Б.Пүрэвдорж: АН 2028 онд олуулаа болоод та нарыг бүгдийг нь 461 дүгээр хорих ангид нэг камерт хорино. Заавал ял өгнө

       МАН-ын дарга, Ерөнхий сайд Н.Учрал өнөөдөр (2026.04.03) МАН-ын Удирдах зөвлөлд сайд нарынхаа нэрсийг танилцуулсан. УИХ-ын чуулганы нэгдсэн хуралдаанаар яг одоо шинээр бүрдэж буй Засгийн газрын сайд нарын томилгоог хэлэлцэж байна. Хуралдаанд 126 гишүүнээс 117 гишүүн оролцож байна. Энэ үеэр Ерөнхий сайд Н.Учралд хатуу үг хэлж, шинээр томилогдох сайд нарыг улалзуулж байгаа нь УИХ дахь АН-ын бүлгийнхэн. Тухайлбал, УИХ-ын дэд дарга Б.Пүрэвдорж “МАН-ын хулгайтай хийсэн тэмцлийн түүх миний ширээн дээр байна. ЖДҮ-ээр эхэлж, нүүрсний хулгай, оффтэйк, тендер, төмөр зам, Боловсролын зээлийн сан, “Ногоон автобус” зэрэг маш олон хулгай хийсэн. МАН-ынхан сая хэрэлдэхдээ өнгөрсөн жилүүдэд хэлсэн миний үг үнэн байсныг баталсан. Ковидийн хулгай 20 их наядын хохиролтой, нүүрсний хулгай дөнгөж эхэлж байхад долоон их наядын хохиролтой гэж ярьж байжээ. Усыг нь машинаар зөөдөг 3.2 тэрбум төгрөгийн усан сан гээд ярьж байсан байна. Хулгайдаа цадсан та нар сая “Бодь интернэшнл”-ийн 120 сая ам.долларыг ингэж хуваасан, Оюутолгойн 20 сая ам.долларыг тэгж шамшигдуулсан гээд бүр улаан цайм байна. Ард түмнийг зүгээр л цагаан цаас гэж харж байна. МАН-ын жирийн гишүүдийн нүүрийг хэдхэн нөхөд түлж байна шүү дээ. Хоорондоо барьцаалагдсан. “Чи миний оффтэйкийн гэрээг ярьж байна уу. Тэгвэл чиний ковидийн хулгай байгаа шүү” гэнгүүт нөгөөдөх нь “За, за, хоёулаа больё” гээд хулгайгаа нуудаг. Тамираа тасартал хэрэлдэж байсан нөхөд өнөөдөр тэврэлдээд инээлдэж байна. Ямар жаргалтай байна вэ, та нар. Авлигачдаа 40 сая төгрөгөөр торгодог. Хоёр, гуравхан жилээр ялладаг. Хоёр жилээр яллагдсан тэр нөхөр 24 тэрбум төгрөгийн маркийн цуглуулгатай. Тэр хаачсан бэ. Нэг нэгэндээ хариуцлага тооцож чадахгүй юм байна. Ард түмэн та нарт 2028 онд дүн тавина. АН олуулаа болно. Олуулаа болчихоод хариуцлага тооцно. Та нарыг бүгдийг чинь 461 дүгээр хорих ангид нэг камерт аваачиж хорино. Заавал ял өгнө. Ял өгчихөөд “Ногоон автобус”-аар чинь Мааньтын чанга дэглэмтэй хорих ангид аваачиж үлдсэн насыг чинь өнгөрүүлнэ. “Ногоон автобус”-нд гурван суудал авна. МАН-аас АН-д тавьсан гурван БЭТ-ийг хамт ачна” гэлээ. Түүнийг ийн хэлэх зуур УИХ-ын дарга С.Бямбацогт микрофоныг нь хааж, бүдүүлэг үг хэллэг хэрэглэхгүй байхыг гишүүдэд анхааруулав.

Ж.Болд