Сайд Э.Бат-Амгалан УИХ-ын гишүүн, үеэл А.Ганбаатарыг БЗД-ийн АН-ын дарга болгохын тулд МАН-ын гишүүдээ “царцаа” болгосон уу

   Улс төрийн намын тухай хуулийн дагуу МАН өнгөрсөн оны сүүлчээр дотоод бүтэц, зохион байгуулалтаа шинэчилсэн. Харин АН-д эл үйл явц ид өрнөж байна. Тодруулбал, АН-ын ҮБХ-ны сонгуульд нэр дэвшигчдийн бүртгэлийг 2026 оны гуравдугаар сарын 17-19-нд зохион байгууллаа. Тус намын гишүүн Ц.Уянга өнөөдөр (2026.03.20) намынхаа гишүүдтэй хамт хийсэн хэвлэлийн бага хурлын үеэр “МАН-аас авлигын хэрэгт холбогдсон хүмүүс улс төрөөс арчигдахгүйн тулд ээлжит нүүдлээ хийж, АН-ыг нүүрсний мөнгөөр худалдан авч байгаа юм байна. Ингэж дүгнэхээс өөр аргагүй. МАН-аас зөвхөн Улаанбаатар хотод 6000 гаруй хүн “царцаа“ болон АН-д нүүж ирлээ. АН-ын дарга О.Цогтгэрэл АН-ыг МАН-д борлуулах ажлыг гардан гүйцэтгэж байна” гэж мэдээлсэн. Зарим эх сурвалжийн мэдээлснээр, МАН-аас АН руу “царцаа” нүүлгэх ажлыг Хот байгуулалт, барилга, орон сууцжуулалтын сайд Э.Бат-Амгалан хийж байгаа сурагтай. Тэрбээр Баянзүрх дүүргийн МАН-ын дарга, Засаг даргын албыг хашиж байсан. Намынх нь зарим гишүүн түүнийг “Баянзүрхийн МАН-ын хороог өөд татаж, сонгуульд ялуулсан” гэлцдэг. Барны эзнээс УИХ-ын гишүүн, сайд болсон “Давхар дээл”-тэй Э.Бат-Амгалан Баянзүрх дүүрэгт МАН-ын гишүүдээс бүрдсэн сүлжээтэй. Тиймээс тэрбээр УИХ-ын гишүүн, үеэл А.Ганбаатарыг Баянзүрх дүүргийн АН-ын дарга болгохын тулд тус дүүргийн МАН-ын гишүүдийг “царцаа” болгон нүүлгэсэн талаар улс төрийн хүрээнд ярьж байна. Хот дээр Х.Нямбаатартай тулаантай, Төрийн ордны гадаа “Огцор” гэсэн иргэдийн эсэргүүцэлтэй байгаа Э.Бат-Амгалан үеэл А.Ганбаатараа Баянзүрх дүүргийн АН-ын дарга болговол тус дүүрэг МАНАН дүүрэг болно гэсэн үг. А.Ганбаатарын хувьд, УИХ-ын 2024 оны сонгуульд АН-аас жагсаалтаар нэр дэвшиж УИХ-ын гишүүн болсон. Ц.Элбэгдоржийг Ерөнхийлөгч байхад Ерөнхийлөгчийн Тамгын газрын олон нийтийн харилцаа, нийтлэг бодлогын зөвлөхөөр ажиллаж байсан. МҮОХ саяхан Гүйцэтгэх зөвлөлийн гишүүдээ шинээр сонгоход А.Ганбаатар, ССАЖЗ-ын сайд асан Ч.Номин нар нэр дэвшсэн.

Ж.Болд