Луврын музейгээс Францын хатдын титэм, энгэрийн зүүлт зэрэг найман үнэт эдлэл алдагджээ

     Францын алдарт Луврын музейд өчигдөр өглөө хулгай дээрмийн гэмт хэрэг гарлаа. Хэргийн газраас зугтсан гэмт этгээдүүдийг эрэн сурвалжилж байна. Уг хулгай дээрмийн үеэр музейд хадгалагдаж байсан Францын хатдын эдэлж хэрэглэж байсан энгэрийн зүүлт, титэм, ээмэг зүүлт зэрэг алмаз эрдэнэ болон бусад үнэт чулуугаар чимэглэсэн үнэт эдлэлүүд алдагджээ.

Нийт найман үнэт эдлэл хулгайлагдсан. Үүнд Наполеон Бонапартын эхнэр хатан Мари-Луизын хүзүүний зүүлт, ээмэг, III Наполеон хааны хатан Эженийн титэм, хатан Мари-Амелигийн хүзүүний зүүлт, ээмэг зэрэг XIX зууны Францын хатдын эдэлж хэрэглэж байсан үнэт эдлэлүүдийг хулгайлсан байна. Хатан Эженийн титэм хэргийн газраас холгүй эргэн олдсон нь дээрэмчид зугтах замдаа санамсаргүй алдаж унагаасан байх гэж таамаглаж байна.

Уг гэмт хэргийг дөрвөн этгээд үйлдсэн гэж үзэж байна. Тэд ердөө долоон минутад зорилгоо гүйцэлдүүлснээс харахад урьдчилан сайтар төлөвлөсөн, мэргэжлийн этгээдүүдийн хийсэн хулгай гэж Францын соёлын сайд Рачида Дати ярьсан байна.

Гэмт этгээдүүд орон нутгийн цагаар ням гаргийн өглөө 09:30-09:40 цагийн хооронд хэрэг үйлджээ. Тэд Луврын музейн Аполло Галерейн хэсэгт хадгалагдаж байсан үнэт эдлэлүүдийг хулгайлахдаа цонхон доор сунадаг шаттай тээврийн хэрэгслийг урьдчилан байрлуулсан байжээ. Хулгай хийхдээ сунадаг шатаар галерейн хоёр давхарт гарч, диск зүсэгчээр цонхыг зүсэж зай гаргасан байна. Хоёр нь дотогш нэвтэрч, галерейн танхимд хадгалагдаж байсан шилэн хоргыг хагалж дотор нь байсан үнэт эдлэлүүдийг хулгайлаад зугтжээ. Гэмт этгээдүүд хэргийн газраас цахилгаан скүтерээр зугтсан байна. Хяналтын камер ашиглаж гэмт этгээдүүдийг мөрдөж мөшгих, баривчлах ажил үргэлжилж байна.

Энэ үед музейн ажилтнууд, хамгаалалтын албаныхан зааврын дагуу ажилласан боловч тэднийг сүрдүүлж улмаар гэмт этгээдүүдийг зогсоож чадаагүй. Гэмт этгээдүүд зугтахдаа сунадаг шаттай машинаа шатаахыг оролдсон ч музейн ажилтан саад болж чаджээ.

Музейн дохиолол журмын дагуу дуугарч, аюулгүйн албаныхан музейн үзэгчдийг яаралтай нүүлгэн шилжүүлж аюулгүй байдлыг хамгаалсан гэж Дотоод хэргийн яамнаас мэдээлсэн байна.

Хэдийгээр үнэт эдлэлүүдийг алдсан боловч азаар нэг ч хүн эрүүл мэнд, амь насаараа хохироогүй үлджээ.

Хулгай гарсан хэсэг алдарт Мона Лиза хөрөг хадгалагддаг танхимаас хэдхэн алхмын зайтай байжээ. Энэ удаад гэмт этгээдүүд дэлхийд танигдсан үнэтэй уран зурагнуудыг хулгайлахыг сонголгүй, оронд нь алмаз зэрэг үнэт чулуугаар чимэглэсэн үнэт эдлэлүүдийг хулгайлсан байна.

Мэргэжилтнүүдийн үзэж байгаагаар уран зургуудыг дэлхий даяараа таних учир зарж борлуулах боломжгүй. Харин ээмэг, зүүлт, титэм зэрэг үнэт эдлэлүүдийг хэсэгчлэн худалдах, чулуунуудыг нь салгаж өндөр үнээр зарах боломжтой юм байна.

Луврын музейн хамгаалалт өчигдөр гарсан хулгай дээрмийн гэмт хэргийн үеэр найдвартай ажиллаж чадсан уу гэсэн асуултыг сэтгүүлчид тавьсан. Францын эрх баригчид энэ үеэр музейн хамгаалалт зохих журмын дагуу байсан, ямар нэг алдаа гаргаагүй гэж тайлбарлажээ.

Өмнө нь 1911 онд Луврын музейд томоохон хулгай гарч байсан нь одоо ч яригддаг. Тухайн үед Италийн музейн нэгэн ажилтан Мона Лизагийн хөрөг зураг бол Итали улсын өмч гэж үзээд Луврын музейн хананаас хөрөг зургийг хуулж аван хүрмэн дотроо нууж гарч байжээ. Алдагдсан зураг хоёр жилийн дараа олдож байсан юм. Үүний дараа Мона Лизагийн хамгаалалтыг сайжруулжээ.