Монголын эрчим хүчний систем Өвөр Монголын эрчим хүчний системтэй зэрэгцээ ажиллагаанд залгагдах гэрээ байгууллаа

     Монгол Улсын эрчим хүчний систем Өвөр Монголын Өөртөө Засах Орон (ӨМӨЗО)-ны эрчим хүчний системтэй зэрэгцээ ажиллагаанд залгагдан ажиллах 220 кВ-ын “Зэс Оюу” хуваарилах байгууламжийг өчигдөр техникийн комисс ажиллагаанд хүлээн авсан бол өнөөдөр холбогдох талуудын төлөөлөл “Цахилгаан эрчим хүч худалдах, худалдан авах гэрээ” болон “Диспетчерийн зохицуулалтын гэрээ”-үүдэд гарын үсэг зурах ёслолын үйл ажиллагаа боллоо.

Энэхүү түүхэн үйл ажиллагаанд БНХАУ-ын ӨМӨЗО-ны “Эрчим хүчний групп” ХХК (IMPC)-ийн Төлөөлөн Удирдах Зөвлөл (ТУЗ)-ийн дарга Жан Хайфэн, мөн орны “Эрчим хүчний Олон улсын хамтын ажиллагааны компани”-ийн (IMPIC) ТУЗ-ийн дарга Ван Пэнфэй, Монгол Улсын эрчим хүчний сайд Б.Чойжилсүрэн, “Диспетчерийн үндэсний төв” ТӨХХК-ийн Гүйцэтгэх захирал Г.Балжинням, “Цахилгаан дамжуулах үндэсний сүлжээ” ТӨХК-ийн Гүйцэтгэх захирал Б.Дашдаваа нар болон албаны бусад хүмүүс оролцов.

Тэртээ 1976 оны 12-р сарын 30-ны өдрийн 21:30 цагт Монгол Улсын эрчим хүчний систем ОХУ-ын эрчим хүчний системтэй холбогдон 50 орчим жилийн хугацаанд зэрэгцээ ажиллагаанд ажиллаж байгаа билээ.

Тэгвэл өнөөдөр дээрх гэрээнүүдэд гарын үсэг зурснаар ӨМӨЗО-ны эрчим хүчний системтэй холбогдон Өмнөд бүсийн зарим хэрэглээг хангах боломж бүрдлээ.

Энэхүү үйл явдал нь манай улс хөрш хоёр оронтойгоо эрчим хүчний салбарт хамтын ажиллагаагаа өргөжүүлэхэд шинэ алхам болж улмаар нэгдсэн сүлжээний найдвартай, тогтвортой байдал дээшлэх давуу талтай юм.

Эх сурвалж: Диспетчерийн Үндэсний Төв ТӨХХК