ХЗБХ: Ажлын хэсгүүд байгуулж, ШЕЗ-ийн шүүгч бус гишүүнд нэр дэвшигчидтэй хийх томилгооны сонсголыг энэ сарын 24-ний өдөр зохион байгуулахаар товлов

      Улсын Их Хурлын Хууль зүйн байнгын хорооны өнөөдрийн (2025.12.09) хуралдаанаар Стратегийн ач холбогдол бүхий бүтээгдэхүүний хангамж, нийлүүлэлтийг дэмжих тухай хуулийн төслийн 11 дүгээр зүйлийн 11.1 дэх хэсэгт “… энэ хууль 2030 оны 12 дугаар сарын 31-ний өдрийг дуустал хугацаанд үйлчилнэ” гэж тусгасан нь Хууль тогтоомжийн тухай хуульд заасан хууль хүчин төгөлдөр болох хугацааны тухай зохицуулалттай нийцэж байгаа эсэх талаар гаргасан хууль зүйн зөвлөмж, “Тогтоолд нэмэлт оруулах тухай” Улсын Их Хурлын тогтоолын төслийн дагаж мөрдөх хугацаа тодорхой бус байх нь Хууль тогтоомжийн тухай хуулийн 27 дугаар зүйлийн 27.1.1 дэх заалт, 28 дугаар зүйлийн 28.3.9 дэх заалттай тус тус зөрчилдсөн эсэх талаарх хууль зүйн зөвлөмжүүдийг хэлэлцэн шийдвэрлэсэн.

Үргэлжлүүлэн “Ажлын хэсэг байгуулах тухай” Байнгын хорооны тогтоолын төслийг хэлэлцэн баталлаа. Байнгын хорооны дарга Д.Цогтбаатар төслийн талаар танилцуулсан юм. Засгийн газраас 2025 оны 11 дүгээр сарын 14-ний өдөр Улсын Их Хуралд өргөн мэдүүлсэн Гэр бүлийн тухай хуулийн шинэчилсэн найруулгын төсөл болон хамт өргөн мэдүүлсэн бусад хуулийн төслүүдийг Байнгын хороо болон чуулганы нэгдсэн хуралдаанаар хэлэлцүүлэх бэлтгэл хангах, санал, дүгнэлтийн төсөл боловсруулах үүрэг бүхий ажлын хэсгийг байгуулахаар төсөлд тусгажээ. Улсын Их Хурлын гишүүн Г.Уянгахишиг ажлын хэсгийн ахлагчаар ажиллах бол бүрэлдэхүүнд Улсын Их Хурлын гишүүн О.Номинчимэг, О.Алтангэрэл, Х.Баасанжаргал, П.Сайнзориг, С.Одонтуяа, Д.Пүрэвдаваа нар ажиллах юм байна.

Байнгын хорооны төсөлтэй холбогдуулан гишүүд асуулт асуух, үг хэлэх шаардлагагүй хэмээн үзсэн тул төслийг батлах санал хураалт явууллаа. “Ажлын хэсэг байгуулах тухай” Байнгын хорооны тогтоолын төслийг хуралдаанд оролцсон гишүүдийн 71.4 хувь дэмжсэн.

Энэ өдрийн хуралдаанаар хэлэлцсэн дөрөв дэх асуудал нь “Ажлын хэсэг байгуулах тухай” Байнгын хорооны тогтоолын төсөл байв. Гэр бүлийн хэрэг шүүхэд хянан шийдвэрлэх тухай хуулийн төсөл болон хамт өргөн мэдүүлсэн бусад хуулийн төслүүдийг Байнгын хороо болон чуулганы нэгдсэн хуралдаанаар хэлэлцүүлэх бэлтгэл хангах, санал, дүгнэлтийн төсөл боловсруулах үүрэг бүхий ажлын хэсгийг байгуулах тухай төслийн талаар Д.Цогтбаатар гишүүн хуралдаанд танилцууллаа.

Тус ажлын хэсгийн ахлагчаар Улсын Их Хурлын гишүүн О.Алтангэрэл ажиллан, бүрэлдэхүүнд Улсын Их Хурлын гишүүн О.Номинчимэг, Х.Баасанжаргал, П.Сайнзориг, Х.Тэмүүжин, Г.Уянгахишиг, Д.Пүрэвдаваа нар ажиллахаар төсөлд тусгажээ.                   Хууль зүйн байнгын хорооны хуралдаанд оролцсон гишүүд төсөлтэй холбогдуулан асуулт асуух, үг хэлэх шаардлагагүй хэмээн үзсэн тул санал хураалт явуулав. Санал хураалтад оролцсон Улсын Их Хурлын гишүүдийн 64.3 хувь нь “Ажлын хэсэг байгуулах тухай” Байнгын хорооны тогтоолын төслийг батлахыг дэмжсэн.

Энэ өдрийн хуралдааны төгсгөлд “Нэр дэвшигчийн томилгооны сонсголын тов тогтоох, сонсгол даргалагчийг сонгох тухай” Байнгын хорооны тогтоолын төслийг хэлэлцэн баталлаа. Төслийн талаар Д.Цогтбаатар гишүүн танилцуулсан юм. Шүүхийн ерөнхий зөвлөлийн шүүгч бус гишүүнд нэр дэвшигчидтэй хийх томилгооны сонсголыг 2025 оны 12 дугаар сарын 24-ний өдөр зохион байгуулахаар төсөлд тусгажээ. Нэр дэвшигчийн томилгооны сонсгол даргалагчаар Улсын Их Хурлын гишүүн Н.Алтанхуягийг томилохоор, сонсголын талаар нийтэд мэдээлэх, сонсголын бэлтгэл хангах ажлыг холбогдох хууль, журамд заасны дагуу зохион байгуулахыг Хууль зүйн байнгын хороонд даалгахаар төсөлд тусгасан байна.

Төслийн танилцуулгатай холбогдуулан Улсын Их Хурлын гишүүн Н.Алтанхуяг тодруулга хийж, байр сууриа илэрхийлэн, Д.Цогтбаатар даргаас хариулт авсны дараа “Нэр дэвшигчийн томилгооны сонсголын тов тогтоох, сонсгол даргалагчийг сонгох тухай” Байнгын хорооны төслийг батлах санал хураалт явууллаа. Өнөөдрийн хуралдаанд оролцсон Байнгын хорооны гишүүдийн олонх 57.1 хувь нь дэмжснээр тус төсөл батлагдав. Үүгээр Хууль зүйн байнгын хорооны өнөөдрийн хуралдаан өндөрлөлөө гэж Улсын Их Хурлын Хэвлэл мэдээллийн газраас мэдээлэв.