Японы зүүн хойд хэсэгт 7.5 магнитудын хүчтэй газар хөдөллөө

    Даваа гаргийн орой Японы зүүн хойд хэсэгт 7.5 магнитудын хүчтэй газар хөдлөлт болж, эрх баригчид 90000 орчим оршин суугчдыг нүүлгэн шилжих болон цунамигийн анхааруулга гаргалаа. Гэхдээ хэдэн цагийн дээрх анхааруулгаа зөвлөмж болгон өөрчилжээ.  Японы Цаг уурын агентлаг (JMA) газар хөдлөлт орон нутгийн цагаар 23:15 цагт бүртгэгдсэн гээд далайн эргээс холгүй болох үед зүүн хойд эрэгт 3 метр (10 фут) өндөр цунами үүсч болзошгүй гэж мэдээлжээ.

Хоккайдо, Аомори, Иватэ мужуудад цунамигийн анхааруулга гарч, 20–70 см долгион хэд хэдэн боомтод бүртгэгдсэн талаар Японы Цаг уурын агентлаг мэдэгджээ. Мягмар гарагийн үүрээр Японы Цаг уурын агентлаг энэ анхааруулгаа зөвлөмж болгон бууруулсан бөгөөд энэ нь долгионы таамагласан өндөр багассаныг, мөн үерт автах эрсдэл буурсантай холбоотой аж.

Газар хөдлөлтийн голомт Аомори мужийн эргээс 80 км зайд, 54 км гүнд байжээ. Японы газар хөдлөлтийн хүчийг хэмжих 1–7 гэсэн шатлалаар үнэлбэл Аомори мужийн Хачинохэ хотод бүртгэгдсэн чичиргээ “дээд 6” гэсэн шатлалд бүртгэгджээ. Ийм хүчтэй доргионы үед хүн босоо зогсох боломжгүй, мөлхөж байж урагшлах боломжтой аж. Хүнд тавилгууд унах магадлалтай, олон барилгад ханын хавтан, цонхны шил хагардаг.

Газар хөдлөлтийн улмаас ноцтой хохирол учирч, хүний амь нас хохирсон талаарх мэдээлэл гараагүй байна. Ерөнхий сайд Санаэ Такаичи: “Одоогийн байдлаар долоон хүн бэртсэн” гэж мягмар гарагийн өглөө хэвлэлийнхэнтэй ярьжээ.

Энэ бүс нутаг нь 2011 оны 3-р сарын 9.0 магнитудын аймшигт газар хөдлөлтөд мөн нэрвэгдэж байсан юм. Японы Цаг уурын агентлагийн ажилтан мэдээлэл хийж: “Ирэх хэдэн өдөрт дахин илүү хүчтэй газар хөдлөлт болох магадлалтай” гэж анхааруулжээ. Газар хөдлөлтийн дараа Хоккайдоос эхлээд Токио хотын зүүн талд орших Чиба муж хүртэлх бүсэд дахин хүчтэй газар хөдлөлт үүсэх магадлалтай учир нэг долоо хоногийн турш сэрэмжтэй байхыг уриалсан байна.