Ойрхи дорнодоос буцах хүсэлтээ өгсөн148 иргэнийг авчрах боломжийг судалж байна

        Монгол Улсын 469 иргэн Ойрх дорнодод байна

Иран улсад АНУ, Израилын хамтарсан цэргийн ажиллагаа эхэлснээр Ойрхи дорнодын орнууд агаарын хилээ бүрэн болон хязгаарлагдмал байдлаар тодорхойгүй хугацаанд хаагаад байна. Тодруулбал, Бахрейн, Катар, Иран, Кувейт улсын хил бүрэн хаалттай байгаа бол АНЭУ-ын агаарын хил бүхэлдээ хаагдаагүй байгаа ч ихэнх хугацаанд үйл ажиллагаа нь хязгаарлагдсан байна. Энэхүү довтолгооны улмаас Иран улсад өчигдрийн байдлаар 900 гаруй хүн амиа алдсан гэх мэдээлэл гараад байна. Түүнчлэн Ойрх дорнодын орнуудын 20 мянга гаруй нислэг цуцлагдаж хэзээ сэргэх нь тодорхойгүй байгаа юм.

Иймд гадаадын улс орнуудад иргэдээ эх орондоо авчрахаар ажиллаж эхэлжээ. Тухайлбал, Их Британийн 130 мянга гаруй иргэн Ойрхи дорнодод байгаагаа Засгийн газартаа мэдээлсэн. Иймд тус улсын Загийн газар Оман улсын Маскат хотын нисэх буудлыг ашиглахаар төлөвлөж байгаа аж.

Монгол Улсын Гадаад харилцааны яамны Консулын газрын дарга Б.Болдын мэдээлснээр Ойрхи дорнодын бүс нутагт өчигдрийн байдлаар Монгол Улсын 469 иргэн байгаа бөгөөд Засгийн газраас тухайн бүс нутагт байгаа иргэдийн аюулгүй байдлыг хангах чиглэлд яаралтай арга хэмжээ авч, мэдээллээр хангаж, заавар, зөвлөгөөг өгч байна. Монгол иргэд Иран, Израил болон тус бүс нутгийн 10 гаруй улсад байгаа бөгөөд үүнээс 321 нь байнга оршин суугч, 148 нь түр зорчиж байгаа иргэд байна. Түр зорчиж буй 148 иргэн бүгд тухайн улс дахь Элчин сайдын яамд буцах хүсэлтээ илэрхийлжээ. Мөн байнга оршин суугчдаас 20 иргэн эх орондоо буцах хүсэлт гаргаад байна. Иргэдийн оршин суугаа улсын тодруулбал, АНЭУ-д 234, Катарт 61, Египетэд 58, Израилд 40, Саудын Арабд 30, Бахрейнд 21 нь, Кувейтд 19, Йорданд 2, Оманд 2, Иранд 2 иргэн тус тус байна.

“Элчин сайдын яамныхан иргэдийнхээ бүртгэлийг хийж, нэг групп чатанд нэгтгэж, мэдээллээр хангаж байна”

Дайны бүсэд байгаа монголчууд эх орон руугаа буцах боломж, гарц шийдэл гаргаж өгөхийг Элчин сайд яамдаас хүсэж байна. Гэвч өдөр бүр тухайн бүс нутгийн нөхцөл байдал өөрчлөгдөж байгаа учраас нэгдсэн шийдэл гаргах боломжгүй байгаа ч боломжит хувилбарыг судалж буйгаа Гадаад хэргийн яам тайлбарласан юм.

Иймд АНЭУ-ын Дубай хотод түр зорчиж буй иргэн З.Баасанжаваас нөхцөл байдлын талаар тодруулсан юм. Тэрээр 2026 оны хоёрдугаар сарын 27-нд Дубай хотод бууж, гуравдугаар сарын 5-ны орой буцах нислэгтэй байжээ. “Одоогийн байдлаар Дубай хотод нөхцөл байдал тайван байна. Учир нь энэ улс иргэдийнхээ аюулгүй байдлыг хамгаалахаар агаарын хилээ хааж, ямар нэгэн дайралтыг агаарт устгаж байгаа. Хэдийгээр бөмбөгдөлтөд өртөх аюулгүй байгаа ч хоёрдугаар сарын 28-наас нислэг нь цуцлагдсан иргэд эдийн засаг болон эрүүл мэндийн асуудлаас болж, сэтгэл зүй нь харилцан адилгүй байна” гэсэн юм. Түүнчлэн “Манай Элчин сайдын яамныхан энд байгаа иргэдийнхээ бүртгэлийг хийж, биднийг нэг групп чатанд нэгтгэж, мэдээллээр хангадаг. Оман руу явахыг Элчин сайдын яамнаас уриалахгүй байгаа бөгөөд үүнийг иргэдийн сонголт хэмээн үзэж байна. Учир нь Оман Монгол Улсын иргэдэд визтэй учраас онлайнаар хүсэлт илгээх шаардлагатай. Мөн виз хэзээ гарах нь тодорхойгүй тул цаг хугацаа алдах, цаашлаад аюулгүй байдлын баталгаагүй учир иргэдэд сонголтыг нь үлдээж байна” гэх гуравдугаар сарын 5-ны үдээс өмнөх нөхцөл байдлыг мэдээлсэн юм.

Хилийн чанадад ажиллаж, амьдарч буй иргэдэд дэмжлэг үзүүлэх зорилготой “Иргэдэд туслах сан”-г Засгийн газрын шийдвэрээр байгуулсан. Ойрхи дорнодод үүссэн нөхцөл байдалтай холбоотойгоор тус сангаас дэмжлэг авах албан ёсны хүсэлт одоогоор ирээгүй байгаа талаар Гадаад харилцааны яамны Консулын газрын дарга Б.Болд мөн мэдээлсэн билээ.

Ойрхи дорнодын нөхцөл байдал хурцдаж байна

Гуравдугаар сарын 4-ний шөнө Ираны арми Израйлын нийслэл Тель Авив хот руу пуужин харважээ. Зарим пуужинг замд нь устгаж чадсан ч Израйлын нийслэлд дэлбэрэлтүүд болсон байна. Харин гуравдугаар сарын 5-ны өглөө Израйл улс Ираны эсрэг довтолгооны шинэ давлагаа эхлүүлж байгаагаа мэдэгдсэн юм. Энэ мэдэгдлийн дараа довтолгоо эхэлж Израил улс Ираны дэд бүтэц, цэргийн байгууламжууд, пуужингийн баазуудыг бөмбөгдсөөр байна.

Мөн гуравдугаар сарын 4-нд Энэтхэгийн далайд АНУ-ын шумбагч онгоц "торпедо" сум ашиглан Ираны байлдааны хөлгийг живүүлж өчигдрийн байдлаар 87 тэнгисийн цэрэг амь үрэгджээ. Үүний хариуд Ираны удирдлагууд "Та нар гашуунаар харамсах болно" гэж мэдэгдээд байна. Мөн Ойрхи Дорнодод байгаа АНУ-ын цэргийн бүх байгууламж баазуудыг Ираны пуужин бүрэн онилсон гэдгээ онцолжээ.