Нарны аймаг руу орж ирсэн сүүлт одны зургийг үзүүлжээ

      МИНСК, 2025 оны арваннэгдүгээр сарын 20 /BelTA/.  Манай Нарны аймагт цор ганц удаа маш хурдтай орж ирсэн сүүлт одны зургийг АНУ-ын Агаарын нислэг, сансрын уудмыг шинжлэн судлах төв /НАСА/ лхагва гарагт үзүүлжээ. 

“3I/Atlas” хэмээн нэрлэсэн энэхүү сүүлт одыг өнгөрсөн зун илрүүлсэн бөгөөд манай сансрын орон зайд зочилсон гурав дахь сүүлт од ажээ. Уг сүүлт од өнгөрсөн сард Ангараг гаргийн хажуугаар өнгөрсөн байна. 

Ангарагийн тойрог замд болон уг гарагтай ойролцоо байрлаж буй НАСА-гийн сансрын төхөөрөмжүүд Ангарагийн хажуугаар 29 сая км-ийн зайтай өнгөрөх үед нь томруулсан зургийг нь авчээ. Ангарагийг тойрон эргэлдэж буй Европын Сансар судлалын агентлагийн хоёр хиймэл дагуулаар мөн ажиглалт хийсэн байна.

Сүүлт од одоо Дэлхийгээс ойролцоогоор 307 сая км-ийн зайд байгаа бөгөөд одон орон судлаачид дуран авайнуудаа чиглүүлээд байгаа ажээ. Италийн “Virtual Telescope” төслийн судлаач Жанлука Мази лхагва гарагт сүүлт одны зургийг томруулан авсан байна.

Уг сүүлт од 12 дугаар сарын дундуур Дэлхийд хамгийн ихээр ойртож, манай гаргийн хажуугаар 269 сая км-ийн зайтай өнгөрөх ажээ. Энэ үеэр “3I/Atlas”-ыг үүр цайхаас өмнө дурангаар эсвэл сансрын дуран авайгаар ажиглах боломжтой. Үүний дараа дахин хэзээ ч буцаж ирэхгүйгээр од хоорондын орон зай руу хурдан холдон одно. 

Европын Сансар судлалын агентлагийн Бархасбадь гараг руу хөөргөсөн “Juice” сансрын аппаратын камер болон шинжлэх ухааны багаж хэрэгслийг бүтэн сарын туршид, ялангуяа Наранд хамгийн ойртож ирэх үед нь чиглүүлжээ. Гэвч “Juice”-ийн гол антенныг Наранд ойр байх үед дулааны хамгаалалт болгон ашиглах тул өгөгдөл дамжуулалт хязгаарлагдаж, эдгээр ажиглалтын мэдээллийг эрдэмтэд хоёрдугаар сараас нааш авах боломжгүй юм.