Риновирусээс хамгаалах арга бол амны хаалт зүүж, гараа савандаж угаах

Тус улсад риновирусээр үүсгэгдсэн амьсгалын замын халдварын дэгдэлт эрчимжиж, гэнэтийн нас баралтын тоо нэмэгдэж байгаа талаар мэдээлж байна. Эрүүл мэндийн эх сурвалжуудын мэдээлснээр риновирус, амьсгалын замын синцитиал вирус (RSV), H3N2 томуугийн вирус зэрэг хэд хэдэн төрлийн вирус давхар эргэлтэд орсноор нөхцөл байдал хүндрээд байгаа аж.

Риновирусын халдвар авсан тохиолдолд ихэвчлэн хамар битүүрэх, нус гоожих, найтаах зэрэг шинж тэмдэг илэрнэ. Ялангуяа астма, уушгины архаг бөглөрөлт өвчтэй хүүхэд, ахмад настнуудад хүндрэл гарах эрсдэл өндөр. Уг халдвар нь томуутай харьцуулахад ихэнхдээ хөнгөн явцтай байдаг.

Риновирус шинэ вирус биш ч агаар дусал, ахуйн хавьтал зэрэг олон замаар халдварладаг онцлогтой. Үүний улмаас хүүхэд, залуучууд халдварыг амархан авч, богино хугацаанд хүндрэх эрсдэл өндөр байгааг анхааруулж байна. Мөн зарим тохиолдолд “цагаан уушиг” хэмээн нэрлэгддэг шинж тэмдэг илэрч, уушги хэдхэн цагийн дотор ажиллахаа больж байгаа нь эндэгдэл нэмэгдэх гол шалтгаан болж болзошгүй гэж үзэж байна.

Одоогоор риновирусын эсрэг тусгай эм, вакцин байхгүй тул гараа тогтмол угаах, өрөө тасалгааг ойр ойрхон агааржуулах, халдвар авсан хүмүүстэй ойр харьцахаас зайлсхийх, хувийн эд зүйлсийг хуваалцахгүй байх зэрэг урьдчилан сэргийлэх арга хэмжээг чанд сахих нь халдвар тархалтыг бууруулахад чухал ач холбогдолтой гэжээ.

Сар шинийн баяр дөхөж байгаатай холбогдуулан мэргэжилтнүүд БНХАУ руу зорчихоос аль болох зайлсхийх, бэлэг сэлт, ахуйн эд зүйлс авчрахгүй байхыг зөвлөж байна. Хатуу гадаргууд наалдаж удаан тогтох чадвартай вирус тул халдвар дамжин орж ирэх эрсдэл өндөр байгааг ч онцолжээ.