Г.Занданшатар: Зохиомол гацаа, улс төрийн чөдөр тушааг тасдахын тулд би өөрөөсөө эхэлж, Монгол Улсын Ерөнхий сайдын албан тушаалаас татгалзлаа

      Ерөнхий сайд Г.Занданшатарын албан тушаалаасаа өөрийн хүсэлтээр чөлөөлөгдөх хүсэлтийг УИХ дэмжлээ.

Тэрбээр залууст хандаж "Залуучууд та бүхэн бол Монголын ирээдүй. Намайг Ерөнхий сайд болоход, тэр зун Монголын залуус тив дэлхий, олон улсад гайхамшигтай амжилт гаргаж, би та бүхнээсээ шинэ итгэл олж авсан. Тэр итгэл өнөөдөр ч миний зүрх сэтгэлд бат хэвээр байна. Би үнэн шударгын төлөө тэмцсэн. Би хулгай, луйвартай тэмцсэн. Энэ бүхний цаана ганцхан итгэл байсан. Монгол Улсад, Монголын ирээдүйн эзэд болсон залуучууд та бүхэндээ тэгш эрх, шударга ёс, итгэл найдвар авчрах ёстой гэсэн итгэл. Энэ бүх хугацаанд би та бүхний хэлээр ярьж, улс төрч хүн гэдэг хол хөндий нэгэн биш, Ерөнхий сайд, төрийн түшээ гэдэг дарга биш, харин иргэдийнхээ ойрын найз, итгэлт түнш байх ёстой гэж хичээн ажиллалаа. Үр дүнд нь та бүхэн надад “Зандан бро”, “Gen Z Ерөнхий сайд” зэрэг олон нэр хайрласан. Тэр бүхнээс би алхам тутамдаа урам зориг авч явснаа нуухгүй. Гэхдээ энэ бол төгсгөл биш. Энэ бол шинэ эхлэл. Би явж болно. Монгол Улс урагшилсаар байх ёстой. Харин шударга үнэний төлөөх тэмцэл хэзээ ч зогсох ёсгүй. Залуучууд аа, та бүгдтэйгээ хамт энэ улсын шинэ эхлэлийг, илүү шударга, илүү тэгш, илүү итгэлтэй Монголыг бүтээнэ гэдэгт би итгэж байна" гэв.