“Б.Чимидийн нэрэмжит” шагналд нэр дэвшүүлсэн бүтээл хүлээн авах тухай

          “Монгол Улсын Үндсэн хуулийн өдөр”-ийг тохиолдуулан Үндсэн хуулийн эхийг баригч, Монгол Улсын Хөдөлмөрийн баатар, Ардын багш, Гавьяат хуульч, доктор, профессор “Бяраагийн Чимидийн нэрэмжит шагнал”-ын 12 дахь удаагийн шалгаруулалтыг зохион байгуулж байна.

Энэ хүрээнд Монгол Улсын Их Хурлын хууль тогтоох, хянан шалгах, төлөөллийн үйл ажиллагааны онол, арга зүйг боловсронгуй болгох, парламентат ёс, парламент судлал, үндсэн хуулийн болон захиргааны эрх зүй, үндэсний эрх зүйн тогтолцоог хөгжүүлэх, судалгаа, шинжилгээнд суурилсан хууль тогтоох үйл ажиллагааг бэхжүүлэх чиглэлээр туурвисан судалгаа, шинжилгээний бүтээлийг хүлээн авч, шалгаруулж, шагнаж урамшуулна.

Шалгарсан бүтээлд Монгол Улсын Их Хурлын даргын 2024 оны 293 дугаар захирамжаар баталсан “Б.Чимидийн нэрэмжит шагнал” олгох журмын 1.3 дахь хэсэгт заасны дагуу Монгол Улсын Их Хурлын даргын гарын үсэг бүхий өргөмжлөл, 20 сая төгрөгийн мөнгөн урамшуулал олгоно.

1.Нэр дэвшүүлсэн бүтээлийг хүлээн авах хугацаа:

Нэр дэвшүүлсэн бүтээл, холбогдох баримт бичгийг 2026 оны 01 дүгээр сарын 07-ны өдрийн 17.30 цагаас өмнө Улсын Их Хурлын Тамгын газар /“Б.Чимидийн нэрэмжит” шагналд нэр дэвшүүлсэн бүтээлийг хүлээн авах, баримт бичгийн бүрдэл, бүтээлийн агуулгыг судлан танилцуулга бэлтгэх үүрэг бүхий ажлын хэсэг/-т хүлээн авна.

Холбоо барих албан тушаалтан: Ажлын хэсгийн нарийн бичгийн дарга, Хуулийн газрын Эрх зүйн мэдээлэл, лавлагааны хэлтсийн Pеферент Б.Хангай (Харилцах утас:51-265152, Өрөө:Төрийн ордон, 334 тоот)

2.Нэр дэвшүүлэх байгууллага:

• Эрдэм шинжилгээ, судалгааны байгууллага;
• Их, дээд сургууль;
• Төрийн болон бусад байгууллага.

3.Нэр дэвшүүлэх бүтээлийн чиглэл:

• Монгол Улсын Их Хурлын хууль тогтоох, хянан шалгах, төлөөллийн үйл ажиллагааны онол, арга зүйг боловсронгуй болгох;
• Парламентат ёс, парламент судлал, үндсэн хуулийн болон захиргааны эрх зүй, үндэсний эрх зүйн тогтолцоог хөгжүүлэх;
• Судалгаа, шинжилгээнд суурилсан хууль тогтоох үйл ажиллагааг бэхжүүлэх.

4.Тавигдах шаардлага:

Холбогдох байгууллагаас эрдэмтэн, судлаач, судлаачийн багийн туурвисан ном, эсхүл гадаад улсын нэр хүнд бүхий эрдэм шинжилгээний сэтгүүлд нийтлэгдсэн судалгааны өгүүлэл (цаашид “бүтээл” гэх)-ийг нэр дэвшүүлэх бөгөөд уг бүтээл нь зохиогчийн эрхийн зөрчилгүй байна.

5.Бүрдүүлэн ирүүлэх баримт бичиг:

• Нэр дэвшүүлж байгаа бүтээл;
• бүтээлийг нэр дэвшүүлсэн байгууллагын эрдмийн зөвлөл, төрийн байгууллага болон бусад байгууллагын хурлын дэлгэрэнгүй тэмдэглэл, албан ёсны шийдвэр;
• бүтээлийн Монгол Улсын Их Хурлын хууль тогтоох, хянан шалгах, төлөөллийн үйл ажиллагааны онол, арга зүйг боловсронгуй болгох, парламентат ёс, парламент судлал, Үндсэн хуулийн болон захиргааны эрх зүй, үндэсний эрх зүйн тогтолцоог хөгжүүлэх, судалгаа, шинжилгээнд суурилсан хууль тогтоох үйл ажиллагааг бэхжүүлэх чиглэлээр оруулсан хувь нэмэр, үр дүн, бүтээлд дэвшүүлсэн шинэлэг санааг тайлбарласан дэлгэрэнгүй танилцуулга;
• бүтээлийн талаар тухайн салбарын хоёроос доошгүй эрдэмтний шүүмж, эсхүл мэргэжлийн холбооны удирдах төв байгууллагаас бүтээлд өгсөн тодорхойлолт;
• бүтээл туурвисан эрдэмтэн, судлаачийн танилцуулга;
• Эрдэмтэн, судлаачийн бүтээлийн жагсаалт;
• Бүтээлээс гадаад улсын судалгааны бүтээлд эшлэл авсан бол энэ тухай баримтыг хавсаргах.

 

МОНГОЛ УЛСЫН ИХ ХУРЛЫН ТАМГЫН ГАЗАР