Гренландын оршин суугч бүрд 100 мянган доллар олгох хувилбарыг хэлэлцжээ

       Гренландыг Дани улсаас салгаж, АНУ-д нэгтгэх тухай яригдаж буй энэ үед Америкийн албаны хүмүүс тус арлын оршин суугчдад нэг удаагийн нөхөн төлбөр олгох асуудлыг хэлэлцжээ.

Энэ тухай нөхцөл байдлыг сайн мэдэх дөрвөн эх сурвалж ярьсан байна. Нэрээ нууцалсан хоёр эх сурвалжийн мэдээллээр, нэг хүнд 10-100 мянган ам.доллар олгох асуудлыг хэлэлцсэн боловч тодорхой хэмжээ, олгох механизмыг тохиролцоогүй ажээ. Хэлэлцүүлэгт Цагаан ордны туслахууд оролцсон байна.

Дани улсад харьяалагддаг өөртөө засах эрх бүхий Гренландын оршин суугчдад шууд төлбөр олгох нь 57 мянган хүн амтай тус арал дээр хяналтаа тогтоох гэсэн АНУ-ын оролдлогуудын нэг хувилбар юм. Гренландыг худалдахгүй гэж Копенгаген, Нүүкийн эрх баригчид мэдэгдэж буй энэ үед уг асуудлыг хэлэлцжээ. Харин Даниас улс төр, эдийн засгийн хувьд хамааралт байдлаас ангижирч, тусгаар тогтнох талаар удаан хугацаанд ярилцаж буй гренландчуудын хувьд мөнгө олгох хувилбарыг “басамжлан доромжилсон хэрэг” хэмээн хүлээн авч магадгүй юм. АНУ-ын Ерөнхийлөгч Д.Трамп тус арлыг АНУ-д хавсарган нэгтгэх шаардлагатай гэдгийг хэдэнтээ мэдэгдэж байсан билээ.

Эхний бүрэн эрхээ хэрэгжүүлж байхдаа тэрбээр арлыг худалдан авах санал тавьж байсан бол өнгөрсөн оны 3 дугаар сард түүнийг АНУ-д нэгтгэх боломжтой хэмээн мэдэгдээд, татгалзсан тохиолдолд Данийн бараанд худалдааны өндөр татвар ногдуулна гэж сүрдүүлж байв. 

Харин Данийн Ерөнхий сайд Метте Фредериксен үүнийг эсэргүүцэж, Гренланд бол Данийн хаант улсын нэг хэсэг хэмээн мэдэгджээ.  Сануулан дурдахад, АНУ-ын Төрийн нарийн бичгийн дарга Марко Рубио Конгресст мэдэгдэл хийхдээ “Трамп Гренландыг эзлэх авах бус харин худалдан авахаар төлөвлөж байна” гэсэн юм. Харин Цагаан ордны хэвлэлийн төлөөлөгч К.Ливитт мэдэгдэхдээ, Гренландад довтлон орох хувилбарыг Трамп үгүйсгэхгүй байна гэсэн байна. Ирэх долоо хоногт М.Рубио Данийн албаны хүмүүстэй уулзаж, нөхцөл байдлыг хэлэлцэхээр төлөвлөжээ.