Б.Баатар Засгийн газрын эсрэг контентийн захиалагч гэдэг нь илчлэгдмэгц Б.Хурц руу ноцохын учир юу вэ

    Б.Энхбаяр Хууль зүй, дотоод хэргийн сайдаар томилогдохоосоо өмнө “Л.Оюун-Эрдэнийн Засгийн газрын шийдвэрээр “Эрдэнэс Оюутолгой” компаниас “Монгол хаан” жүжгийн гадаад сурталчилгаанд зориулж, Их Британийн Atticus Partners Ltd руу 1.9 сая ам.доллар шилжүүлсэн” гэж мэдээлсэн. Тэрбээр өнөөдөр (2025.11.07) “Хэро энтертайнмент”-ийн Б.Баатар иргэн Г, Э нарт захиалга өгч Засгийн газрын эсрэг сошиал контентуудыг зохион байгуулалттай хийх ажлуудыг шалгаж байгаа. Иргэн Г гадаад руу зугтсан, Э нь цагдан хоригдож байгаа. Би энэ талаар ирэх даваа гарагт хэвлэлийн бага хурал хийнэ. Бичлэг үзүүлнэ” гэж ярилаа. Харин найруулагч Б.Баатар “Хэро энтертайнмент”-ийн залуучуудыг хууль хяналтынхан улс төрийн захиалгаар шалгаж, байцааж байна” гэсэн утга бүхий постууд хийв. Тэрбээр “Тамгагүй төр” буюу “Монгол хаан” жүжгийн санхүүжилттэй холбоотой асуудал олон нийтийн анхаарлыг татаж, иргэд “Л.Оюун-Эрдэнэ орлогоо нотол”, “Сонгуулийн үеэр алуурчны ярилцлагыг арилжааны телевизүүдээр гаргасан санхүүжилтээ тайлагна” хэмээн шаардаж буй энэ үед олны анхаарлыг өөр тийш хандуулах гэсэн үү, С.Зориг агсан болон Б.Булганы талаар пост бичжээ. Б.Баатар сошиалд “Банзрагчийн Булган гэдэг хүн 1998 оноос хойш 27 жил хэлмэгдсэн. Үндсэн хуулиар олгогдсон бүхий л хүний эрх, эрх чөлөөг нь хязгаарласан. Энэ хүнд бодит үнэнийг, 27 жил нийгмээрээ, төрийн эрх баригчдын буланд шахагдсан тэр үнэнийг хэлүүлэх индэр нь болж чадсандаа баярладаг. Хүмүүнлэг, иргэний ардчилсан Монгол Улсад нэг иргэнээ яаж дарамталж, үг хэлэх эрх чөлөөг нь хаадаг байсны гашуун жишээ бол Б.Булган. С.Зориг гэдэг хүний эхнэр байснаараа ингэж хэлмэгдсэн. Т.Чимгээ, Б.Содномдаржаа, Ц.Амгаланбаатар–бид С.Зоригийн амь насаа алдсан хэргийн талаар 2015 оноос нэвтрүүлэг бэлтгэж эхэлсэн. Гэвч Б.Хурц гэдэг хүн Ц.Элбэгдоржийн даалгавраар энэ нэвтрүүлгийн хар материалыг хулгайлсан. Энэ нэвтрүүлэг бол 10 гаруй жилийн эр зориг, хөдөлмөр. Хүний нэр төр, амь нас гэдэг бол Монгол Улсын хамгийн дээд үнэт зүйл. Гэтэл улс төрийн даалгавраар Монгол Улсын иргэдийг эрүүдэн шүүж, хилс хэрэг хүлээлгэсэн энэ кэйс бол орчин үеийн Монгол Улсын түүхэн дэх хүний эрхийн хамгийн том бөгөөд онц ноцтой зөрчил. 2013 оноос хойш энэ гурван иргэн, тэдний гэр бүл хохирсон. Гэтэл яагаад хүний эрхийн хамгийн том зөрчлийг олон нийтэд харуулснаараа нэвтрүүлэг бүтээгчид буруутгагдах ёстой гэж. Хүний эрхийн нэг л зөрчлийг хүлээн зөвшөөрвөл Монгол Улсын бүх иргэд амьд явах, эрх чөлөөгөө эдлэх баталгаагүй болно. Ц.Амгаланбаатартай Шүүхийн шийдвэр гүйцэтгэх ерөнхий газраас холбогдох бүхий л зөвшөөрлийг нь авч уулзаж ярилцлага хийсэн. Ямар ч хууль зөрчөөгүй. Бид хүний эрхийн энэ том зөрчилд анхаарал хандуулахгүй дабл стандарт гаргадаг мөртлөө Монгол Улс ардчилсан, эрх чөлөөт орон гэж ярихаасаа ичих хэрэгтэй” гэв. ТЕГ-ын дарга Б.Хурцын хувьд, гүйцэтгэх ажиллагааны үеэр “Хэро энтертайнмент”-ийн студид бидний хайсан материал байгаагүй. Би Б.Баатараас уучлалт гуйсан” гэж хэвлэлд ярьсан удаатай.

Ж.Болд