Г.Занданшатар: 2027, 2028 оны ялалт бол зүгээр нэг улс төрийн зорилт биш

     МАН-ын XXXI их хурал өнөөдөр (2025.11.15) “Буянт-Ухаа” спорт цогцолборт эхэлсэн. Тус намын их хурлын үеэр Ерөнхий сайд Г.Занданшатар мэндчилгээ дэвшүүлж, “Шинэ итгэл-Эрс шинэчлэл” 2026-2030 онд Монгол Улсыг хөгжүүлэх таван жилийн төлөвлөгөөний үндсэн чиглэлээ танилцуулсан юм. Тэрбээр “МАН-ын XXXI их хурлын эрхэм төлөөлөгчид та бүхэн бол МАН-ын нэр хүнд, үйл хэрэг, үнэт уламжлалыг тээгчид, хамгаалагчид, манлайлагчид юм. МАН-ын тулгуур нь та нар, МАН-ын туг нь ч та нар. Тиймээс бид өнөөдөр намынхаа ирээдүйн ялалтын төлөө, Монгол Улсын ирээдүйд ногдох түүхэн хариуцлагын өмнө хамтдаа хуран чуулж байна. Энэ бол таны, миний, бидний хамтын үүрэг. Энэ бол хамтын тангараг. 2027, 2028 оны ялалт бол зүгээр нэг улс төрийн зорилт биш. Энэ бол Монголын ирээдүй, монгол хүний амьдрал, бидний хойч үеийн хувь заяаны өмнө хүлээсэн түүхэн хариуцлага юм. Их хурлаас гарах шийдвэр, хөтөлбөр, дүрмийн шинэчлэл бүр нь үзэл санааны дэвшил, дүрмийн хэрэгжилт, ёс зүйн хариуцлага, манлайллын шинэ стандартыг баталгаажуулахад чиглэх ёстой. Манай нам авлигын эсрэг шинэ тогтолцоо, шударга ёсны шинэ соёл, мэдээлэлд суурилсан хариуцлагын системийг бүрдүүлэхийн төлөө ажиллаж байна. Шударга ёс, эрх чөлөө, эв санааны нэгдэл гэсэн намын үзэл санааны зарчмыг удирдлага болгон ажилласнаар манай Засгийн газар богино хугацаанд түүхэн амжилтуудыг бүтээж байна. Манай Засгийн газар эдийн засгийн хүнд сорилтыг даван туулахдаа ачааны хүндийг ард түмэн, аж ахуйн нэгжид үүрүүлэх бус, төр өөрөө бүсээ чангалсан. Хэмнэлтийн тодотгол хийж, экспортыг нэмэгдүүлж, засаглалыг сайжруулснаар үнийн өсөлт саарч, инфляц тогтворжиж, эдийн засгийн өсөлт 2.4 хувиас 5.6 хувь болж, бараг хоёр дахин нэмэгдлээ. Засгийн газрын эхлүүлж байгаа томоохон бүтээн байгуулалтын ажлуудын үр дүнд нь 2029 оноос эхлэн эдийн засаг сайжирч, иргэдийн орлого 2-3 дахин өсч, 4-5 жилийн дараа хурдтай хөгжих их үйлсийг эхлүүлээд бна. Ард түмний итгэлийг сэргээж, засгийн бүтцийг өөрчилж, өсөлтийг тогтвортой хадгалж, үр өгөөжийг гэр бүлийн амьдралд хүргэх “Шинэ Итгэл - Эрс Шинэтгэл”-ийн иж бүрэн бодлогыг Засгийн газар дэвшүүлэн ажиллаж байна” гэлээ.

Г.Анар