Банкууд хамтдаа 3.5 сая мод тарилаа

         Монголбанк, Монголын банкны холбооны гишүүн байгууллагуудын санаачилгаар Тэрбум мод санг 2022 онд уур амьсгалын өөрчлөлт, цөлжилт, газрын доройтлыг бууруулах зорилгоор үүсгэн байгуулж, банк санхүүгийн салбарынхан эргэн төлөгдөхгүй нөхцөлтэй санхүүжилтийн шинэлэг жишиг тогтоон, байгаль орчны салбарт санхүүгийн тогтвортой механизм бий болгохоор зорин ажиллаж байгаа билээ.

Бид хамтдаа 93 төсөл хэрэгжүүлж, Монгол орны говь, хангайн бүсэд ойжуулалт нөхөн сэргээлт хийн 1,435 га талбайд 3,538,131 мод тариад байна. Мөн арчилгаа, хамгаалалтын ажлыг тогтмолжуулсны үр дүнд тарьсан моддын 90 гаруй хувь нь та бидэнд хүчил төрөгч бэлэглэн ургасаар байна.

Цаашид Тэрбум мод сан банкны салбартай хамтын ажиллагаагаа улам бэхжүүлж, ногоон хөгжлийг түүчээлэх зорилгоор энэ сарын 24-ний өдөр банкуудтай Төсөл, хөтөлбөр, хөрөнгө оруулалтын гэрээнд үзэглэлээ.

Төрийн банкны хувьд, 2022-2024 онд Тэрбум мод сангаар дамжуулан улс орон даяар 218,728 мод тарьж ургуулаад байна. Энэ нь банкны салбарын тарьж ургуулсан моддын 7.15 хувь болохыг сангийн зүгээс онцолж байна. Уур амьсгалын өөрлөлтийг бууруулах, тогтвортой хөгжлийг түүчээлэхэд Төрийн банкны бүтээж буй үнэ цэн жилээс жилд өргөжин бэхжиж, Тэрбум мод сангаар дамжуулан ургуулсан моддын хүлэмжийн хийн шингээлт 2024 оны байдлаар 1,003.41 тоннд хүрээд байна.

Төрийн банк нь тогтвортой хөгжлийг дэмжигч, системд нөлөө бүхий банкны хувиар “Тэрбум мод” үндэсний хөдөлгөөнийг дэмжин ажиллахын зэрэгцээ ажилтан нэг бүрийн идэвх оролцоогоор ногоон соёлыг түгээн дэлгэрүүлж, нийгэмд эерэг үлгэрлэл үзүүлэхийг ямагт зорин ажилладаг.

Тухайлбал, “Ажилтан бүр нэг мод” аяныг “Модыг мод(а) болгоё” уриан дор зохион байгуулж, жил бүрийн хавар, намар 500 салбар нэгж, 3000 гаруй ажилтныхаа идэвх оролцоогоор улс орон даяар мод тарьдаг уламжлал бий болгоод байна. 2021 оноос хойш хэрэгжсэн тус аяны хүрээнд банкны хамт олон нийслэл хот төдийгүй бүхий л аймаг, сумдад 25,000 гаруй мод тарьж, тарьсан мод бүрээ арчлан хамгаалж байна.

Мөн бид амьтдыг хамгаалж, гол горхи, нуур цөөрмийн эрэг, усны сав газрыг цэвэрлэх ажлуудыг тогтмол зохион байгуулж байгаагийн зэрэгцээ худалдан авалтын бодлогоороо дахин боловсруулсан бүтээгдэхүүнийг дэмжих, цаасны хэрэглээг бууруулах, ажилтны автобус аялуулах, авто баазаа цахилгаан машинаар шинэчлэх зэргээр ногоон оффисыг зарчмуудыг баримтлан ажиллаж байна.

Цаашид Төрийн банк тогтвортой хөгжлийг эрхэмлэгч үндэсний тэргүүлэгч банк болохын хувьд, Тэрбум мод сантай хамтын ажиллагаагаа улам бэхжүүлж, санхүүжилтээ тэлэх болно. Үүгээр зогсохгүй харилцагчдадаа чиглэсэн тогтвортой, ногоон санхүүжилтийн хэмжээгээ тогтмол нэмэгдүүлж, 2030 он гэхэд нийт зээлийн багцад эзлэх ногоон зээлийн хэмжээг 10 хувьд хүргэхээр зорьж байна.

                                            Итгэл төгс – Ногоон ирээдүй