Д.Амарбаясгалангүй Л.Оюун-Эрдэнэ айгаад нуугдчихсан уу

   Л.Оюун-Эрдэнийн хэлдэгчлэн Д.Амарбаясгаланд амаргүй цаг үе тохиогоод байна. МАН-ын даргад нэр дэвшихээ зарласан цагаас эхлэн өрсөлдөгчид нь Монголын хамгийн муухай хүнээр Д.Амарбаясгаланг тодруулсан. Хүн амины хэрэгт гүтгэж үзлээ. Нүүрсний хулгайч гэх мөнхийн пайз зүүлээ. Маогийн улаан хамгаалагчид Соёлын хувьсгалын үед сэхээтнүүд, улстөрчдөд муу муухай үгстэй пайз зүүлгэж, гудамжинд ард иргэдийн өмнө шившиглэдэг байсан технологийг энэ цаг үед Монголын улстөрчид нэг нэгнийхээ эсрэг ашигладаг болоод удсан. Д.Амарбаясгалан дээр ч энэ хар технологио хэвлэл мэдээлэл, сошиал, хууль хяналтынхан, сөрөг хүчнийхэнтэйгээ хүч хавсран давтаж байна. Хувь улстөрчийнхөө хувьд хүнд хэцүү сорилттой нүүр тулаад буй Д.Амарбаясгалангийн найз Л.Оюун-Эрдэнэ харин хаана явна вэ. Өнгөрсөн сонгуулийн үеэр баруун бүсийн сонгогчдын өмнө “Д.Амарбаясгалангүй Л.Оюун-Эрдэнэ, Л.Оюун-Эрдэнэгүй Д.Амарбаясгалан гэж үгүй” хэмээн хоолой мэдэн хашгирч зогссон тэр хүн хаачив. Г.Занданшатарыг Ерөнхий сайдаас огцруулах эсэхийг Төрийн байгуулалтын байнгын хороогоор хэлэлцэх үеэр “Хайрцаг дүүрэн баримттай ирлээ” гэж байсан Л.Оюун-Эрдэнэ айсандаа нуувчинд орох нь энэ үү. УИХ-ын гишүүн Д.Ганбат, Ж.Баярмаа нар “Харбиний гэрээ” хэмээх Хятадтай хийсэн гэрээг хянан шалгах Түр хороо байгуулахтай өрсөн Ухаахудагийн талаар Хянан шалгах Түр хороо байгуулах тухай тогтоолын төслөө УИХ-д өргөн барьсан Л.Оюун-Эрдэнэ одоо л Д.Амарбаясгалангийн амин найз гэдгээ харуулах цаг бус уу. УИХ-ын Эдийн засгийн байнгын хороо, чуулганы нэгдсэн хуралдаанаар Л.Оюун-Эрдэнэ нарын өргөн барьсан Түр хороо байгуулах тухай тогтоолын төслийг хэлэлцэхээр хоёр удаа товлосон ч хэлэлцүүлээгүй. Хэлэлцэхийг хойшлуулсан эсэх нь ч тодорхойгүй. Л.Оюун-Эрдэнэ алга болчихсон! Ж.Баярмаагаас Түр хороо байгуулах тухай санааг нь “хулгайлсан” гэгдэж буй Л.Оюун-Эрдэнэ ээ, нуувчнаасаа гарч ирээд наад Д.Амарбаясгалангаа хамгаалахгүй юм уу. “Нүүрсний хулгайч” гэж хүний, өөрийнхөнд нүдүүлж байхад таг чиг байлаа. Б.Энхбаяр Д.Амарбаясгаланг хүн амины хэрэгтэн мэт шоглож суухад Л.Оюун-Эрдэнэ сураггүй байлаа. Гэвч “Д.Амарбаясгаланг МАН-ын даргад өрсөлдөхөд хөшигний цаанаас сумласан хүн нь Л.Оюун-Эрдэнэ” гэж эрх баригч хүчнийхэн ярьцгааж байна. “Архангайн Цэнхэрийн рашаан дээр Д.Амарбаясгаланг МАН-ын дараагийн дарга гэж хөглөж өгсөн хүн нь ч бас Л.Оюун-Эрдэнэ” гэлцэнэ. Х.Булгантуяаг “Япон улс анх удаа эмэгтэй Ерөнхий сайдтай боллоо. Х.Булгантуяагаа Монголын анхны эмэгтэй спикер болгоно” гэж хөөргөж байгаад хувь заяаг нь хуулийн хайчинд хийчихлээ. Л.Оюун-Эрдэнэ ээ, одоо ил гарч ирээд “Ах нар”-тайгаа үзэлц. Цэнхэрийн рашаан дээр дарс хүртэж халамцахдаа “Үеийнхээ талд бат зогсоно. Үеэ хамгаална” гэсэн нь та нар биш үү. Өнгөрсөн сонгуулийн өмнөхөн “Үеийн үнэмлэхүй шинэчлэл хийнэ” гэж МАН дахь 50, 60, 70-аад оныхны уурыг хүргэсэн хүн нь чи шүү дээ. У.Хүрэлсүх, Г.Занданшатар нарыг сөрж зогсоод үеийн нөхдөө хамгаалаач. Л.Оюун-Эрдэнийн ах Б.Баатарын “15 давхар”-ынхан хар технологиороо алдартай биз дээ. “Ах нар”-ын чинь тухай криминал цувралын баримтууд бэлэн биз дээ. Д.Амарбаясгалангүй Л.Оюун-Эрдэнэ болчихлоо шүү дээ. Анд найз Д.Амарбаясгаланг чинь яллагдагч болгочихоод “Ах нар” чинь албан тушаал, эрх мэдлийн “Бялуу” хуваах зуураа хундага тулгаж байна. “Бортээгийг Д.Амарбаясгалан хулгайлчихлаа” гэж сошиалаар нэг нүдчихээд “Бортээг “Эрдэнэс Тавантолгой”-н эзэмшилд байгаа. Эдийн засгийн эргэлтэд оруулан тогтоолын төслийг УИХ-д өргөн барилаа” гэж байна. Зэвүү чинь хүрэхгүй байна уу, Л.Оюун-Эрдэнэ ээ. Аль эсвэл Д.Амарбаясгалан шиг яллагдагч болохоос айгаад амиа бодохоор шийдсэн үү. “15 давхар”-ын эзэн ах Б.Баатар чинь Японоос айгаад ирээгүй байна уу. Д.Амарбаясгалангаас урвачихаагүй бол одоо л найз гэдгээ харуулах цаг.   

С.Тулга