Фабержегийн “Өвлийн өндөг” дуудлага худалдааны дээд амжилтыг эвджээ

     ЛОНДОН, 2025 оны арванхоёрдугаар сарын 3 /DW/. “Өвлийн өндөг” хэмээн нэрлэгддэг, болор, очир эрдэнээр урласан ховор өндгийг мягмар гарагт нэрээ нууцалсан худалдан авагч 22.9 сая фунт стерлингээр /26 сая евро/ худалдан авснаар дуудлага худалдааны дээд амжилтыг эвджээ. 

Дуудлага худалдааны “Christie's” ордноос мэдэгдсэнээр, “Өвлийн өндөг” нь 2007 онд Ротшильдын өндөгний тогтоож байсан 8.9 сая фунт стерлингийн дээд амжилтаас давсан байна.

Оросын үнэт эдлэл урлаач Петр Карл Фаберже Оросын хаан болон түүний гэр бүлд зориулан Улаан өндөгний баярын 50 өндөг бүтээжээ. Энэхүү бүтээлч ажил 1885-1917 оны хооронд 30 жилийн турш үргэлжилсэн байна. Эдгээр өндөг нь ер бусын нарийн хийцтэй бөгөөд тус бүр нь дотроо нууцлаг гэнэтийн бэлэгтэй ажээ.

Харин “Өвлийн өндөг” бол II Николай хаан 1913 онд өөрийн ээж, хатан хаан Мария Феодоровнадаа бэлэглэсэн Улаан өндөгний баярын бэлэг байлаа. 14 см хэмжээтэй өндгийг бүтээхдээ болорыг нарийн аргаар сийлж, цагаан алтан цасан ширхэгийн хээ, 4500 жижиг очир эрдэнийн чулуугаар чимэглэсэн байна. Өндгийг онгойлгоход үнэт чулуугаар чимэглэсэн кварцан цэцгүүд бүхий жижиг сагс гарч ирнэ. Энэхүү гэнэтийн бэлэг нь хаврыг бэлгэддэг ажээ.

“Christie's” ордны Оросын урлагийн бүтээл хариуцсан хэлтсийн дарга Марго Оганесян уг өндгийн гайхалтай уран хийц загварыг үнэлэн “гоёл чимэглэлийн урлагийн Мона Лиза'” хэмээн нэрлэжээ. “Өвлийн өндөг бол үнэхээр таны олж үзэх хамгийн ховор эд зүйлсийн нэг мөн. Фаберже үүнийг хэрхэн бүтээснийг ухаж ойлгоход үнэхээр хэцүү” гэж М.Оганесян хэлжээ.

Хаан III Александр Фабержегийн өндгийг бэлэглэх уламжлалыг эхлүүлсэн түүхтэй. Тэрбээр эхнэртээ Улаан өндөгний баяраар өндөг бэлэглэдэг байжээ. Түүнийг залгамжилсан II Николай хаан энэхүү уламжлалыг үргэлжлүүлж, бэлгийг эхнэр, ээждээ өгдөг болжээ. 1917 оны Оросын хувьсгалаар хаант засгийг түлхэн унагах хүртэл II Николай хаан ээж, эхнэртээ жил бүр Улаан өндөгний баярын хоёр өндөг захиалдаг байжээ.

Фаберже эзэн хааны гэр бүлд зориулж 50 өндөг урласан бөгөөд үүнээс ердөө 43 нь хадгалагдан үлдэж, долоо нь алга болжээ. 1918 онд Николай хаан болон түүний гэр бүлийнхэн амиа алдсаны  дараа “Өвлийн өндөг”-ийг Санкт-Петербургээс Москва руу авчирсан байна. Улмаар коммунист эрх баригчид 1920-иод онд Оросын урлагийн үнэт зүйлсийн заримыг нь худалдах үед Лондоны нэгэн фирм худалдаж авсан байна.  

Уг өндгийг 1994 онд “Christie's”-ийн дуудлага худалдаанд дахин гарч ирэх хүртэл 20 жилийн турш алдагдсан гэж үзэж байсан бөгөөд тухайн үед 7 сая гаруй швейцар франкаар /тухайн үеийнхээр 5.6 сая ам.доллар/ зарагджээ. Улмаар 2002 онд Нью-Йоркт хоёр дахь удаагаа 9.6 сая доллароор зарагдаж байв.