Стратегийн ач холбогдол бүхий бүтээгдэхүүний хангамж, нийлүүлэлтийг дэмжих тухай хуулийн төслийг хэлэлцэхийг дэмжив

     УИХ-ын чуулганы өнөөдөр /2025.11.27/-ийн үдээс хойших хуралдаанаар Тамхины хяналтын тухай хуульд нэмэлт, өөрчлөлт оруулах тухай хуулийн төсөл болон хамт өргөн мэдүүлсэн хууль, тогтоолын төслүүдийг хэлэлцэх эсэхийг хуралдаанд оролцсон гишүүдийн олонх дэмжиж, анхны хэлэлцүүлэгт бэлтгүүлэхээр ХХНББХ-д шилжүүлэв.

УИХ дахь МАН-ын бүлгээс ирүүлсэн саналын дагуу Зарим байнгын хорооны бүрэлдэхүүнд өөрчлөлт оруулах тухай УИХ-ын тогтоолын төслийг гишүүд дэмжиж баталлаа.

Стратегийн ач холбогдол бүхий бүтээгдэхүүний хангамж, нийлүүлэлтийг дэмжих тухай хуулийн төслүүдийг хэлэлцлээ. Манай улсын газрын тосны гол ханган нийлүүлэгч ОХУ-ын экспортын нийлүүлэлтэд хомсдол үүсэж эрэлт нэмэгдээд байна. ОХУ-аас 95-97 хувийг импортолдог. Өнгөрсөн хугацаанд манай улсын шатахууны хэрэглээ жил бүр өсч, 2023 онд 2.4 сая тонн, 2024 онд 2.8 сая тонн, 2025.10.28-ны байдлаар 2.3 сая тонн газрын тосны бүтээгдэхүүн импортлоод байна. Улсын хэмжээнд 1800 ШТС байдаг, 9 аймагт шатахууны төлөөлөгч гэж байдаг ч нэг бүрчлэн нөөц хэмжих төхөөрөмж байдаггүй. Сүүлийн 35 жил шатахууны нөөцийн тооцоолол хийгдэж байгаагүй. Хуулийг батласнаар ШТС-уудын түлшний савнуудад мэдрэгч тавьж нэгдсэн зохион байгуулалтанд оруулан, бүрэн цахимжсан хянах системтэй болж байгаа аж. Ингэснээр шатахууны нөөцийг урьдчилан тооцоолж, нөөцлөх боломжтой гэж салбарын сайд тайлбарлав.

Стратегийн ач холбогдол бүхий бүтээгдэхүүний хангамж, нийлүүлэлтийг дэмжих тухай хуулийн төслийг хэлэлцэх эсэхийг дэмжиж, төслийг анхны хэлэлцүүлэгт бэлтгүүлэхээр Эдийн засгийн байнгын хороонд шилжүүллээ.