ICE-ийг эсэргүүцсэн жагсаалууд дахин шатдаун үүсгэж магадгүй байна

      ВАШИНГТОН, 2026 оны нэгдүгээр сарын 27 /DW/. Миннесота муж улсын Миннеаполис хотод Цагаачлал, гаалийн албанаас (ICE) явуулсан ажиллагааны үеэр 37 настай Алекс Претти гэдэг эрэгтэй буудуулан амиа алдсаныг эсэргүүцсэн жагсаал АНУ-д улам өргөжжээ. Миннеаполис хотод Преттигийн дурсгалд зориулсан гашуудлын ажиллагаа ням гарагт болсон байна.

ICE-ийн ажилтнууд өөрийгөө хамгаалах зорилгоор буудсан гэж эрх баригчид мэдэгдсэн боловч цахим орчинд нийтлэгдсэн дүрс бичлэгүүд эргэлзээ төрүүлжээ. 

Үүний зэрэгцээ Конгресс дахь Ардчилсан намынхан ICE-ийн төсвийн санхүүжилтийг зогсоох замаар Цагаан ордонд үзүүлэх шахалтаа чангатгахаар төлөвлөж байна. Харин Бүгд найрамдах намынхан "нөхцөл байдлыг улам хурцатгаж байна" гэж Ардчилсан намынхныг буруутгажээ.

Ардчилсан намынхан Дотоод аюулгүй байдлын яамны төсвийн багцад багтсан ICE-ийн санхүүжилтийн тухай хуулийн төслийг зогсоох санал  өгөхөөр төлөвлөж байна. Хэрэв Конгресс дах хоёр намын гишүүд тохиролцоонд хүрч чадахгүй бол баасан гарагт АНУ-ын засгийн газрын үйл ажиллагаа хэсэгчлэн зогсож магадгүй байна. Учир нь түр төсвийн хүчинтэй хугацаа дуусна. 

Сенатын танхим дахь Ардчилсан намын бүлгийн дарга Чак Шумер мэдэгдэхдээ, түүний намынхан нь төсвийн зардалтай холбоотой хуулийн төсөлд үндэслэлтэй өөрчлөлтүүдийг оруулахыг оролдсон хэдий ч Трампаас зайгаа барихаас Бүгд найрамдах намынхан татгалзсан учраас нам нь эсэргүүцсэн санал өгнө гэжээ. “Миннесотод юу болоод байна вэ? Энэ бол аймшигтай явдал” гэж тэрбээр Х нийгмийн сүлжээнд бичжээ.

Төсвийн тухай хуулийг батлахын тулд Сенатад 53 суудалтай Бүгд найрамдах намынхан дор хаяж 60 санал авах шаардлагатай, энэ нь ардчилсан намынхны дэмжлэгээс шууд хамааралтай болгож байна.

АНУ-ын Ерөнхийлөгч Д.Трамп Претти амиа алдсан явдлын хариуцлагыг Ардчилсан намынхан хүлээх ёстой гэж мэдэгдээд муж улс, хотын эрх баригчдад хандан холбооны засгийн газартай хамтран ажиллахыг шаардсан байна. Тухайлбал, тэрбээр Миннесота муж улсын захирагч Тим Уолцод хандан шоронд байгаа бүх хууль бус цагаачийг албадан гаргахад хамтран ажиллаж, холбооны агентлагуудад шилжүүлэн өгөхийг уриалжээ.