"Милан Кортина 2026" өвлийн 14 дэх удаагийн паралимпын наадам гуравдугаар сарын 6-аас 15-ны өдрүүдэд болох ба Монгол Улсаас цанын төрөлд дөрвөн тамирчин өрсөлдөнө. Тодруулбал, пара гүйлтийн цанын эрэгтэйчүүдийн 10, 20 км-ын зайд Б.Ганболд, Ц.Дашдорж нар уралдах бол суугаа цанын спринт зайд А.Сэлэнгэ, пара уулын цаныг төрөлд Б.Цэрэнпунцаг нар өрсөлдөхөөр бэлтгэл сургуулилтаа хангаж байна.
Энэ удаагийн паралимпийн наадамд 670 тамирчин уулын цана, гүйлтийн цана, биатлон, пара сноуборд, пара мөсөн хоккей, тэргэнцэртэй керлинг гэсэн зургаан спортын 79 төрлөөр өрсөлдөнө.
Одоогоор Б.Ганболд, Ц.Дашдорж нар паралимпын наадамд оролцох эрхийн оноогоо авсан байгаа бол үлдсэн хоёр тамирчдын хувьд баталгаажуулалт хараахан ирээгүй ч онооны байдлаар энэ удаагийн наадамд оролцох тодорхой байгаа юм.
Үндэсний шигшээ багийн тамирчин Б.Ганболдын хувьд дөрөв дэх паралимпдоо оролцох гэж байна. Тэрээр 2013 онд АНУ-ын Солт Лейк хотноо болсон Сочигийн наадмын сонгон шалгаруулах тэмцээнээс цанын спринт 1.5 км төрөлд мөнгөн медаль хүртэж, пара цаначдын анхны олон улсын тэмцээний эрхийг эх орондоо авчирч байсан. Үүний дараа Шведэд болсон ДАШТ-д оролцож, 60 тамирчнаас 18 дугаар байранд жагсжээ. Энэ амжилтаараа Сочигийн паралимпод оролцох эрхтэй болсон байна. “Сочи 2014” паралимп түүний хувьд хамгийн анхны том тэмцээн байсан ч гэлээ 20 км-ын зайд 14 байрт орсон юм. Гэхдээ тэрбээр цанын спортоор хичээллээд нэг жил зургаан сарын дараа Паралимпод өрсөлдөж байжээ. Тэрбээр “Сочи-2014”, "Пёнчан-2018”, “Бээжин-2022” өвлийн Паралимпын наадамд оролцож байсан, Азийн цомын хүрэл медальтай тамирчин билээ.
Пара цанын тамирчин Ц.Дашдорж нь Монгол Улсын үндэсний шигшээ багийн бүрэлдэхүүнд багтан Швед болон Норвеги улсад болсон олон улсын тэмцээнүүдэд амжилттай оролцож байсан тамирчин юм. Тэрбээр Дэлхийн цомын 12.5 км-ын зайд 5-р байр, спринт зайд 13-р байр эзэлж, "Бээжин-2022" өвлийн паралимпын наадамд оролцож байсан бөгөөд энэ удаад хоёр дахь Өвлийн паралимпын наадамдаа ийнхүү оролцохоор бэлтгэлээ базааж байна.
Суугаа цанын спринт зайд өрсөлдөх А.Сэлэнгэ паралимпын наадамд оролцох эрх авсан Монголын анхны эмэгтэй тамирчин болж байна. Түүний хувьд өмнөх онд Япон улсад зохион байгуулагдсан Азийн цомоос хүрэл медаль хүртсэнээр паралимпын наадамд оролцох эрхтэй болсон юм.
Б.Цэрэнпунцагийн хувьд паралимпын наадамд уулын цанаар өрсөлдөж байсан анхны монгол тамирчин билээ. Монголын Пара уулын цанын үндэсний шигшээ багийн тамирчин Б.Цэрэнпунцаг Словак улсын Кубинска Хола цанын баазад зохион байгуулагдсан “Милан–Кортино 2026” Паралимпын эрх олгох слаломын ангиллын тэмцээнд амжилттай оролцон алт болон мөнгөн медаль хүртэж, паралимпод оролцох эрхээ авсан билээ.
Өвлийн паралимпын наадамд манай улсаас анхлан оролцсон тамирчин нь Н.Сүхбаатар бөгөөд тэрээр “Турин-2006” өвлийн паралимпын наадамд гүйлтийн цанын төрөлд өрсөлдөж байв.
Эх сурвалж: Батхуяг МӨНХЗУЛ itoim.mn
Facebook
Twitter
Youtube
Ерөнхий сайд асан Г.Занданшатар ASEAN E-Sports Chess Cup олон улсын тэмцээнд хүндэт зочноор оролцож байна
Монголд өсвөрийн шатарчдын дэлхийн цом болон ДАШТ болно
Азийн Шатрын Холбооны Академийн Монгол дахь салбарын нээлт болно
ХЭҮК: Мэдээндээ албан тушаалтны зураг ашигласан нь хүний эрхийн зөрчил гэж үзсэн С.Ганзоригийг төрийн албанаас хална
Монголын циркчид Хүрэл цом авчээ
Г. Болор-Эрдэнэ хагас шигшээд шалгарчээ
Шатрын Азийн аварга шалгаруулах тэмцээн өнөөдөр эхэлнэ
Г.Занданшатар: Монголд шатрын спортыг хөгжүүлэх зорилгоор Олон улсын шатрын холбоотой хамтран Боловсролын яамны дэмжлэгтэйгээр хөтөлбөр хэрэгжүүлнэ.gif)
.gif)
Сэтгэгдэл бичих