АНУ-ын Ерөнхийлөгч Дональд Трампын засаг захиргаа 75 улсын иргэдэд олгох цагаачлалын визийн боловсруулалтыг хугацаагүйгээр зогсоохоор болсноо мэдэгдлээ. Энэ явдал АНУ руу хууль ёсоор нэвтрэх сувгуудыг хязгаарлах хамгийн өргөн хүрээтэй алхмуудын нэг болж байна.
Албаны хүмүүсийн үзэж буйгаар нэгдүгээр сарын 21-нээс хэрэгжиж эхлэх энэхүү шийдвэр нь нийгмийн халамжид ачаалал үүсгэх магадлалтай өргөдөл гаргагчдыг онилж байгаа бөгөөд үүнийг Засгийн газрын тэтгэмжид тулгуурлан амьдарч болзошгүй хүмүүс гэж тодорхойлжээ. Төрийн департамент нийгмийн сүлжээндээ “Америкийн татвар төлөгчдийн халамжийг өндөр түвшинд ашигладаг цагаачидтай 75 улсын иргэдийн цагаачлалын визийн боловсруулалтыг түр зогсооно” хэмээн мэдэгдсэн байна.
Мэдэгдэлд “АНУ-д шинээр ирэх цагаачид Америкийн ард түмний баялгийг сорохгүй гэдгийг баталгаажуулах хүртэл энэхүү шийдвэр үргэлжилнэ. Америкийн ард түмний өгөөмөр сэтгэл цаашид ашиглагдахгүй байхаар бид ажиллаж байна” гэж дурдсан байна.
Төрийн департаментын Ерөнхий дэд хэвлэлийн төлөөлөгч Томми Пиготт:
“Эдгээр 75 улсаас ирэх цагаачлалын визийн боловсруулалтыг түр зогсоож, халамж болон нийтийн тэтгэмж авах зорилготой гадаадын иргэд АНУ-д нэвтрэхээс сэргийлэхийн тулд визийн журмыг дахин үнэлж шалгана” гэжээ.
Трампын засаг захиргааны цагаачлалын эсрэг бодлого дээд хэмжээндээ хүрч эрчимжиж байна. Төрийн департамент Трамп дахин засгийн эрхэнд гарснаас хойш 100 мянга гаруй визийг цуцалсан гэж мэдэгдсэн бол Дотоодын аюулгүй байдлын яам өнгөрсөн сард 605 мянгаас дээш хүнийг албадан гаргасан, мөн 2.5 сая хүн өөрсдийн хүсэлтээр улсаас гарсан гэж мэдээлжээ.
Засаг захиргаа ялангуяа Миннесота мужид гарсан залилангийн хэргүүд болон холбооны мөрдөн шалгалтуудтай холбогдуулан Сомали гаралтай америкууд дээр онцгой анхаарал хандуулж байна. Өнгөрсөн сард болсон Засгийн газрын хуралдааны үеэр Трамп Миннесота мужаас сонгогдсон Ардчилсан намын гишүүн Илхан Омарыг “хог” хэмээн доромжилж, сомаличуудыг АНУ-д байлгахыг хүсэхгүй байгаагаа илэрхийлээд “ирсэн газартаа буцах ёстой” гэж хэлжээ.
Цагаачлалын бодлогын мэргэжилтнүүд энэхүү алхам нь виз олгохоос татгалзсан хүмүүсээс давсан, илүү өргөн хүрээний сөрөг үр дагавартай гэж анхааруулжээ.
АНУ-ын албаны эх сурвалжийн мэдээлснээр уг шийдвэрт дараах улсууд багтжээ.
Афганистан, Албани, Алжир, Антигуа ба Барбуда, Армени, Азербайжан, Бахамын арлууд, Бангладеш, Барбадос, Беларусь, Белиз, Бутан, Босни, Бразил, Мьянмар (Бирм), Камбож, Камерун, Кабо-Верде, Колумб, Конго, Куба, Доминика, Египет, Эритрей, Этиоп, Фижи, Гамби, Гүрж, Гана, Гренада, Гватемал, Гвиней, Гаити, Иран, Ирак, Зааны ясан эрэг, Ямайка, Йордан, Казахстан, Косово, Кувейт, Киргизстан, Лаос, Ливан, Либери, Ливи, Македон, Молдова, Монгол, Монтенегро, Марокко, Балба, Никарагуа, Нигери, Пакистан, Конго Бүгд Найрамдах Улс, Орос, Руанда, Сент-Китс ба Невис, Сент-Люсиа, Сент-Винсент ба Гренадин, Сенегал, Сьерра-Леоне, Сомали, Өмнөд Судан, Судан, Сири, Танзани, Тайланд, Того, Тунис, Уганда, Уругвай, Узбекистан, Йемен.
Эх сурвалж: Хүрэлбаатар БЯМБАЖАРГАЛ itoim.mn
Facebook
Twitter
Youtube
Саудын Араб Улаан тэнгисээр газрын тос нийлүүлж эхэлжээ
Анагаах ухааны салбарын Нобелийн шагналтнууд тодорлоо
Дэлхийн томоохон эдийн засгууд мөнгөний бодлогоо чангарууллаа
Японд үер, хөрсний гулгалтын аюулаас сэрэмжлүүлэв
Сансрын орчинд 14 төрлийн ургамал ургуулжээ
Ши Жиньпин 11 жилийн дараа АНУ дахь айлчлалаа эхлүүлж байна
Букерийн шагналын эцсийн шатанд шалгарсан бүтээлүүдийг зарлажээ
Хуульч О.Билгүүн: Иргэн худал мэдээлэл тараасан постоо устгасан ч нөгөө талд нэр төрөө сэргээлгэх боломжтой
Сэтгэгдэл бичих