Б.Батцэцэгийг 2027 оны Ерөнхийлөгчийн сонгуульд нөөцөлж, М.Оюунчимэг, Д.Үүрийнтуяа нар СДМЭХ-ны Ерөнхийлөгчид өрсөлдөх үү

     МАН-д Монгол Улсын Ерөнхийлөгчийн 2027 оны сонгууль, УИХ-ын 2028 оны сонгууль угтсан эрх мэдлийн хуваарилалт үргэлжилж байна. Тус намын дэргэдэх СДМЭХ-ны хурал 2026 оны хоёрдугаар сарын 14-нд болно. Энэ удаагийн хурлаар МАН-ын дэргэдэх эмэгтэйчүүдийн байгууллага шинэ Ерөнхийлөгчөө сонгоно. Өөрөөр хэлбэл, УИХ-ын дэд дарга асан Х.Булгантуяагийн оронд хэн СДМЭХ-г удирдах вэ гэдэг өрсөлдөөн эрх баригч хүчний эмэгтэй гишүүдийн дунд өрнөж эхэлсэн. СДМЭХ-ны Ерөнхийлөгч болно улс төрийн гол түлхүүр баригчдын нэг болно гэсэн үг. МАН-ын Удирдах зөвлөлд квотоор багтаж, Бага хурлын гишүүн болж, УИХ-ын сонгуульд жагсаалтаар нэр дэвшигчдийн эхэнд багтах боломжтой. Мөн УИХ, НИТХ, орон нутгийн сонгуульд эрх баригч хүчний эмэгтэй гишүүдээс хэн хэнийг нэр дэвшүүлэх вэ, хэнийг ямар албан тушаалд томилох вэ гэдгийг шийдэх эрх мэдлийн хуваарилалтад оролцох эрх СДМЭХ-ны Ерөнхийлөгчид бий. Тиймээс “Үндсэн хууль зөрчсөн” гэх Цэцийн дүгнэлттэй, “Төрийн эрхийг хууль бусаар авахыг завдсан” гэдэг үндэслэлээр тагнуулын байгууллагад шалгагдаж буй гэх Х.Булгантуяагийн оронд СДМЭХ-ны Ерөнхийлөгч болж, 2027, 2028 оны сонгууль угтсан улс төрийн нэг гол дүрээр тодрох МАН-ын дараагийн эмэгтэй лидер хэн бол... Б.Батцэцэг үү, М.Оюунчимэг үү, Д.Үүрийнтуяа юу...

Б.Батцэцэгийн хувьд, 2016-2020 онд Гадаад харилцааны дэд сайд, 2021 оноос одоог хүртэл Гадаад харилцааны сайдаар ажиллаж байгаа. Түүнийг Гадаад харилцааны сайдаар ажиллах хугацаанд Монгол Улсын гадаад харилцаанд ахиц дэвшил гарсан гэж ажиглагчид дүгнэдэг. УИХ-ын 2024 оны сонгуульд хангайн бүсэд нэр дэвшиж УИХ-ын гишүүн болсон түүнийг “Монгол Улсын Ерөнхийлөгчийн 2027 оны сонгуульд нэр дэвших магадлалтай кандидатуудын нөөцөд бий” гэж улс төрийн хүрээнийхэн ярьдаг. Тиймээс сайд Б.Батцэцэг ирэх сарын 14-нд болох СДМЭХ-ны хурлын үеэр тус холбооны Ерөнхийлөгчид нэр дэвшиж, МАН-ын эмэгтэйчүүдийн хамгийн том лидер нь болж Монгол Улсын Ерөнхийлөгчийн 2027 оны сонгуульд нэр дэвших үү гэдэг анхаарал татаж байгаа юм. Дараагийн кандидат бол УИХ-ын гишүүн асан, “Эрдэнэс критикал минералс” ТӨҮГ-ын дэд захирал М.Оюунчимэг. УИХ-ын 2016, 2020 оны сонгуульд Чингэлтэй дүүрэгт нэр дэвшиж ялалт байгуулж байсан, эрх баригч хүчин дэх хашир туршлагатай гишүүдийн нэг. УИХ-ын Өргөдлийн байнгын хорооны дарга, НББХ-ны даргаар ажиллаж байхдаа тэрбээр эмийн мафийн эсрэг зоригтой дуугарч байв. УИХ-ын гишүүнээр хоёр ч удаа сонгогдон ажиллаж байсан М.Оюунчимэгийг МАН-ын эмэгтэйчүүд СДМЭХ-ны Ерөнхийлөгчөөр сонгохыг үгүйсгэхгүй. СДМЭХ-ны Ерөнхийлөгч болохоор амбицалж яваа хүн бол УИХ-ын гишүүн Д.Үүрийнтуяа. МАН-ын даргын төлөөх тулаан өнгөрсөн намар Төрийн ордонд ширүүсэх үеэр тэрбээр Д.Амарбаясгалан, Л.Оюун-Эрдэнэ нарын эсрэг, Г.Занданшатарын талд зогссон. Түүнийхээ хариуд Х.Булгантуяагийн оронд СДМЭХ-ны Ерөнхийлөгчийн сэнтийд заларч, шагналаа авах урт холын бодол түүнд бий. Гэвч МАН бол Монголын хамгийн нөлөө бүхий улс төрийн хүчин. УИХ-д анх удаа сонгогдож, өнгөрсөн намрын халуун улс төрд олны хэсэгт тоглосон Д.Үүрийнтуяад СДМЭХ-ны Ерөнхийлөгчийн тамгыг атгуулах нь юу л бол. Тэгэхээр Б.Батцэцэг, М.Оюунчимэг нарын нэг нь, аль эсвэл Ерөнхийлөгч У.Хүрэлсүхийн дэмжлэг бүхий өөр кандидат СДМЭХ-ны Ерөнхийлөгч болох болов уу. Учир нь СДМЭХ-ны Ерөнхийлөгч хэн болохыг МАН-ын үе үеийн дарга, лидерүүд шийддэг. М.Энхболдын үед Д.Оюунхорол, Ц.Цогзолмаа, У.Хүрэлсүхийн үед Д.Сарангэрэл, Л.Оюун-Эрдэнийн үед Х.Булгантуяа нараар МАН-ын дэргэдэх эмэгтэйчүүдийн байгууллагыг удирдуулж байснаас харвал шүү дээ.

С.Тулга