О.Цогтгэрэл “УИХ-ын даргаа цөөнхөд өг” гэсэн Ц.Нямдоржийн үгэнд дөрөөлж, Х.Тэмүүжинг УИХ-ын даргад зүтгүүлэх үү

     УИХ-ын ТББХ, чуулганы нэгдсэн хуралдаан өнөөдөр (2026.03.30) болж, Н.Учралыг УИХ-ын даргаас чөлөөллөө. Эрх баригч хүчинд “УИХ-ын дараагийн дарга С.Бямбацогт уу, Ж.Энхбаяр уу” гэх марафон ид өрнөж байна. С.Бямбацогтыг МАН-ын дарга Н.Учрал дэмжиж байгаа бол Ж.Энхбаярыг МАН-ын генсек Я.Содбаатар зүтгүүлж байна. Хууль зүй, дотоод хэргийн сайд асан Ц.Нямдорж МАН-ын Бага хурал дээр “УИХ-ын даргаа цөөнхөд өг” гэж өчигдөр хэлсэн. Ажиглагчид энэ үгийг “Л.Оюун-Эрдэнийн талд УИХ-ын даргын суудлаа өг” гэж хэллээ” хэмээн ойлгосон бол УИХ-д цөөнх АН-ын бүлгийнхэн Ц.Нямдоржийн хэлсэн үгэн дээр тоглолт хийж магадгүй юм. О.Цогтгэрэл тэргүүтэй тус намынхан УИХ-ын хаврын чуулган эхэлсэн өдөр Н.Учралыг “УИХ-ын даргын ажлаа өг” гэж бойкотолсон. Х.Баттулга, Л.Оюун-Эрдэнэ нарын далд дэмжлэгтэй өрнөсөн О.Цогтгэрэл даргатай АН-ынхны улс төр УИХ-ын үйл ажиллагааг 14 хоног гацаанд оруулсан. Харин одоо АН-ынхны хувьд барьцаа ахиулж “УИХ-ын даргаа манай намд өг” гэж тулгах уу гэдэг нь сонирхол татаж эхэллээ. АН-ын дарга О.Цогтгэрэл өнөөдөр сэтгүүлчдэд ярилцлага өгөхдөө “Л.Оюун-Эрдэнийн Засгийн газраас хөөгдөж гарсан АН одоо бүрдэх Засгийн газарт орох ёсгүй” гэж байр сууриа илэрхийллээ. Харин түүний өмнө УИХ-ын гишүүн Х.Тэмүүжин чуулганы нэгдсэн хуралдаан дээр “МАН-д нэг зүйл дээр талархаж байна. Намын цагаан байрнаасаа парламентын спикерийг тодруулах нь зохимжгүй гэдэг дээр та бүхэн санал нэгдсэн юм байна. Баярлалаа. Одоо УИХ-ын чуулган дээр намын бүлэг биш, олонхи 68 гишүүнийхээ гарын үсэгтэй УИХ-ын даргаа оруулж ирдэг болбол бүр сайн. Яагаад гэвэл, Үндсэн хуульд “...УИХ-ын гишүүд дотроосоо...” гэж үг бий. Ямар нэгэн бүлэг, нам биш. Харин сонгуульд олонхи, цөөнх болсон намын бүлэг УИХ-ын дэд дарга дээр хүнээ тавих тухай маш тодорхой заалт байгаа. Яагаад ингэж ялгамжтай хуульчилсан бэ гэвэл, парламентын 126 гишүүн адил тэгш эрхтэй хуралддаг. Тиймээс аль нэг нам дангаараа юм уу намын нэрээр хаяглах биш, 126 гишүүн өөрсдийнхөө хуралдааныг эмхлэн зохион байгуулж удирдах хүнээ спикер болгон сонгоно гэдэг зарчим Үндсэн хуульд бичигдсэн” гэв. Х.Тэмүүжингийн хувьд, МАН-ын эсрэг маш амбицтай тоглолт хийж байгаа. Тэрбээр эрх баригчдын алдааг тоолох улс төрдөө ч сурамгай. Нэгэн цагт дайсагналцаж явсан Х.Баттулгатай ашиг сонирхол нэгдсэн тэрбээр өнөөдөр чуулган дээр хэлсэн үгээрээ УИХ-ын даргын суудалд амбицалж байгаагаа илэрхийлэв үү. Хэрэв Х.Тэмүүжин 126 гишүүнтэй парламентын спикер болохоор амбицалж эхэлсэн бол Х.Баттулга, О.Цогтгэрэл нар түүнийг дэмжих нь тодорхой. О.Цогтгэрэлийн нутгийн ах Ц.Нямдорж “УИХ-ын даргаа цөөнхөд өг” гэх “шипи”-г намынхандаа хэлэх далимдаа АН-ынханд өглөө. Түүний хэлсэн үгэн дээр О.Цогтгэрэл тэргүүтэй АН-ынхан дөрөөлж, Х.Тэмүүжинг УИХ-ын даргад зүтгүүлэх эсэхээс Төрийн ордон дахь улс төрийн өрнөл ямар болох нь харагдана. Х.Тэмүүжингийн тухайд, АН олонхи байхад Хууль зүйн сайдаар ажиллаж байсан, эрх зүйч мэргэжилтэй, мэргэшсэн парламентч. Тэгэхээр УИХ-ын даргад зүтгүүлэхэд болохгүй гэх газаргүй. Өөрөө ч асар амбицтай байгаа бололтой. АН-ынхны ээлжит бойкот нь “Спикерийн суудлаа цөөнхөд өг. Х.Тэмүүжинг УИХ-ын дарга болго. Үгүй бол бид чуулганд суухгүй” байхвий.      

Ж.Болд