“Ерөнхий сайдыг огцруулсан УИХ-ын 95 дугаар тогтоол, УИХ-ын дэд дарга Х.Булгантуяа Үндсэн хууль зөрчсөн” гэж Цэц дүгнэв

Үндсэн хуулийн Цэцийн их суудлын хуралдаан өнөө өглөө (2025.10.22) 09:30 цагт эхэлсэн. Нэхэмжлэгч буюу Засгийн газрыг төлөөлж ЗГХЭГ-ын дарга С.Бямбацогт, ЗГХЭГ-ын дэд дарга Д.Цолмон, ЗГХЭГ-ын Тэргүүн дэд дарга Д.Мөнх-Эрдэнэ, Ерөнхий сайд Г.Занданшатарын итгэмжлэгдсэн төлөөлөгч Н.Лүндэндорж оролцсон бол УИХ-ыг төлөөлж П.Сайнзориг, Х.Баасанжаргал, Ч.Номин, Г.Тэмүүлэн, М.Мандхай, Н.Номтойбаяр, Ц.Сандаг-Очир, А.Ундраа, Б.Баярбаатар, С.Ганбаатар, Ц.Идэрбат нар хүрэлцэн ирсэн ч тэд хуралдааныг орхин гарсан юм. УИХ-ын дэд дарга Х.Булгантуяа их суудлын хуралдааны үеэр Цэцийн гишүүн О.Мөнхсайханаас татгалзах хүсэлт гаргасан боловч Цэц хүлээж аваагүй. Мөн тэрбээр “Өмгөөлөгч авъя” гэсэн ч Цэц хүсэлтийг нь хүлээж авахаас татгалзсан. Үндсэн хуулийн Цэц дөнгөж сая их суудлын хуралдааны шийдвэрээ танилцууллаа. Цэцийн гишүүн О.Мөнхсайхан энэхүү шийдвэрийг танилцуулахдаа “ТББХ-ноос гарсан “Ерөнхий сайдыг огцруулахыг дэмжихгүй” гэснийг УИХ-ын чуулган дээр “Дэмжье” гэснээр санал хураасан, 2025 оны аравдугаар сарын 16-ны чуулганы нэгдсэн хуралдааны ирцийг аравдугаар сарын 17-нд тооцож санал хураасан зэрэг нь Үндсэн хууль зөрчсөн” гэж дүгнэлээ. Цэцийн гишүүн О.Мөнхсайхан “Ерөнхий сайд Г.Занданшатараас ирүүлсэн хүсэлтийн дагуу УИХ-ын дэд дарга Х.Булгантуяагийн үйл ажиллагаатай холбоотой маргааныг шууд үүсгэсэн. Энэ хугацаанд Х.Булгантуяа хууль зүйн туслалцаа авах бүрэн боломжтой байсан” хэмээн дурдлаа. Г.Занданшатарыг Ерөнхий сайдаас огцруулсан УИХ-ын 95 дугаар тогтоолыг Үндсэн хуулийн Цэц “Үндсэн хууль зөрчсөн” гэж дүгнэлээ. Цэцийн гишүүн О.Мөнхсайхан “Үндсэн хуулийн Цэцийн их суудлын хуралдааныг яаралтай зарласны учир нь Ерөнхий сайд огцорсон бол дараагийн Ерөнхий сайдыг 30 хоногийн дотор томилох хуультай. Хэрэв энэ хугацаанд шинэ Ерөнхий сайдыг томилж чадахгүй бол УИХ тарах нөхцөл байдал үүснэ. Цаашилбал улс төрийн хямрал улам гүнзгийрэх магадлалтай тул Цэц үүнийг “Онцгой нөхцөл байдал” гэж үзсэн” гэлээ.    

Г.Анар