Б.Баатарын захиалгаар Засгийн газрын эсрэг контент хийсэн гэх иргэн Э-г яллагдагчаар татжээ

Хууль зүй, дотоод хэргийн сайд Б.Энхбаяр өнөөдөр (2025.11.12) сэтгүүлчдэд мэдээлэл хийх үеэрээ “Хэро энтертайнмент”-ийн Б.Баатарын захиалгаар Засгийн газрын эсрэг контент хийсэн иргэдийн талаарх мэдээллийг сэтгүүлчдэд өг” гэж ЦЕГ-т чиглэл өгсөн тухайгаа хэлсэн. Түүний дараа буюу дөнгөж сая ЦЕГ-ын Мөрдөн байцаах албаны дарга, цагдаагийн хурандаа П.Очбадрах “Эрүүгийн хэрэг хянан шийдвэрлэх тухай хуулийн 29.3.5-т заасны дагуу мөрдөн шалгах ажиллагаатай холбоотой мэдээллийг бид прокурын байгууллагаас зөвшөөрсөн хэмжээнд өгнө. Фэйсбүүк, олон нийтийн цахим сүлжээнд Эрүүгийн хуулийн 13.4.1-т заасныг зөрчиж, олон нийтэд худал мэдээлэл тарааж, нэр бүхий иргэдийн нэр төр, алдар хүндэд халдсан тухай гомдол мэдээлэл ирүүлсэн. Мөрдөн байцаах албаны зүгээс “Хүний халдашгүй эрх” гэдэг үндэслэлээр мөрдөн шалгах ажиллагаа явуулж байна. Иргэн Э нь телеграм, вайбераар “Хэро 9911”, U Bro, Bruno Bro гэх хаягтай хэрэглэгчидтэй тус тус харилцсан. Төрийн өндөр албан тушаалтнуудын зураг, бичлэг, дуу дүрс бүхий эвлүүлэг хийж зохион байгуулалттайгаар олон нийтэд тарааж, тэднийг нийгэмд харлуулах, иргэдийг буруу ташаа мэдээллээр төөрөгдүүлэх ажиллагаа явуулсан нь тогтоогдож байна. Иймд иргэн Э-г Эрүүгийн хуулийн 13.14.1-т зааснаар худал мэдээлэл тараасан гэдэг үндэслэлээр яллагдагчаар татсан” гэв.

Д.Од