Хуудас цаас харуулаад “Ингэсэн байна” гэдэг бол ноцтой асуудал. “Хэвлэлийнхэнтэй уулзана” гэж бодож байгаа. Ер нь би ташаа мэдээллүүдийг тоож байгаагүй. Утасдаж, гоншигоносон удаагүй. Харин одоо үнэн зөвийг тогтоолгох хэрэгтэй гэж бодож байна. Тийм учраас шүүхэд хандаж байгаа. “Бодь интернэшнл” ХХК-ийн гэрээнүүдийг ил болгоё” гэж би нүүрсний сонсгол хийлгэсэн. Ил болгохыг байнга л шаардаж байгаа. Сая би Төрийн байгуулалтын байнгын хороон дээр хэлсэн. “Нууцад авна гэдэг нь Тендерийн хуулийг алгасаж хийдэг үйл явц байдаг. Дахиж ийм зүйл гаргаж болохгүй” гэж. “Бодь интернэшнл”-тэй холбоотой гэрээнүүдийг ил болгох ёстой. ҮАБЗ нууцад авч, том хэмжээний ажлуудыг Засгийн газрын урдуур орж хийж болохгүй. Харбиний гэрээнд нууц зүйл огт байхгүй. “Хоёр улсын Засгийн газрын гэрээ учир аль нэг талд урьдчилж мэдэгдэхгүйгээр гурав дахь этгээдэд задруулж болохгүй” гэсэн ёс зүйн асуудал байгаа болохоос биш нууцлаад байх юмгүй. Энэ гэрээг буруу тайлбарлаж байна. Манайх нүүрсийг биржээр зардаг нэг үнэтэй. Энэ нь Баяннуур дээрх замбараагүй худалдан авалтыг зохицуулах агуулгатай. Дээр нь манай улс урт хугацаагаар хийдэг бас нэг үнэтэй. “Чалко”-оос эхлээд тав, зургаан компани ийм үнээр явж байгаа. Үүнийг дордуулахгүйгээр өнгөрсөн хугацааны алдагдлаа бид нэхэмжилье” гэдэг шаардлагыг Хятадын талд тавьсан. Та нар Хятадын ЭСЯ-аас асуугаарай. Тус улсын төрийн өмчит компаниуд ингэж урт хугацааны гэрээ хийдэг. “Эх орны хишиг” 1.5 сая, “Эрдэнийн хувь” нэг сая төгрөг ард иргэдэд өгнө” гэх амлаад “Чайна энержи” компанийг мурьж, “Чалко” компаниас урьдчилгаа авсан. Ингээд бүх иргэнд тараасан. Та бүхэн тэр бүхнийг үзвэл маш энгийн ойлгомжтой асуудал. Сая “Чайна энержи”-тэй хийсэн гэрээгээр Тавантолгойн лиценз, оператор эрхийг 30, 30 жилээр ашиглах эрхээс татгалзуулж чадсан. MCS-ийг үүнээс гаргаж, хоёр улсын Засгийн газрын гэрээ болгож чадсан. Ийм л хоёр өөрчлөлт оруулсан. Бусад нь урт хугацааны гэрээтэй яг адилхан” гэсэн хариулт өглөө.

С.Тулга