УИХ Ерөнхийлөгчийн хоригийг хэлэлцэхгүй

Үндсэн хуулийн Цэцийн их суудлын хуралдаан өчигдөр (2025.10.22) болж, Ерөнхий сайдыг огцруулсан УИХ-ын 95 дугаар тогтоол, УИХ-ын дэд дарга, гишүүн Х.Булгантуяаг “Үндсэн хууль зөрчсөн” гэж дүгнэсэн. Ерөнхий сайд Г.Занданшатар өнгөрсөн пүрэв гарагт хүсэлт хүргүүлсний дагуу Цэц УИХ-ын дэд дарга, гишүүн Х.Булгантуяагийн үйл ажиллагаатай холбоотой асуудлаар шууд маргаан үүсгэсэн. Харин УИХ-ын дэд дарга Х.Булгантуяа Цэц маргаан үүсгэсэн байхад баасан гарагт чуулганы нэгдсэн хуралдааныг даргалж Ерөнхий сайдыг огцруулах санал хураалт явуулсан. Ерөнхийлөгч У.Хүрэлсүх УИХ-ын 95 дугаар тогтоолд өнгөрсөн даваа гарагт (2025.10.20) хориг тавьсан. Энэхүү хориг нь “Монгол Улсын Их Хурлын шийдвэр, үйл ажиллагаа Үндсэн хуульд бүрнээ нийцсэн байвал зохино. Хууль дээдлэх төрийн үйл ажиллагааны үндсэн зарчим зөрчигдсөн байна” гэсэн хоёр хэсгээс бүрдсэн. Тэгвэл Үндсэн хуулийн Цэц УИХ-ын 95 дугаар тогтоолыг “Үндсэн хууль зөрчсөн” гэж дүгнэлээ. Их суудлын хуралдааны шийдвэр эцсийн шийдвэр. Тиймээс “Ерөнхийлөгч У.Хүрэлсүх хоригоо буцааж татах уу” гэдэг асуулт гарч ирсэн. Үндсэн хуулийн 66 дугаар зүйлд "Хууль, зарлиг, УИХ, Ерөнхийлөгчийн бусад шийдвэр, түүнчлэн Засгийн газрын шийдвэр, Монгол Улсын олон улсын гэрээ нь Үндсэн хуульд нийцэхгүй гэж Үндсэн хуулийн Цэц шийдвэр гаргавал зохих хууль, зарлиг, батламж, шийдвэр хүчингүй болно" гэж заасан. Цэц УИХ-ын 95 дугаар тогтоолыг "Үндсэн хууль зөрчсөн" гэж дүгнэсэн. Тиймээс Үндсэн хуулийн 66.4, 67 дугаар зүйлд заасны дагуу хүчингүй болсон шийдвэрийн хоригийг хэлэлцэх нь Үндсэн хуулийн 66.4, 67 дугаар зүйлийг зөрчсөн үйлдэл болох учраас УИХ Ерөнхийлөгчийн хоригийг хэлэлцэхгүй аж. 

Г.Анар