БНХАУ хямд ажиллах хүчин экспортлогч бус, ногоон эдийн засаг, цэрэг-иргэний нэгдсэн экосистем бүхий шинэ гүрэн болохоо зарлалаа

   Хятадын Коммунист намын Төв хорооны XX хурал энэ сарын 20-23-нд боллоо. Энэ удаагийн хуралд Төв хорооны 204 гишүүнээс 168 гишүүн оролцжээ. Олон улсын анхаарлыг татаж байсан Хятадын Коммунист намын Төв хорооны ээлжит хурлаар БНХАУ 15 дугаар таван жилийн төлөвлөгөөгөө баталлаа. 2026-2030 онд хэрэгжих энэхүү таван жилийн төлөвлөгөөнд Хятад улс хямд ажиллах хүчин экспортлогч орон байхаа больж, орчин үеийн технологи бүхий ногоон эдийн засагтай шинэ гүрэн болох талаар тусгажээ. Үүнээс гадна цэрэг-иргэний нэгдсэн экосистемийг бий болгох талаар The Diplomat сайтад мэдээлсэн байна. Хятадын Үндэсний хөгжил, шинэтгэлийн хорооноос 2023 оны арванхоёрдугаар сард урьдчилсан судалгааг хийж, Ши Жиньпиний дэвшүүлсэн 2020-2035 онд эдийн засгаа хоёр дахин өсгөх зорилтыг 15 дугаар таван жилийн төлөвлөгөөнд тусгасан аж. Дэлхийн хоёр дахь том эдийн засаг болох БНХАУ хуучны уламжлалт аж үйлдвэржилтээс дэвшилтэт технологи бүхий гүрэн, хурдацтай өсөлтөөс өндөр чанартай хөгжих шилжилтийн үеэ ийнхүү тодорхойллоо. Анхдугаар таван жилийн төлөвлөгөөгөө 1953 онд баталж байсан тус улс 2021-2025 он буюу 14 дүгээр таван жилийн төлөвлөгөөндөө хүн амын хөгшрөлтөд анхаарч, эрүүл мэндийн тусламж үйлчилгээ, тэтгэврийн тогтолцооны талаар тусгаж байв. Мөн дэлхий дахин цар тахал нүүрлэж, АНУ-тай харилцаа муудсан нь Хятадын эдийн засагт сөргөөр нөлөөлж байлаа. Коммунист намын Төв хорооны ХХ хурлаар өмнөх таван жилийн төлөвлөгөөний үр дүнг ч хэлэлцсэн аж.

Ж.Болд