Д.Амарбаясгаланг дэмждэг аймгуудын Засаг дарга нарыг АТГ намнаж эхэлсэн үү

       Эрх баригч МАН-ын их хурал ирэх сарын 15-нд хуралдана. Тиймээс У.Хүрэлсүх, Г.Занданшатарын талынхан болон Д.Амарбаясгалан, Л.Оюун-Эрдэнийн фракцийнхан намын их хурлын төлөөлөгчдийг багцлах ажилдаа хэдийнэ орцгоосон. Д.Амарбаясгалангийн хувьд, МАН-ын Ерөнхий нарийн бичгийн даргаар 2016-2024 онд ажиллаж, намаа УИХ, НИТХ, орон нутгийн сонгуульд дараалан ялуулсан. Тусгаар тогтнолын ордонд найман жил ажиллахдаа тэрбээр МАН-д хүч, нөлөөгөө тогтоосон генсек байв. Нийслэл, дүүрэг, аймгуудын МАН-ын хороодыг Д.Амарбаясгалан зангидаж, чиглүүлж байлаа. Тэрбээр УИХ-ын даргаас өөрийн хүсэлтээр чөлөөлөгдсөн ч МАН-ын дарга. Эрх баригч хүчний Бага хурал өнгөрсөн сарын 27-нд хуралдаж, хоёр ч удаагийн санал хураалтаар түүнийг намын даргаар сонгосон. Тусгаар тогтнолын ордонд Д.Амарбаясгалангийн зүг алга ташилт нижигнэх зуур АН-аас бусад улс төрийн намуудын удирдлагууд, мөн нийслэл, дүүргүүд, аймгуудын МАН-ын хороодын дарга нар түүнд баяр хүргэж байлаа. Гэвч далаад оны “Ах нар” нь түүнд ялагдлын гашуун “дарс”-аа бэлтгэчихсэн хүлээж байлаа. Төрийн ордонд нүүрс уугитал тэд зодолдлоо. Үр дүнд нь Д.Амарбаясгалан УИХ-ын даргаас чөлөөлөгдөж, Г.Занданшатар Ерөнхий сайдаас огцров.   

 МАН-ын нарийн бичгийн дарга Ц.Чулуунзагдыг өнгөрсөн сард АТГ-аас саатуулсан. Д.Амарбаясгаланг Ерөнхий нарийн бичгийн дарга байх үед аппаратад нь ажиллаж байсан энэ залууг саатуулснаас эхлээд найз нөхдийн харилцаатай хүмүүсийг ч барьж хорьсон. Увс аймгийн Засаг дарга С.Батжаргал уржигдар (2025.10.20) фэйсбүүкт “Увс аймгийн 100 жилийн ойг Д.Амарбаясгалан дэмжсэн учир АТГ намайг шалгаж байна” гэсэн утгатай пост бичив. Д.Амарбаясгалангийн хувьд, баруун бүсээс УИХ-д сонгогдсон. Тиймээс “МАН-ын их хурлаас урьтаж, Д.Амарбаясгаланг дэмждэг аймгуудын Засаг дарга нарыг АТГ намнаж эхлэв үү” гэх хардлага олон нийтийн дунд үүслээ. Учир нь аймгуудын Засаг дарга нар голдуу МАН-ын хороодын дарга нар байдаг. Намын их хурлын төлөөлөгчдийг сонгох, багцлах, удирдан чиглүүлэх эрх тэдэнд бий. “МАН-ын их хурлын 2255 төлөөлөгчид дунд Г.Занданшатар, Д.Амарбаясгалан нарын хэн нь олонхи байх вэ” гэж буй энэ үед Д.Амарбаясгалангийн талын хүчийг сулруулах ажиллагааг явуулж байна уу гэж харагдахаар байна. МАН-ын Бага хурлаар намын даргаар сонгогдсон Д.Амарбаясгаланг ирэх сард болох их хурлаар ёсчлох учиртай. МАН-ын шинэ даргыг Улсын Дээд шүүх 60 хоногийн дотор бүртгэх хуультай.

Д.Од