Сургууль, цэцэрлэгийн орчинд хеликобактерын шинжилгээ авч, ариутгах тоног төхөөрөмжөөр хангана

      Үе тэнгийн дээрэлхэлтээс урьдчилан сэргийлэх, сурагчдаас хеликобактерын шинжилгээ авах зэрэг ажлуудын талаар НЗД-ын орлогч А.Амартүвшин мэдээлэл өглөө.

Тэрээр" Үе тэнгийн дээрэлхэлтийн асуудлаар нийслэлийн удирдлагууд болон олон улсын байгууллагууд дээрх асуудлыг сүүлийн хоёр жил судалж, тодорхой арга хэмжээг авахаар шийдвэрлэж буй. Үе тэнгийн дээрлхэлт гурван хэлбэрээр далд явагдаж байна. Үүнд, аман байдлаар буюу доромжлох, бие махбодын буюу цохих, зодох цахимаар дээрэлхэх зэргээр далд байдлаар үйлдэгдэж байна. Энэ тус бүрд бид тусгай арга хэмжээ авна. Тухайлбал, аман дээрэлхэлтийг зогсооход хувийн хэрэгт тэмдэглэл оруулна. Хэрэв хүүхдүүд нэгнийгээ элдэв үгээр доромжилж байгаа нь тогтоогдвол хувийн хэрэг дээр нь үе тэнгийнхнээ дээрэлхсэн гэж бичдэг болно. Ингэж байж тухайн хүүхэд, эцэг эхийг хариуцлагжуулна. Ёс бус үйлдэл, үг хэл гаргасан сурагчид эхлээд сануулга өгнө. Улмаар сэтгэл зүйчтэй ярилцуулна, яагаад дээрэлхэж байгаа учир шалтгааныг тогтооно, эцсийн шатанд засрахгүй бол хувийн хэрэгт нь бичнэ. Хувийн хэрэгт тэмдэглэл оруулбал цаашид их сургуульд орох, гадаад сурч боловсроход асуудал үүснэ.

Харин бие махбодын дээрэлхэлтийг сургууль, цэцэрлэгийн дотоод болон гадаах камеруудаар олж, тогтооно. Улмаар камерийн системийг хиймэл оюун ухаантай хослуулж хянана" гэв. 

Үргэлжлүүлэн тэрээр" Монгол Улсад бүртгэлтэй байгаа хавдрын 20 орчим хувь нь хоол боловсруулах эрхтэнтэй холбоотой хавдар эзэлж байна. Хоол боловсруулах эрхтний хавдрын 80-85 хувь нь хеликобактерын халдвартай шууд хамааралтай байдаг гэх судалгаа бий. Иймд бид энэ асуудлыг том зургаар нь авч үзэн сургууль болон цэцэрлэгийн орчинд хеликобактерын шинжилгээ авч, ариутгах тоног төхөөрөмжөөр хангах санаачилга гаргасан" гэлээ.