Хаврын чуулган өнөөдөр нээлтээ хийнэ

УИХ-ын хаврын ээлжит чуулганыг жил бүрийн гуравдугаар сарын 15-нд нээх хуулийн зохицуулалттай. Хэрэв энэ өдөр нь амралтын өдөр таарвал дараагийн ажлын өдөр нь нээдэг. Тиймээс энэ удаагийн хаврын чуулган өнөөдөр нээлтээ хийх гэж байна. Энэ удаагийн чуулган ойрд байгаагүй хүлээлт өндөртэй эхэлж байна. Учир нь, эрх баригч намын дотоод асуудал өндрөө авсан хэвээр, хэн нь хариу юу гэж мэдэгдэх бол гэсэн хүлээлттэй. Бас Засгийн газар сайд нараа сэлгэн томилж, дэд сайд нараа цомхотгохгүй бол огцрох айдастай. Мөн Ерөнхийлөгч чуулганы нээлтэд оролцож үг хэлэхээр болжээ. Түүний хэлэх үг олны анхаарлыг татаж байна. Хэлэх үгийнх нь агуулга УИХ-ын гишүүнийг эгүүлэн татах хуулийн төсөл болон экс Ерөнхий сайд Л.Оюун-Эрдэнийн ярилцлагадаа дурдагдсан зүйлсийн хариулт байх нь ойлгомжтой.

УИХ-ын хаврын чуулган нээлтээ хийхээс өмнө, өнөөдөр өглөө Засгийн газар ээлжит бусаар хуралдаж Боловсролын сайд Н.Наранбаяр, Эрчим хүчний сайд Б.Чойжилсүрэнг чөлөөлж, дэд сайд нараа цомхотгоно гэсэн мэдээлэл гарсан. Гэвч Засгийн газар өчигдөр орой хурлаа цуцалж байгаагаа мэдэгдлээ. Хурлаа түр хойшлуулсан ч хэлэлцэх асуудал бол хэвээрээ. Эдгээр асуудлуудыг хэлэлцэж шийдвэрлэхгүй бол АН Засгийн газрыг огцруулахаа мэдэгдсэн. Тус намын дарга О.Цогтгэрэл “АН-ын зүгээс намрын чуулганы төгсгөлөөр Засгийн газрын үйл ажиллагаа шаардлага хангахгүй байна. Бид төрөө цомхон болгох ёстой, үр ашигтай, бүтээмжтэй болгох ёстой гэдгийг нөгөө талдаа дэд сайд гэдэг данхайсан бүтцийг халж, Засгийн газарт хариуцлага тооцох асуудлыг өргөн барина гэдгээ мэдэгдсэн. Засгийн газрыг огцруулах санал өргөн барих босгоос дээш тооны гарын үзэг цуглуулсан байгаа. Тэгэхээр бидний зарчмын шаардлагууд хэвээрээ. Хаврын чуулганы эхэнд эрх баригчид, Засгийн газраас ямар нэг арга хэмжээ авахгүй бол тавьсан зарчмын шаардлага хэвээр байгаа гэдгийг хэлье” гэсэн юм.

Уг нь ирэх долоодугаар сар хүртэл УИХ дараах асуудлуудыг хэлэлцэхээр төлөвлөсөн юм. Гэхдээ улс төрийн нөхцөл байдлаас харвал хаврын чуулган эхнээсээ л төлөвлөгөөнийхөө дагуу үргэлжлэхгүй нь тодорхой байна.  

1. Монгол Улсын нэгдсэн төсвийн 2027 оны төсвийн хүрээний мэдэгдэл, 2028-2029 оны төсвийн төсөөллийн тухай хуулийн төсөл;

2. Монгол Улсын хөгжлийн 2027 оны төлөвлөгөө батлах тухай УИХ-ын тогтоолын төсөл;

3. Монгол Улсын нэгдсэн төсвийн 2025 оны гүйцэтгэл, Засгийн газрын санхүүгийн нэгтгэсэн тайлан болон Монгол Улсын 2025 оны төсвийн гүйцэтгэл батлах тухай УИХ-ын тогтоолын төсөл;

4. Ажиллах хүчний шилжилт хөдөлгөөний тухай хуульд нэмэлт, өөрчлөлт оруулах тухай хуулийн төсөл;

5. Эрүүгийн хуульд өөрчлөлт оруулах тухай хуулийн төсөл;

6. Зээлийн хэлэлцээр соёрхон батлах тухай хууль хүчингүй болсонд тооцох тухай хуулийн төсөл;

7. Цагдаагийн албаны тухай хуульд нэмэлт, өөрчлөлт оруулах тухай хуулийн төсөл болон хамт өргөн мэдүүлсэн хуулийн төслүүд;

8. Нийгмийн даатгалын ерөнхий хуульд нэмэлт, өөрчлөлт оруулах тухай хуулийн төсөл;

9. Нийтийн албан тушаалтны хууль бус хөрөнгийг иргэний журмаар нэхэмжлэх, нөхөн төлүүлэх тухай хуулийн төсөл болон хамт өргөн мэдүүлсэн хуулийн төслүүд;

10. Эрүүгийн хуульд нэмэлт, өөрчлөлт оруулах тухай хуулийн төсөл болон хамт өргөн мэдүүлсэн хуулийн төслүүд;

11. Төрөөс төмөр замын талаар баримтлах бодлогын хэрэгжилтийг хангах зарим арга хэмжээний тухай УИХ-ын тогтоолын төсөл;

12. Нэмэгдсэн өртгийн албан татварын тухай хуульд өөрчлөлт оруулах тухай хуулийн төсөл;

13. Онцгой албан татварын тухай хуульд нэмэлт, өөрчлөлт оруулах тухай хуулийн төсөл;

14. УИХ-ын тухай хуульд өөрчлөлт оруулах тухай хуулийн төсөл болон хамт өргөн мэдүүлсэн хуулийн төслүүд;

15. Боловсролын ерөнхий хуульд нэмэлт, өөрчлөлт оруулах тухай хуулийн төсөл;

16. Хүнсний бүтээгдэхүүний аюулгүй байдлыг хангах тухай хуульд нэмэлт, өөрчлөлт оруулах тухай хуулийн төсөл болон хамт өргөн мэдүүлсэн хууль, тогтоолын төслүүд;

17. Улс төрийн намын тухай хуульд өөрчлөлт оруулах тухай хуулийн төсөл;

18. УИХ-ын чуулганы хуралдааны дэгийн тухай хуульд нэмэлт, өөрчлөлт оруулах тухай хуулийн төсөл болон хамт өргөн мэдүүлсэн хуулийн төсөл;

19. Үндэсний их баяр наадмын тухай хуульд нэмэлт, өөрчлөлт оруулах тухай хуулийн төсөл болон хамт өргөн мэдүүлсэн хуулийн төсөл;

20. Монгол Улсын засаг захиргаа, нутаг дэвсгэрийн нэгж, түүний удирдлагын тухай хуульд нэмэлт, өөрчлөлт оруулах тухай хуулийн төсөл болон хамт өргөн мэдүүлсэн хуулийн төслүүд;

21. УИХ-ын чуулганы хуралдааны дэгийн тухай хуульд нэмэлт, өөрчлөлт оруулах тухай хуулийн төсөл болон хамт өргөн мэдүүлсэн хуулийн төсөл;

22. Нийгмийн ажлын тухай хуулийн төсөл болон хамт өргөн мэдүүлсэн хуулийн төслүүд;

23. Худалдаа, аж үйлдвэрийн танхимын тухай хууль (Шинэчилсэн найруулга)-ийн төсөл болон хамт өргөн мэдүүлсэн хуулийн төслүүд;

24. Эдийн засгийн эрх чөлөөний тухай хуулийн төсөл болон хамт өргөн мэдүүлсэн хуулийн төслүүд;

25. Нийгмийн хамгааллын тухай Монгол Улс болон Бүгд найрамдах Австри улс хоорондын хэлэлцээрийг соёрхон батлах тухай хуулийн төсөл;

26. Татварын ерөнхий хуульд нэмэлт, өөрчлөлт оруулах тухай хуулийн төсөл болон хамт өргөн мэдүүлсэн хуулийн төслүүд;

27. Аж ахуйн нэгжийн орлогын албан татварын тухай хуульд нэмэлт, өөрчлөлт оруулах тухай хуулийн төсөл;

28. Хувь хүний орлогын албан татварын тухай хуульд нэмэлт, өөрчлөлт оруулах тухай хуулийн төсөл болон хамт өргөн мэдүүлсэн хуулийн төсөл;

29. Нэмэгдсэн өртгийн албан татварын тухай хуульд нэмэлт, өөрчлөлт оруулах тухай хуулийн төсөл болон хамт өргөн мэдүүлсэн хуулийн төслүүд;

30. БНМАУ-ын Засгийн газарт эрх олгох тухай хууль хүчингүй болсонд тооцох тухай хуулийн төсөл болон хамт өргөн мэдүүлсэн хуулийн төсөл;

31. УИХ-ын 2026 оны намрын ээлжит чуулганы хугацаанд хийх төлөвлөгөөт хяналт шалгалтын цаглавар батлах тухай УИХ-ын тогтоолын төсөл;

32. УИХ-ын 2026 оны намрын ээлжит чуулганаар хэлэлцэх асуудлын тухай УИХ-ын тогтоолын төсөл.