УИХ-ын дэд дарга Ж.Бат-Эрдэнэ Н.Учралын эсрэг зогсож, “Бид засгийг ч, төрийг ч нурааж тоглож чадна” гэж даналзжээ

      Хэрсүү ажиглагчид “АН-ынхан “МАН-ын дарга Н.Учрал УИХ-ын даргын ажлаа өг” гэсэн улс төрийн акци өрнүүлж буйн цаана МАН-ынхан л бий” гэдэг таамгийг дэвшүүлж байгаа. Үүнээс гадна “Гадаадын дайснаас дотоодын дайсан илүү аюултай” гэдэг үг ч бий. Энэ ёсоор болж, эрх баригч хүчин дэх “Дотоодын дайснууд” эхнээсээ ил болж эхэлжээ. Тэдний нэг нь УИХ-ын дэд дарга Ж.Бат-Эрдэнэ. Монголын улс төр, нийгэмд гарахгүй муу “юм” үгүй болсон энэ цөвүүн цагт урвагчид тодрох нь нэг их гайхах хэрэг биш. Ж.Бат-Эрдэнийн хувьд, 2005 оны үед МАХН (МАН)-д Ө.Энхтүвшин тэргүүтэй гишүүд жигүүр байгуулахад тэдэнтэй нэгдэж байсан. Тэр цагаас хойш албан тушаалын лифтээр өгсөж, Зам, тээврийн хөгжлийн сайд ч болж явсан. МАН-ын даргын төлөөх тулаан өнгөрсөн намар Төрийн ордонд ширүүсэж, Үндсэн хуулийн Цэц Х.Булгантуяаг “Үндсэн хууль зөрчсөн” гэх дүгнэлт гаргасны дараа Ж.Бат-Эрдэнэ түүний оронд УИХ-ын дэд дарга болсон. Гэвч тэрбээр УИХ-ын дэд даргын суудлыг голж байгаа аж. Тиймээс УИХ-ын дарга Н.Учралын эсрэг улс төрийн акци хийж буй АН-ынхныг далдаас дэмжиж, МАН дахь хагарлыг улам сэдрээж, харин өөрөө Засгийн газарт сайд болох санаатай явааг нь эрх баригчид өнөөдөр (2026.03.26) болсон УИХ дахь МАН-ын бүлгийн хурал дээр тов тодорхой олж харснаа өөр хоорондоо ярилцаж байна. УИХ-ын дэд дарга Ж.Бат-Эрдэнэ МАН-ын бүлгийн хурал дээр яг юу гэж хэлсэн бэ. Энэ их ноцтой. Намынхан нь “Дэлхий дахинд улс төрийн нөхцөл байдал хүндэрч байна. Эдийн засгийн хямрал ч даамжирна. Ийм эрсдэлтэй үед УИХ-ыг гацаанаас яаж гаргах вэ” гэлцэж байхад Ж.Бат-Эрдэнэ “Бид Засгийн газрыг ч, төрийг ч нурааж тоглож чадна” хэмээн даналзсан тухай бүлгийнх нь гишүүд шивэр авир гэлцэж байна. Ж.Бат-Эрдэнэ бол сул гишүүн биш. УИХ-ын даргыг орлож хуралдаан даргалах эрх бүхий албан тушаалтан. Хэдийгээр тэрбээр өнгөрсөн намар Л.Оюун-Эрдэнэ, Д.Амарбаясгалан нарын талд орж, эсрэг улс төр хийж байсан ч УИХ дахь МАН-ын бүлгийнхэн түүнд итгэл хүлээлгэж Х.Булгантуяагийн оронд УИХ-ын дэд дарга болгосон. Гэвч Ж.Бат-Эрдэнэ “Ачийг бачаар” гэгчээр Н.Учрал тэргүүтэй намынхныхаа эсрэг АН-ынхантай хуйвалдан унагах, огцруулах, нураах хорыг нь найруулалцаж яваа бололтой. УИХ-ын дэд дарга нь УИХ-ын дарга Н.Учралынхаа эсрэг зогсож, МАН-ын бүлгийн хурал дээр “Бид засгийг ч, төрийг ч нурааж тоглож чадна” гэсэн нь өөрөө өөрийгөө илчилсэн хэрэг биш үү.  

Ж.Болд