Я.Содбаатар: МАН-ын даргыг намын XXXI их хурлаар сонгоно

    МАН-ын Удирдах зөвлөл өнөөдөр (2025.10.27) 12:00, 14:00 цагт хуралдана гэсэн мэдээлэл байсан ч хуралдаагүй. Харин маргааш 12:00 цагт хуралдахаар болжээ. Тус намын Ерөнхий нарийн бичгийн дарга Я.Содбаатар “Маргааш намын Удирдах зөвлөл хуралдана. МАН-ын даргын дэргэдэх Бодлогын зөвлөл улс төрийн нөхцөл байдалтай холбоотой асуудлаар хуралдана. Энэхүү зөвлөлд манай намын үе үеийн дарга, Ерөнхий нарийн бичгийн дарга нар багтдаг. Удирдах зөвлөл УИХ дахь МАН-ын бүлэгт ямар ч чиглэл өгөхгүй. Ажил хаялт болж, шатахууны зохиомол хомсдол үүссэн талаар ярилцана. Ерөнхий сайдыг огцруулсан асуудлыг Үндсэн хуулийн Цэц хэлэлцэж эцэслэсэн. Улсын төсвийг хэлэлцэж батлахад 20 хоног үлдлээ. Д.Амарбаясгаланг МАН-ын даргаар сонгосон тухай бичгийг Бага хурлын ээлжит хуралдааныг даргалагч Улсын Дээд шүүх рүү явуулах ёстой байсан. Одоогийн байдлаар, намын даргыг бүртгүүлэх бичгийг явуулаагүй. Намын дүрмийн дагуу их хурлыг дөрвөн жилд нэг удаа хуралдуулдаг. Намын  их хурлаар МАН-ын дарга болон Бага хурлын гишүүд, Хяналтын ерөнхий хорооны гишүүдийг сонгодог. Түүний дагуу сонгуулиа хийнэ” гэв.

МАН-ын Бага хурал 2025 оны есдүгээр сарын 27-нд хуралдаж, Д.Амарбаясгаланг намын даргаар сонгосон. Хуульд заасны дагуу намын шинэ даргыг Улсын Дээд шүүхэд 60 хоногийн дотор бүртгүүлэх ёстой. Гэвч Д.Амарбаясгаланг МАН-ын даргад бүртгүүлэхээр хандаагүй байгаа аж. Харин ирэх сарын 15-нд хуралдах намын XXXI их хурлаар МАН-ын даргыг сонгохоор болжээ.

Ж.Болд