“Эрдэнэс Тавантолгой” ХК-ийн гүйцэтгэх захирал асан Б.Ганхуяг маргааш суллагдана

       Нүүрсчдийн зодооны нээкст раунд халуухан өрнөж байна. УИХ-ын дэд дарга асан Т.Аюурсайхан хорихоос суллагдсаныхаа маргааш буюу 2026 оны гуравдугаар сарын 01-нд фэйсбүүкээр дамжуулан “Л.Оюун-Эрдэнэ захиалж, намайг хилсээр нүүрсний хэрэгт холбогдуулж яллуулсан. Түүний ард намайг “Гэмт хэргүүдийг нь илчилнэ” гэсэн МАН-ын томоохон бүлэглэл бий. Надад нүүрстэй холбоотой нэг ширхэг асуудал байхгүй. Л.Оюун-Эрдэнэд хууртаж итгэсэн нь миний алдаа” гэж мэдэгдсэн. Харин Ерөнхий сайд асан Л.Оюун-Эрдэнэ өнгөрсөн даваа гарагт (2026.03.23) Хууль зүй, дотоод хэргийн сайд Б.Энхбаярыг АТГ-т шалгуулахаар болсноо мэдэгдэх үедээ “Т.Аюурсайхан “Голомт”-оос нэг сая ам.доллар авсан” гэсэн бол “Бодь интернэшнл” ХХК-ийн гүйцэтгэх захирал асан А.Амундра “Т.Аюурсайханаас “Паркийн гуравдугаар давхрын Castle ресторанд уулзаад нэг сая ам.доллар авсан уу” гэж асуугаач. Н.Удаанжаргал, Д.Баясгалан, Т.Аюурсайхан гурав уулзсан. Тэнд ажиллаж байсан хүмүүс гэрчилнэ. Зүгээр ичиж зовохоо мэддэггүй авлигачид шүү дээ, эд нар” хэмээн сэтгүүлчид хандан бичжээ. Улс төрийн халуухан хавар нүүрсний хулгай, түүнийг тойрсон хэдэн зуун сая ам.долларын авлигын хэргийн дуулианаар эрчээ авч буй энэ үед буюу маргааш “Эрдэнэс Тавантолгой” ХХК-ийн гүйцэтгэх захирал асан Б.Ганхуяг хорих ангиас суллагдах аж. Тэрбээр 2024 оны есдүгээр сарын 12-нд шүүхээс 3.9 жилийн хорих ял сонссон. Б.Ганхуягийн хувьд, нүүрсний хулгайн хамгийн гол оролцогч, гэрч гэгддэг.

Д.Оюун