Б.Баатар: “Хэро энтертайнмент”-ийн залуучуудыг шалгаж, байцааж байгаа нь үнэн

Хууль зүй, дотоод хэргийн сайд Б.Энхбаяр өнөөдөр (2025.11.07) “Монгол хаан” жүжигт санхүүжилт олгоогүй” гэж яриад байгаа юм билээ. ССАЖЗ-ын сайд асан Ч.Номингийн 2024 оны нэгдүгээр сарын 30-ны 24/1 тоот Монгол Улсын олон улс дахь сурталчилгаа, мэдээллийн Үндэсний хорооны тогтоол бий. Энэхүү тогтоолын 3.23-т “Тамгагүй төр” жүжгийг олон улсад тоглуулахад дэмжлэг үзүүлэх талаар дурдсан. Үндэсний хороог Ерөнхий сайд асан Л.Оюун-Эрдэнэ байгуулсан. “Хэро энтертайнмент”-ийн Б.Баатар иргэн Г, Э нарт захиалга өгч Засгийн газрын эсрэг сошиал контентуудыг зохион байгуулалттай хийх ажлуудыг шалгаж байгаа. Иргэн Г гадаад руу зугтсан, Э нь цагдан хоригдож байгаа. Би энэ талаар ирэх даваа гарагт хэвлэлийн бага хурал хийнэ. Бичлэг үзүүлнэ” гэсэн юм. Харин сайд асан Ч.Номин “Үндэсний хорооны төлөвлөгөөний хэсгээс тасдаж тавьсан цаас санхүүгийн баримт биш. Б.Энхбаяр сайд Монгол Улсын олон улс дахь сурталчилгаа, мэдээллийн Үндэсний хорооны гишүүн. Төлөвлөгөөг нь батлалсан хүний хувьд Монгол Улс хуультай, бодлогын процесс дараалал, төлөвлөгөө, гүйцэтгэл, хяналтын механизмтай байдгийг мэдэхийн дээдээр мэдэж байгаа” гэсэн юм. “Хэро энтертайнмент”-ийн Б.Баатар “Хууль зүй, дотоод хэргийн сайд Б.Энхбаяр улс төрийн зорилгоор над руу чиглэсэн мөрдөн шалгах ажиллагаа явуулж ойр тойрны хамтарч ажилладаг залуучуудыг маань олон цагаар мэдүүлэг авч, эрүүдэн шүүх улс төрийн хэлмэгдүүлэлт эхлүүлснээ өөрөө зарлалаа. Засгийн газрыг шүүмжлэхээр шоронд ордог дарангуйллын дэглэм тогтож үг хэлэх, үзэл бодлоо илэрхийлэх нь эргүүгийн ялтай нийгэм болжээ. “Хэро энтертайнмэнт”-ын залуучуудыг шалгаж, дуудаад байцаагаад байгаа нь үнэн. Энэ залуучууд Ардчилсан намын талд ч ажиллаж байсан, Ардын намын сонгуулийн штабт ч ажиллаж байсан. Б.Энхбаярыг сонгуульд ялуулах гээд Ардын нам дээр ч ажиллаж л байсан залуучууд. Хэвлэл мэдээлэл, олон нийттэй харилцах, зураг, видео контент агуулга хийдэг залуусыг эрүүгийн хэрэгтэн болгож барьж хориод шалгаж байгааг би “Улс төрийн захиалгатай байна” гэж харж байгаа. Хэргийг мөрдөгч, прокурор, хэргийн оролцогчид л мэддэг, танилцдаг гэж боддог байтал Хууль зүй, дотоод хэргийн сайд нь хэргийн материалыг яриад явж байгаа нь улс төрийн захиалгатай, зохиол байна л гэж харж байна” гэв.

Г.Анар